Андрий Клюка 2025 жылдың наурызынан бері Украинада түрмеде отыр, сот оны бес жылға бас бостандығынан айырды

Түрлі жерде сенімі үшін түрмеде отырған Ехоба куәгерлері жайлы мәлімет

2026 жылдың ақпан айындағы мәліметке сай, 259-дан астам Ехоба куәгері сенімі үшін темір торда отыр.

Азаматтық және саяси құқықтар туралы халықаралық пактінің 18-бабына сәйкес, әрбір адамның ой-пікір, ар-ождан және дін бостандығына құқығы бар. Алайда кейбір мемлекеттер осы бапта келтірілген адам құқығын елемей, Ехоба куәгерлерін дінге сенгені үшін және ар-ожданы әскерге баруға жол бермегені үшін әділетсіз түрмеге жабуда.

Қырым

2017 жылдың сәуір айында Ресей үкіметі Ехоба куәгерлерінің бейбіт ғибадатын тоқтату мақсатында олардың заңды ұйымына тыйым салды. Бұл шешім Қырымға да әсер етіп, ондағы билік иелері Ехоба куәгерлерін қатыгездікпен қудалай бастады. Үкімет тінту жұмыстарын жүргізіп, біраз адамды тұтқындады. Қазір 14 Куәгер түрмеде отыр. Олардың барлығына адамдарды үкіметке қарсы шығуға үгіттеді деген айып тағылған.

Қырымда сенімі үшін түрмеде отырған Ехоба куәгерлерінің тізімін жүктеу үшін мына жерді басыңыз.

Эритрея

1994 жылы ел президенті Исайяс Афеворки Ехоба куәгерлері 1993 жылы Эритреяның тәуелсіздігі үшін дауыс бермегеніне және әскери қызметтен бас тартқандарына бола оларды азаматтықтарынан айырды. Содан бері үкімет оларды жас демей, кәрі демей, әйел не бала демей, ешқандай сотсыз түрмеге қамап, ұрып-соғып, қорлық көрсетіп келеді. Бүгінгі таңда 64 Ехоба куәгері қамауда отыр. Олардың ешқайсысына ресми айып тағылмаған және сот үкімі шығарылмаған.

Эритреяда сенімі үшін түрмеде отырған Ехоба куәгерлерінің тізімін жүктеу үшін мына жерді басыңыз.

Ресей

2017 жылы сәуір айында Ресейдің жоғарғы Соты Ехоба куәгерлерін экстремисттер деп айыптап, іс-шараларына тыйым салды. Содан олардың ғибадат орындарын жауып, тәркілеп, әдебиеттеріне тыйым салды. Кейін билік иелері жеке Ехоба куәгерлеріне көшіп, Құдайға құлшылық еткендері үшін оларды ұстап, тергеп, қылмыстық топтың мүшесі ретінде тұтқындай бастады. Полиция қызметкерлері жиі Куәгерлердің үйіне баса-көктеп кіріп, қоқан-лоқы көрсетіп, тергеп, кейде тіпті тұтқынға алады. Бүгінде кем дегенде 158 Куәгер қамауда, олардың кейбірі тергеу изоляторында ауыр жұмысқа жегілсе, кейбірі ұзақ уақытқа сотталып, түрмеде отыр.

Ресейде сенімі үшін түрмеде отырған Ехоба куәгерлерінің тізімін жүктеу үшін мына жерді басыңыз.

Сингапур

Сингапурда әрбір ер азамат заң бойынша әскерге баруға міндетті. Үкімет әскерге барудан бас тартқан адамды 30 айға дейін бас бостандығынан айырады. Құрама Штаттар талай жылдан бері осы мәселеге араласып, азаматтарға ар-ожданына байланысты әскерге бармауға мүмкіндік беруін сұраса да, Сингапур үкіметі халықаралық адам құқықтары стандарттарына мойынсұнбай келеді. Бүгінде ар-ождандары бойынша әскерге барудан бас тартқан 11 жас Куәгер түрмеде отыр, ал олардың бесеуі екінші рет қамауға алынған.

Сингапурда сенімі үшін түрмеде отырған Ехоба куәгерлерінің тізімін жүктеу үшін мына жерді басыңыз.

Оңтүстік Корея

2020 жылдың 26 қазанында Оңтүстік Корея сенімі үшін әскерге барудан бас тартқан азаматтар үшін баламалы қызмет түрін ұсынған болатын. Бірақ бұл баламалы қызмет сынға алынып, тым ауыр екені айтылуда. Өйткені әскери қызмет мерзімі Оңтүстік Кореяда 18 айға созылса, баламалы қызмет 36 айға созылады. Баламалы қызметті қайта қарастыруға қатысты соттар өтті. Алайда Оңтүстік Кореяның Жоғарғы Соты 2024 жылы бұл қызмет дәл осы қалпында қала береді деген шешім шығарды. Оңтүстік Кореядағы көптеген жас Куәгерлер мерзімі ұзақ болса да, ауыр жұмыс істеуге тура келсе де, осы баламалы қызметті таңдайды. Алайда 14 жас Куәгер бұл баламалы әскери қызметтен бас тартқан. Олардың біреуі қазір түрмеде отыр, ал кейбірі сот шешімін күтіп отыр. Олар да түрмеге жабылуы мүмкін.

Оңтүстік Кореяда сенімі үшін түрмеде отырған Ехоба куәгерлерінің тізімін жүктеу үшін мына жерді басыңыз.

Украина

Осыған дейін Украинадағы Ехоба куәгерлері ар-ождан мәселесі бойынша әскерге барудан бас тартып, заң рұқсат еткен баламалы қызмет түрін таңдай алатын. Олар 30 жылдай дерлік осы баламалы қызметті атқарып келді. Алайда 2022 жылы 24 ақпанда соғыс басталғанда, барлық ер азаматтар соғысқа баруға міндеттеліп, бас тартқандар қуғындала бастады. Қазіргі уақытта алты Куәгер түрмеде, ал бесеуі тергеу изоляторында отыр. БҰҰ-ның үш маманы Украина сенімі үшін әскерге барудан бас тартқандарға заңды түрде баламалы қызмет түрін ұсынбай отырғанын айтып, осы мәселені көтерді.

Украинада сенімі үшін түрмеде отырған Ехоба куәгерлерінің тізімін жүктеу үшін мына жерді басыңыз.

“Түрмеде отырған бауырластармен өздерің бірге отырғандай, оларды есте ұстаңдар” (Еврейлерге 13:3).