Mutindu ya Mbote ya Kutadila Bampasi

1-2. Inki beto fwete sala sambu na kukangila bampasi ntima? (Tala mpi kifwanisu.)

KETI bantu ke sadila nge mambu ya mbi to bantu ya dibuta na beno ke telemina nge mpi ke niokula nge sambu nge kele Mbangi ya Yehowa? Keti nge ke niokwama sambu nge ke belaka, nge me kuma mununu, sambu muntu mosi ya nge ke zolaka me fwa to sambu mambu ya nkaka ya mpasi kibeni me bwila nge? Kuvila ve nde bonso bansadi mingi Yehowa, luzingu na nge lenda ‘fuluka mpi ti mavwanga mpi mawa.’​—Nk. 90:10.

² Sambu na kukangila bampasi ntima, beto fwete tadila yo na mutindu ya mbote. Sambu na nki? Beto lenda fwanisa yo mutindu yai: Bampasi ya nge ke kutana ti yo kele bonso bigonsa ya nge lenda kutana ti yo ntangu nge ke pusa kamio. Ntangu nge me mona kigonsa mosi, yo ta lomba nde nge nata kamio na diboko ya kimama to ya kitata, kukulumusa vitesi to nkutu kutelemisa kamio. Kansi sambu nge sala mambu yai, yo ta vanda mbote nde nge mona mbote-mbote kigonsa yango. Nge lenda mona ve kigonsa yango kana malulu to bitobi-tobi me kumisa vitre ya kamio lubungi. Mutindu mosi, sambu na kukangila bampasi ntima, beto fwete tadila yo mutindu Yehowa ke tadilaka yo. Na disolo yai, beto ta tubila (1) mutindu ya mbote ya kutadila bampasi na beto, (2) bigonsa ya kutadila bampasi na mutindu ya mbi mpi (3) mwa mambu yina beto lenda sala sambu na kulanda kutadila bampasi na mutindu ya mbote ntangu yo me bwila beto.

MUTINDU YA MBOTE YA KUTADILA BAMPASI

3. Sambu na nki beto ke kutanaka ti bampasi?

³ Beto ta kutana kaka ti bampasi na nsi-ntoto yai. Beto yonso ta kutana ti bampasi sambu beto kele bantu ya kukonda kukuka mpi sambu Satana kele mfunu ya nsi-ntoto yai. Diaka, sambu nsuka ya nsi-ntoto yai me kuma pene-pene, beto ta kutana diaka ti bampasi mingi, mu mbandu bisumbula ya lugangu to bampasi yina mambu ya bantu ya mbi ke salaka lenda nata. (Mat. 24:8; 2 Tim. 3:13) Kana Yehowa me manisa bampasi yai yonso bubu yai, yo ta vanda bonso nde yandi ke sadisa Satana na kuyala nsi-ntoto yai. Mutindu Satana kele mfumu ya nsi-ntoto yai, beto ke zabaka nde beto ta kutana kaka ti bampasi.​—Lon. 9:12.

4. Sambu na nki beto ke kutanaka ti bampasi ya nkaka?

⁴ Beto ke kutanaka ti bampasi ya nkaka sambu beto kele balongoki ya Yezu. Mbala mingi, Yezu vandaka kusonga balongoki na yandi nde bo ta niokula bo sambu bo kele balongoki na yandi. (Mat. 24:9; Yoa. 16:2) Mutindu beto me zaba mambu yai, yo ke sadisa beto na kuvanda ti lukwikilu ya ngolo ntangu beto ke kutana ti bampasi. (1 Bate. 3:3, 4) Ntangu beto ke kanga ntima na bampasi, beto fwete ndima mpenza nde beto kele na nzila ya ke nata na luzingu ya mvula na mvula. Diaka, yo ke monisaka nde beto ke pesa maboko na Kimfumu ya Yehowa mpi nde Satana kele muntu ya luvunu. Mu mbandu, Satana ke tubaka nde beto ke sadilaka Yehowa Nzambi sambu yandi ke pesaka beto bima ya mbote kansi ve sambu beto ke zolaka yandi. Yandi ke tubaka mpi nde muntu mosi ve ta landa kukangama na Yehowa na ntangu ya mpasi. Yo yina, yandi ke niokulaka mingi bansadi ya Yehowa. (Yobi 1:9-11) Ntangu beto ke kanga ntima na bampasi, beto ke monisaka nde beto ke zolaka kibeni Yehowa mpi beto ke sepedisaka yandi mingi.​—Bing. 27:11.

