Екінші рет неке құрғанда туындайтын қиындықтармен күресу

Қазыбек пен Жанар бір-бірін тапқандарына қуанышты. Бірінші күйеуімен ажырасқан Жанар Қазыбекті тіпті “менің ақ боз атты ханзадам” деп атайды. Десе де Қазыбек пен Жанар өз тәжірибелерінен екінші рет некеге тұрғандардың бірінші некеде болмайтын қиындықтарға кезігуі мүмкін екенін көрдіb.

Екінші рет некеге тұрған болсаңыз, өзіңізді қалай сезінесіз? Ажырасқанына үш жыл өткеннен кейін екінші рет тұрмысқа шыққан Тамара есімді әйел былай дейді: “Бірінші рет некеге тұрғанда, некең мәңгілікке ұласатындай көрінеді. Бірақ екінші рет неке құрғаныңда, мұндай ерекше сезімде болмауың мүмкін, себебі бірінші некеңнің сәтсіз аяқталғаны әрдайым есіңде болады”.

Дегенмен көп ерлі-зайыптылар екінші рет құрған отбасында да бақытты бола алған. Олар некелерін баянды етті және сіз де бұған қол жеткізе аласыз. Бұл үшін екінші некеде жиі кездесетін үш қиындықты және оларды шешуге көмектесетін Киелі кітап принциптерін қарастырып көрейікc.

1-ҚИЫНДЫҚ: ҚАЗІРГІ НЕКЕҢІЗДІ БІРІНШІ ҚҰРҒАН НЕКЕҢІЗБЕН САЛЫСТЫРУ

“Мен бірінші некемнен қалған естеліктерді жай ғана санамнан өшіріп тастай алмаймын, әсіресе бірінші күйеуіммен демалуға барған жерлермен өткенде, бәрі қайтадан есіме түседі,— дейді Оңтүстік Африкада тұратын Елен есімді әйел.— Мен кей кездері қазіргі күйеуімді бірінші күйеуіммен еріксіз салыстырып кетемін”. Бірақ ойлап көріңізші, жұбайыңыз бұрын үйленген болса әрі сол бірінші некесі жайлы жиі айтатын болса, сіз бұған наразы болады емессіз бе?!

КЕҢЕС: Жұбайыңыз екеуіңіз бірінші құрған некелеріңізді — әсіресе ол ұзақ жылдарға созылған болса — ұмыта салу мүмкін емес екенін мойындауларыңыз керек. Кейбіреулер тіпті байқаусызда әйелі не күйеуінің есімін бірінші жұбайларының есімімен атап қойғандарын айтады. Осындай жағдайға кезіксеңіз, мәселені шешуге не көмектеседі? Киелі кітапта: “Жанашыр болыңдар”,— деп жазылған (Петірдің 1-хаты 3:8).

Жұбайыңыздың бірінші некесі жайлы айтуына тыйым салып, қызғаныш танытпаңыз. Қайта, жұбайыңыз бұрынғы әйелі не күйеуі жайлы сөйлескісі келсе, оны түсінушілікпен әрі жанашырлықпен тыңдаңыз. Сондай-ақ бірден “ол мені бұрынғы жұбайымен салыстырып жатыр” деп ойламаңыз. Он жыл бұрын екінші рет неке құрған Марат былай дейді: “Әйелім Гүлсім бұрынғы әйелім жайлы сөйлесуді тыйым салынатын тақырып ретінде емес, қайта, мені жақыннан танып-білудің мүмкіндігі ретінде қарастырады”. Сіз де мұндай тақырыпқа сөйлесудің қазіргі жұбайыңызбен қарым-қатынасыңызды нығайтуға көмектесетінін байқарсыз.

Назарыңызды қазіргі жұбайыңыздың жақсы қасиеттеріне әрі өзіне тән ерекшеліктеріне аударыңыз. Әрине, бұрынғы жұбайыңызда болған кейбір қасиеттер не қабілеттер оның бойында жоқ шығар. Алайда ол басқа жақсы қасиеттерімен ерекшеленуі мүмкін. Сондықтан жұбайыңызды “басқалармен салыстырмай”, қайта, бойындағы сізге ұнайтын қасиеттері жайлы ойлап әрі соларды бағалап, некеңізді берік етіңіз (Ғалаттықтарға 6:4). Екінші рет неке құрған Ержан есімді кісі былай дейді: “Екі достық бір-біріне ұқсамайтыны сияқты екі неке де әртүрлі болып келеді”.

Бірінші некеден қалған естеліктерді қазіргі жұбайыңызға ауыр тимейтіндей етіп айту үшін не істей аласыз? Дархан есімді кісі былай дейді: “Бірде мен әйеліме алғашқы некем бұрынғы жұбайымыз екеуіміз жазған көркем кітап сияқты екенін айттым. Мен оған былай деп түсіндірдім: — Ара-тұра мен сол кітапты ашып, бірге өткізген жақсы сәттерді еске алуым мүмкін. Бірақ қазір мен сол кітаптың кейіпкері емеспін. Қайта, екеуіміз өз кітабымызды жазып жатырмыз әрі мен сенімен бірге бақыттымын”.

