Басқарушы кеңестің хаты

Бізбен бірге ізгі хабарды уағыздап жүрген қымбатты жариялаушылар!

Жалғыз шынайы Құдай Ехобаға бірлікте ғибадат ету неткен мәртебе десеңізші! “Құдаймен қызметтесіп” жүрген біздерге Құдай Патшалығы жайлы ізгі хабарды уағыздау мен тәлім беру сияқты өмір сақтайтын қасиетті іс сеніп тапсырылған (Қор. 1-х. 3:9; Мат. 28:19, 20). Осындай дүниежүзілік істі татулық пен бірлікте атқару үшін жақсылап ұйымдасқанымыз маңызды (Қор. 1-х. 14:40).

Бұл кітап сізге мәсіхшілер қауымы бүгінде қандай қызмет атқаратынын түсінуге көмектеседі. Қауымдағы мәртебелі міндеттеріңіз бен жауапкершіліктеріңіз жайлы да сөз етіледі. Егер сіз сол міндеттеріңізді бағалап, тиянақты атқарсаңыз, сенімде берік тұратыныңыз сөзсіз (Ел. іс. 16:4, 5; Ғал. 6:5).

Сол себепті біз сізді осы кітапты мұқият оқып шығуға шақырамыз. Сосын оқып-білгеніңізді өмірде қалай қолдана алатыныңыз жайлы ойланып көріңіз. Мысалы, сіз жақын арада шомылдыру рәсімінен өтпеген жариялаушы болсаңыз, шомылдыру рәсімінен өтіп, Ехоба куәгері болу үшін қандай қадамдар жасауыңыз қажет? Ал егер шомылдыру рәсімінен өтіп қойсаңыз, рухани өсіп, қызмет аясын кеңейту үшін не істей аласыз? (Тім. 1-х. 4:15). Қауымның татулығына қалай үлес қоса аласыз? (Қор. 2-х. 13:11). Бұл сұрақтардың жауабын осы кітаптан табуға болады.

Сіз шомылдыру рәсімінен өткен ер адам болсаңыз, қызмет көмекшісі я ақсақал ретінде қызмет етуге лайықты болу үшін не істей аласыз? Құдайдың ұйымына мыңдаған жаңа адам ағылып келіп жатқандықтан, жетекшілікті қолға алатын лайықты ер бауырластар ауадай қажет. Бұл кітапты оқи келе, сіз осы рухани мақсаттарға қол жеткізу үшін не істеу керектігін түсінесіз (Тім. 1-х. 3:1).

Осы кітап сізге Ехобаның ұйымы үшін көбірек еңбек етуге және оны бағалауға көмектессін деп шын жүректен дұға етеміз. Біз барлығыңызды қатты жақсы көреміз, әрі сіздер үшін дұға айтып, мәңгілік бойы көктегі Әкеміз Ехобаға ғибадат ететіндердің арасында сіздер де болса екен дейміз (Зәб. 37:10, 11; Ишая 65:21—25).