5. Longi 7:13, 14 ke longa beto nki? (Tala mpi bifwanisu.)

⁵ Yehowa kele ve na kisina ya bampasi na beto kansi yandi ke bikaka nde beto kutana ti bampasi. Yehowa ke sadilaka beto ve ata fioti mambu ya mbi mpi yandi ke mekaka beto ve na mambu ya mbi. (Yak. 1:13) Kansi sambu na nki ntotila Salomo sonikaka nde “kilumbu ya mpasi” kele “kisalu ya Nzambi ya kieleka”? (Tanga Longi 7:13, 14.) Yo ke tendula ve nde yandi muntu ke pesaka beto mpasi kansi yandi ke bikaka kaka nde beto kutana ti bampasi. Bandongisila ya mbote yina Salomo pesaka lenda sadisa beto na kutadila bampasi na beto na mutindu ya mbote. Ntete, beto fwete vila ve nde mutindu beto ke zinga na nsi-ntoto yai ya Satana, bilumbu ya nkaka mambu ta kwendila mbote sambu na beto kansi bilumbu ya nkaka ve. Yo yina kana beto kele na kiese, beto fwete pesa Yehowa mersi sambu na mambu ya mbote yina yandi me sadila beto. Diaka, Salomo tubaka nde beto ke ‘zabaka ve konso kima yina ta kumina beto,’ yo yina yo kele mpasi na kuzaba kana beto ta kutana ti mambu ya mbote to ya mbi sambu mambu ya kukonda kukana ke kuminaka bantu ya mbote mpi ya mbi.

6. Sambu na nki Yehowa ke bikaka nde beto kutana ti bampasi? (Baebreo 12:7, 11)

⁶ Ntangu beto ke kutana ti bampasi, Yehowa ke zolaka nde beto tudila yandi ntima. Yandi ke monaka bampasi na beto, yo ke salaka yandi mpasi mpi yandi ke zolaka kusadisa beto. Ata yandi ke bikaka nde beto kutana ti bampasi, yandi ke songaka beto mambu yina beto fwete sala. Yandi ke monisaka nde yandi ke zolaka beto mingi mpi yandi ke pesaka beto kikesa ya kukangila yo ntima. (Nk. 23:4) Ntangu beto ke kutanaka ti bampasi yo ke sadisaka beto na kuzaba bisika yina beto fwete yidika na luzingu na beto mpi Yehowa ke sadisaka beto na kuyidika bikalulu na beto. (Tanga Baebreo 12:7, 11.) Mu mbandu, bampasi sadisaka Yobi na kuyedisa kikalulu ya kudikulumusa. Yehowa ve muntu pesaka Yobi bampasi, kansi yandi bikaka nde Yobi kukutana ti yo sambu yandi bakila yo malongi ya mfunu. (Yobi 42:1-6) Ata Yehowa me pesa nzila nde konso mpasi yina kukumina beto, beto ke zabaka nde yandi ta bika ve nde yo landa kaka kuniokula beto mvula na mvula. Yo yina, kana beto ke kangila yo ntima, yandi ta sakumuna beto mingi.​—Bar. 8:35-39.