2-ҚИЫНДЫҚ: ЖҰБАЙЫҢЫЗДЫҢ БҰРЫННАН ТАНИТЫН ДОСТАРЫМЕН АРАЛАСУ

“Үйленгенімізге біраз уақыт болғанда, әйеліме менің бұрынғы достарым оны тексеріп, сынап жатқандай көрінді”,— дейді ажырасқанына алты жыл өткенде қайта үйленген Жомарт. Ал Тимур есімді кісі басқаша жағдайға кезікті. Ол былай деп айтып берді: “Таныстарымыздың кейбіреуі бірде әйеліме оның бұрынғы күйеуін қатты жақсы көргендерін және сағынғандарын дәл менің көзімше айтты!”

КЕҢЕС: Өзіңізді достарыңыздың орнына қойып көріңіз. Жоғарыда сөздері келтірілген Мараттың айтуынша, жора-жолдастарына бұрыннан танитын жұптың бір жартысымен ғана араласу ауыр тиеді, себебі екінші жартысының орны босап қалады. Сол себепті біз “бәріне бірдей жұмсақтық танытып, есті болуға” шақырыламыз (Титке 3:2). Достарыңыз бен туыстарыңыздың қазіргі жұбайыңызға үйренулері үшін уақыт қажет екенін ұмытпаңыз. Жомарттың жағдайындағыдай, бұрынғы достарыңызбен жаңаша араласа бастауыңыз мүмкін. Сондай-ақ жаңадан неке құрғандықтан, жаңа достарыңыз пайда болады. Жомарт былай дейді: “Біз ерлі-зайыптылар ретінде жаңа достар да табуға тырысамыз әрі бұл бізге жақсы әсер етеді”.

Бұрынғы достарыңызбен араласқанда, жұбайыңыздың сезімдерін ескеріңіз. Мысалы, әңгіме барысында бұрынғы жұбайыңыз туралы сөз қозғалса, жұбайыңыз өзін шеттетіліп қалғандай сезінбес үшін ілтипаттылық пен парасаттылық танытыңыз. Киелі кітапта: “Ойланбай сөйлеген семсердей жаралайды, Ал дананың тілі сауықтырады”,— делінген (Нақыл сөздер 12:18 ЖД).

3-ҚИЫНДЫҚ: БІРІНШІ ЖҰБАЙЫҢЫЗ АДАЛ БОЛМАҒАНДЫҚТАН, ҚАЗІРГІ ЖҰБАЙЫҢЫЗҒА СЕНІМ АРТПАУ

Бірінші әйелі тастап кеткен Андрей: “Маған қайтадан опасыздық жасала ма деп қатты қорқатынмын”,— дейді. Кейіннен ол Рая есімді әйелге үйленді. “Мен жиі “Раяның бірінші күйеуі сияқты жақсы күйеу бола алар ма екенмін” деп ойлайтынмын. Оның күйеуі сияқты болмағандықтан, ол мені тастап, басқа біреуге кетіп қала ма деп уайымдайтынмын”.

КЕҢЕС: Жұбайыңызға уайымыңызды ашық айтыңыз. “Кеңессіз құрған іс аяқсыз қалар”,— делінген Киелі кітапта (Нақыл сөздер 15:22). Мысалы, ашық әңгімелескендері Андрей мен Раяға бір-біріне сенім артуға көмектесті. Андрей былай дейді: “Мен Раяға ажырасуды қиыншылықтарды шешудің оңай жолы деп қарастырмайтынымды айттым. Рая да солай ойлайтынын айтты. Уақыт өте келе мен Раяға толықтай сенетін болдым”.

Қазіргі әйеліңіздің не күйеуіңіздің бірінші жұбайы көзіне шөп салған болса, оның сеніміне ие болу үшін қолыңыздан келгеннің бәрін істеңіз. Мысалы, алғашқы некелері ажырасумен аяқталған Жігер мен Сабина бұрынғы жұбайларымен сөйлессе, бұл жайлы бір-біріне айтып отыруды шешкен. “Осылай келісіп алғанымыздың арқасында жанымыз тыныш”,— дейді Сабина (Ефестіктерге 4:25).

Екінші рет неке құрғандардың көбісі некелерін баянды етті, сіз де бұған қол жеткізе аласыз. Өйткені бірінші рет некеге тұрған кезге қарағанда қазір өзіңізді жақсырақ біле түскен шығарсыз. Жоғарыда сөздері келтірілген Андрей былай дейді: “Раямен неке құрғаным маған көп қуаныш әкелді. Отау құрғанымызға 13 жыл болды. Қазір қарым-қатынасымыз әлдеқайда берік әрі біз жұбымыздың ешқашан жазылмағанын қалаймыз”.