Сіз үшін маңызы бар оқиға

ИСА Мәсіх жерде болған кезінде шәкірттеріне Құдайға құрмет көрсететін бір оқиғаны атап өтуді тапсырды. Ол тек соны ғана діни мейрам ретінде атап өтуді бұйырды. Ол — Иеміздің кешкі асы деп аталатын мейрам.

Сол оқиғаның қалай болып жатқанын бақылап тұрғаныңызды елестетіп көріңізші. Міне, Иса мен оның елшілері Иерусалимдегі жоғарғы қабаттағы бөлмеде яһудилердің діни мейрамы — Құтқарылу мейрамын тойлауға жиналды. Олар мейрамға арнап дайындалған отқа қақталған тоқты еті, ащы шөптер, ашытқысыз пісірілген нан мен қызыл шараптан тұратын асты жеп, болып та қалды. Көп ұзамай Иесіне сатқындық жасайтын опасыз елшісі Яһуда Исқариот шығып кетті (Матай 26:17—25; Жохан 13:21, 26—30). Иса өзінің адал он бір елшісімен қалды. Олардың бірі — Матай.

Осы оқиғаның куәсі болған Матай Иеміздің кешкі асы мейрамын Исаның қалай ендіргенін былай деп хабарлайды: “Иса қолына [ашытқысыз пісірілген] нан алып, бата берді. Нанды үзіп, шәкірттеріне беріп жатып: — Алып жеңдер, бұл — Менің денем,— деді. Иса [шарап құйылған] тостағанды да алып, шүкіршілік етті. Оларға беріп жатып, былай деді: — Мынадан бәрің де ішіңдер. Өйткені бұл — күнәлары кешірілсін деп көптеген адамдар үшін төгіліп, (Жаңа) келісімді бекітетін Менің қаным” (Матай 26:26—28).

Неліктен Иса Иеміздің кешкі асын атап өтуді бұйырды? Неге мейрам кезінде рәміз ретінде ашытқысыз пісірілген нан мен қызыл шарап қолданылды? Бұл рәміздерден Исаның шәкірттерінің бәрі де дәм татулары керек пе? Бұл оқиға қанша рет атап өтілу керек? Оның шынымен де сіз үшін маңызы бар ма?