7. Sambu na nki nge lenda vanda na kiese ata ntangu bantu ke monisa nge mpasi sambu na lukwikilu na nge?

⁷ Beto lenda vanda na kiese ntangu bantu ke monisa beto mpasi. Kana bantu ke monisa nge mpasi sambu na lukwikilu na nge, kuyindula ve nde Yehowa me yambula nge. Nkutu, yo ke monisa nde Yehowa ke sepela kaka ti nge. (Mat. 5:10-12) Kana nge ke tadila bampasi yango na mutindu ya mbote, nge ta vanda na kiese bonso bantumwa ya Yezu. (Bis. 5:40-42) Diaka kana nge ke kanga ntima na bampasi, yo lenda sadisa bantu ya nkaka na kulonguka mambu ya Yehowa mpi na kupesa yandi “nkembo.” (1 Pie. 2:12) Bonso Yozefi, nge lenda vanda mpi na kiese ntangu nge ke kutana ti bampasi.​—Kuy. 39:3, 23.

8. Inki kikuma ya nkaka fwete pusa beto na kulanda kukanga ntima na bampasi na beto?

⁸ Bampasi na beto ta mana. Bampasi yina Yobi kutanaka ti yo ke sadisa beto na kuzaba nde kilumbu kele bampasi na beto ta mana. Ya kieleka, “Yehowa sakumunaka nsuka ya luzingu ya Yobi kuluta nkutu luyantiku.” (Yobi 42:12) Mutindu mosi, Yehowa ke sila nde yandi ta sakumuna nge mingi na nsi-ntoto ya mpa mpi nde nge ta zinga mvula na mvula kuluta luzingu yai ya nkufi ya me fuluka ti bampasi. Yo yina, konso muntu na kati na beto fwete kanga ntima tii na nsuka sambu na kubaka mambote yai.​—Mat. 24:13.

BIGONSA YA KUTADILA BAMPASI NA MUTINDU YA MBI

9. Sambu na nki kutadila bampasi na mutindu ya mbi lenda vanda kigonsa?

⁹ Ata beto ke kutana ti bampasi ya nki mutindu, beto fwete tadila yo na mutindu ya mbote sambu yo natila beto ve bampasi ya nkaka. Mu mbandu, ntangu mpasi me bwila beto, beto lenda yindula nde Yehowa muntu me sala nde yo kumina beto. Na ntangu mosi buna, Yobi yindulaka mpi nde Yehowa muntu vandaka kunatila yandi bampasi yina. Nkutu, kutadila bampasi na mutindu ya mbi pusaka yandi na ‘kudimonisa muntu ya mbote kuluta Nzambi.’ (Yobi 32:2) Naomi tubaka mpi nde Yehowa muntu vandaka kunatila yandi bampasi. (Ruti 1:13, 20, 21) Kana Yobi mpi Naomi landaka kuyindula mutindu yai, yo zolaka kubebisa kibeni kinduku na bo ti Yehowa. (Bing. 19:3) Yehowa sadisaka bo na kubakisa nde yandi muntu ve vandaka kunatila bo bampasi yina kansi yandi sadisaka bo na kukangila yo ntima mpi nsuka-nsuka Yehowa sakumunaka bo sambu bo landaka kukanga ntima.

10. Inki beto lenda kudiyula ntangu beto ke kutana ti bampasi?

¹⁰ Ata beto ke ndimaka ve nde Yehowa muntu ke natilaka beto bampasi, beto lenda banda kudiyula kana yandi ke landa kaka kukeba beto. Kuyindula mutindu yai, lenda lembisa beto na kimpeve. (Bing. 24:10) Ntangu ntotila Davidi mpi profete Habakuki kutanaka ti bampasi, bo kudiyulaka kana Yehowa vandaka kuwa bisambu na bo. (Nk. 10:1; Hab. 1:2) Ata mpidina, bo landaka kaka kusamba. Yehowa pesaka mvutu na bisambu na bo mpi yandi landaka kusadisa bo. Ndima mpi nde yandi ta sadisa nge.​—Nk. 10:17.

