14-САБАҚ

Негізгі ойларға баса назар аудару

Еврейлерге 8:1

САБАҚТЫҢ БАСТЫ ОЙЫ: Тыңдаушыларға баяндамаңызға ілесіп отыруға көмектесіңіз, әрбір негізгі ой тақырыбыңызбен және мақсатыңызбен қалай байланысатынын анық көрсетіңіз.

ҮЙРЕНУ ЖОЛДАРЫ:

Мақсатыңызды анықтау. Баяндаманың мақсаты ақпарат беру ме, көз жеткізу ме, әлде тыңдаушыларды іс-әрекетке талпындыру ма? Осыны анықтаған соң, баяндаманы сол бағытта өрбітіңіз. Негізгі ойлардың бәрі мақсатыңызға қол жеткізуге көмектесу керек.

“Бұл тақырыпқа қатысты тыңдаушыларда қандай сұрақтар туындауы мүмкін? Қай сұрақтан қай сұрақ шығуы мүмкін?”— деп ойланып көріңіз. Сосын айтар ойларыңыздың ретін соған сай құрастырыңыз. Сонда тыңдаушыларға баяндамаға ілесу, мәліметті түсіну және қабылдау жеңіл болады.
Баяндаманың тақырыбына екпін түсіріп отыру. Баяндама барысында тақырыбыңызға оралып отырыңыз. Бұл үшін оның негізгі сөздерін қайталаңыз немесе синонимдерін қолданыңыз.
Негізгі ойларды анық әрі қарапайым ету. Тақырыбыңызбен байланысы бар және берілген уақыт ішінде жақсылап жеткізе алатын негізгі ойларды ғана таңдаңыз. Негізгі ойларыңыз көп болып кетпесін. Олардың әрқайсысын анық көрсетіңіз, араларында кідіріс жасаңыз, бір ойдан екінші ойға күрт секіріп кетпеңіз.

Тыңдаушылар ілесіп отыру үшін негізгі ойларды алғы сөзіңізде айтсаңыз болады, я болмаса олар есте қалу үшін қорытынды сөзіңізде қайталап өтсеңіз болады.