Жастар, Құдай Сөзін оқыңдар!
1 Жастық шақ — қиыншылықтарға толы және маңызды шешімдер қабылдайтын кезең. Мәсіхші жастар, көпшілігің Құдайдың жүріс-тұрысқа қатысты нормаларын бұзу қысымымен күн сайын кездесіп жүрсіңдер. Сондықтан білім алу, жұмыс және неке құруға қатысты жеке шешімдер қабылдар алдында рухани мақсаттар қойғандарың абзал. Тек сонда ғана қабылдайтын басқа шешімдерің өмірлеріңе жақсы әсер ететін болады. Ал нақты рухани мақсаттар ақылмен әрекет етуге әрі жетістікке жетулеріңе көмектеседі. Сондықтан Құдай Сөзін жүйелі түрде оқып, оның үстінен ой жүгірткендерің Құдайдың рухының жетелеуімен жазылған кеңесіне сай өмір сүруге талпындырады, ал осыған жұмсаған күштерің табыссыз болмайды (Еш. 1:8; Заб. 1:2, 3).
2 Мұның сен үшін қандай пайдасы бар? Шайтанның дүниесі — күнәға тартатын еліктірулерге толы (1 Жох. 2:15, 16). Мүмкін, сен құрбы-құрдастарының қысымына беріліп қайғы шеккен сыныптастарыңды немесе өзің қатарлы басқа жастарды білетін шығарсың. Ал Киелі кітаптың кеңесін берік ұстанғаның күнәкарлықтан аулақ болу үшін рухыңды нығайтады және рухани күш береді. Сондай-ақ Құдай Сөзіндегі кеңес Шайтанның жасырын торларына түсіп қалмауға көмектеседі (2 Қор. 2:11; Ев. 5:14). Құдай жолымен жүргенің нағыз бақытқа жеткізеді, яғни өміріңді қанағат сезіміне бөлейді (Заб. 118:1, 9, 11).
3 Құдай Сөзіндегі мәңгі принциптер адам баласының даналығынан әлдеқайда жоғары (Заб. 118:98—100). Киелі кітаптың принциптерін жақсылап білгенің және шын жүректен дұға ете отырып, Ехобаның еркі туралы ой жүгірткенің даналығында шек жоқ Киелі кітаптың авторы Ехоба Құдаймен тығыз қарым-қатынас дамытуға көмектеседі. Ол: “Мен саған ақыл-кеңес беремін, жүретін жолыңды көрсетемін; сені көзімнен таса қылмай, әрдайым жетелеп жүремін”,— деп уәде етеді (Заб. 31:8).
4 Киелі кітапты оқуға уақыт бөл. Бір жас мәсіхші бауырласымыз Киелі кітапты толық оқып шығуды мақсат етіп қойып, оны бір жыл ішінде оқып шығыпты. Мұның пайдасы қандай болды? “Мен Ехоба туралы соншалықты көп нәрсе білдім, соның арқасында оған бұрынғыдан да жақындай түстім және бұл мені өмір бойы оны қастерлеуге талпындырды” (Жақ. 4:8). Сен Киелі кітапты толық оқып шықтың ба? Егер олай болмаса, неге алдыңа сондай мақсат қоймасқа? Ал Ехобаның осындай талпынысыңа батасын төгері сөзсіз, әрі мұның керемет жемісін көресің.