11. Inki lenda kumina beto kana beto ke yindula nde bampasi lenda bwila beto ve?

¹¹ Kana beto yindula nde bampasi lenda bwila beto ve sambu beto ke sambilaka Yehowa, yo ta pesa beto mpasi kilumbu yo ta kumina beto mpi beto ta kuka ve kukangila yo ntima. (1 Pie. 4:12) Yo vandilaka mpi balongoki ya Yezu mpasi na kundima nde Yezu lenda mona mpasi. (Luka 18:33, 34) Mu mbandu, Yezu songaka balongoki na yandi nde yandi ta mona mpasi kansi Piere ndimaka ve nde Yehowa lenda bika nde Yezu kuniokwama. Yezu zabaka nde bangindu ya mutindu yai lenda lembisa yandi nitu mpi kukanga yandi nzila ya kusala luzolo ya Tata na yandi, yo yina yandi nganinaka Piere. (Mar. 8:31-33) Ata na nima ya lufwa na yandi, yo vandaka mpasi sambu balongoki kundima mambu yai. Kansi, Yezu landaka kusadisa bo. Ntangu yandi futumukaka, yandi landaka kusadisa bo na kubakisa mbote-mbote sambu na nki yandi niokwamaka mpi yandi ‘tendudilaka bo Masonuku mbote-mbote.’ (Luka 24:25-27, 32, 44-48) Mambu yina Yezu songaka balongoki na yandi sadisaka bo na kukanga ntima na bampasi yina bo zolaka kukutana ti yo. Yo yina kana beto ke tanga Biblia, yo lenda sadisa beto na kukanga ntima na bampasi ya beto ta kutana ti yo.

12. Inki kele kigonsa ya kutadila bampasi na beto na mutindu ya mbi?

¹² Kana beto ke tadila bampasi na beto na mutindu ya mbi, yo lenda pusa beto na kuyindula nde yo kele mpasi mingi na kukangila yo ntima. Yezu tubilaka mambu yai na mbandu yina yandi pesaka ya bansadi yina vandaka kusala na kilanga ya vinu. Bansadi ya nkaka vandaka kubokuta sambu bo vandaka kuyindula nde bo bakaka ve salere yina yo lombaka nde bo baka. Kansi mfumu na bo songaka nsadi mosi nde: “Mpangi, mono me sala nge mbi ve.” (Mat. 20:10-13) Kima yina salaka nde bansadi yina kuvanda ve na kiese kele nde bo vandaka kuvingila kima yina bo vandaka ve ti nswa na yo. Bubu yai mpi bansadi ya nkaka ya Yehowa ke kukutanaka ti mambu ya mutindu yai, disongidila bankaka ke bokutaka sambu bo me pesa bo ve mukumba to bo me katula bo mukumba yina bo vandaka ti yo na dibundu. Inki mambu beto lenda sala sambu na kutadila bampasi na beto na mutindu ya mbote?

MAMBU YINA BETO LENDA SALA KANA BAMPASI ME BWILA BETO

13. Inki mambu lenda salama kana bampasi me bwila beto?

¹³ Bansadi ya Yehowa ke zabaka mambu yina Biblia ke tubaka sambu na bampasi. Bo ke sadilaka mpi mambu yina Biblia ke tuba sambu na kupesa bantu mingi yina ke kutana ti bampasi kikesa. Kansi ntangu bampasi me bwila nge yo lenda vandila nge mpasi na kutadila yo na mutindu ya mbote. Mu mbandu, nge lenda yindula nde Yehowa me pesa nge ndola to nde yandi ke wa diaka ve bisambu na nge. Inki nge lenda sala kana nge me kuma kuyindula mutindu yai?

14. Inki nge lenda lomba Yehowa na kisambu ntangu nge ke kutana ti bampasi? (Bafilipi 4:13)

¹⁴ Samba Yehowa na kusadisa nge. Songa Yehowa bampasi na nge mpi mutindu nge ke kudiwa. Nge lenda lomba Yehowa mambu yina ya nge kele na yo mfunu sambu yandi sadisa nge. Mu mbandu, nge lenda lomba Yehowa mpeve santu na yandi sambu yo pesa nge ngolo mpi mayele ya kukangila bampasi ntima. Zaba nde, Yehowa lenda pesa mvutu na bisambu na nge na mutindu yina nge yindulaka ve. (Baef. 3:20) Yandi lenda tinda bawanzio to bampangi sambu bo sadisa nge. (Nk. 34:7) Yo yina, ndima lusadisu ya mitindu yonso yina Yehowa ke pesa nge mpi pesa yandi mersi sambu na yo. Diaka, nge lenda tudila Yehowa ntima sambu yandi lenda pesa nge mpeve santu sambu yo sadisa nge na kukanga ntima na bampasi ya nge ke kutana ti yo.​—Tanga Bafilipi 4:13.

