Пікір алыса білесіңдер ме?

“АЛПЫС жастағы кісінің махаббат хаты”. Осыдан бірнеше жыл бұрын Жапониядағы бір банк өткізген байқаудың тақырыбы осылай аталды. Онда 50 және 60 жастағы жапондықтар өз жұбайларына деген “шынайы сезімдерін” айтуға шақырылды. Байқауға қатысушылардың бірі әйеліне былай деп жазды: “Сен, бәлкім, күлетін шығарсың, бірақ егер мұны айтпасам, кейін қатты өкінем. Саған дауыстап: — Маған тұрмысқа шыққаның үшін көп рақмет!— деймін”.

Бірқатар елдің мәдениетінде, мысалы кейбір Шығыс мәдениетінде, адамның өз сезімін ашық айтқанын құп көре бермейді. Десе де жоғарыда айтылып кеткен “махаббат хаты” байқауына 15 000-нан астам адам жауап қатты. Оның адамдарға ұнағаны сонша, кейін тағы бір рет өткізілді, сондай-ақ оған келген хаттарға негізделген кітаптар жарық көрді. Осының бәрі көп адамдардың аяулы жарына деген жүрек түбіндегі сезімін білдіруді қатты қалайтынын көрсетеді. Ал кейбіреулер, керісінше, сезімдерін айтқысы келмейді. Неліктен? Бәлкім, адамға өз сезімін біреуге айтып түсіндіру үшін қандай да бір шамада күш пен шеберлік қажет болғандықтан шығар.

Зейнетке шығу туралы кітап жазған Хитоси Като Жапониядағы егде тартқан ерлі-зайыптылар арасында ажырасуға арызды бірінші болып жылдар бойы іші ренішке толған әйелдер беретінін айтады. “Бірақ бұл ерлі-зайыптылардың бастарына қиындық түскен сәттерде ашық сөйлеспегендерінің кесірінен де болып отыр”,— дейді ол.

Кейде зейнетке шыққан күйеуі әйелінің ажырасайын деп жатқанын білгенде, төбесіне жай түскендей болар. Бұндай жағдайға олар көп жылдар бойы бір-біріне деген сезімдерін ашық айтпағандықтан тап болуы мүмкін. Бәлкім, күйеуі мен әйелі өз сезімдерін айтып көрмекші болған да шығар, бірақ жағымды мәнерде сөйлесе алмай, қайта-қайта ұрысып қала берген болуы мүмкін. Сондықтан араларында жақын қарым-қатынас дамымаған.

Қалай ерлі-зайыптылар араларындағы келіспеушілікті ынтымақпен шешіп, ой-сезімдерін бір-біріне жағымды түрде айта алады? Бұған қатысты өте пайдалы кеңестер бар. Бірақ оларды неке туралы кеңес берушінің қандай да бір соңғы шыққан кітабынан емес, ғасырлар бойы құнды болып келген ежелгі кітап — Киелі кітаптан табуға болады.