15. Inki lenda sadisa nge na kukanga ntima na bampasi? (Tala mpi kifwanisu.)

¹⁵ Landa kusala mambu ya kimpeve. Kana nge ke kuka diaka ve kusala mambu ya kimpeve yina nge vandaka kusala ntete, sala mambu ya nkaka ya fioti-fioti yina lenda sadisa nge na kubikala ngolo na kimpeve. Nge lenda fulusa mabanza na nge ti bangindu ya Yehowa ata ntangu nge kele na ‘mawa mpi na mpasi.’ (Nk. 119:143) Tanga Biblia mbala na mbala, longuka yo mpi yindula mambu yina nge ke tanga. Longa nsangu ya mbote, kwenda na balukutakanu mpi pesa bamvutu. Lutisaka ntangu ti bampangi na kisika ya kudivandila.​—Bing. 18:1.

16. Inki badute beto lenda kuma ti yo ntangu mpasi me bwila beto mpi nki beto lenda sala sambu na kukatula yo? (2 Bakorinto 10:4, 5)

¹⁶ Katula badute. Kana bampasi me bwila nge, nge lenda kuma kuyindula mambu ya mpamba-mpamba to nge lenda kuma ti badute sambu na Yehowa. (Tanga 2 Bakorinto 10:4, 5.) Nge lenda katula badute yina kana nge ke sadila “nzayilu ya Nzambi” yina kele na Biblia mpi na mikanda na beto. Mu mbandu, keti nge ke kudiyulaka kana Yehowa ke zolaka nge? Kana mpidina, longuka disolo ya ntumwa Polo. Yandi kutanaka ti mambu ya mpasi ntangu yandi vandaka kulonga nsangu ya mbote kansi yandi bikalaka ngolo sambu yandi zabaka nde Yehowa vandaka kundima yandi. (2 Bak. 11:23-27) Keti nge ke kudiyulaka mpi kana Yehowa me lolulaka masumu na nge ya ntama? Kana mpidina, sala liste ya baverse yina ke monisaka nde Yehowa ke lolulaka masumu na beto. (Yez. 43:25) Na nima, tanga baverse yango mpi yindula yo mingi. (Nk. 119:97) Ntangu mpasi me bwa, keti nge ke kudiyulaka kana Nzambi ke taninaka bansadi na yandi ya kwikama? Kana mpidina, sala bansosa sambu na kuzaba sambu na nki Nzambi ke pesaka nzila na bampasi mpi mutindu yandi lenda sadisa beto na ntangu yango. (Nk. 91:9-12) Diaka, tanga masolo ya bampangi yina me kangaka ntima na bantangu ya mpasi.a

17. Inki beto lenda sala kana bampasi me bwila beto?

¹⁷ Mbala ya nkaka nge me kutana ntete ve ti bampasi. Pesa Yehowa mersi mpi sadila mbote dibaku yai sambu na kuyindula mambu ya mbote yina Yehowa me sadila nge. (Lon. 7:14) Kansi ntangu nge me kutana ti bampasi, sala ngolo na kutadila yo na mutindu ya mbote mpi landa kutudila Yehowa ntima. Kana nge landa kusala mambu yai, Yehowa ta ‘yidika mpi nzila sambu nge kuka kukangila yo ntima.’ (1 Bak. 10:13) Inki beto lenda sala ntangu bampangi na beto me kutana ti bampasi? Beto ta tubila yo na disolo ya ke landa.