Kuma Kuwa Nzambi Boma Mingi Bonso Obadia

Obadia vandaka kutwadisa bantu ya nzo ya ntotila ya mbi Ahabi. Ntotila yai pusaka bantu mingi na Izraele na kukuma kusambila Baale. Kansi, Obadia vandaka kuwa Yehowa boma mingi ‘banda kileke na yandi.’ (1 Bant. 18:1-13) Yo yina ntangu ntotila-nkento Yezabele tubaka nde bo fwa baprofete yonso ya Yehowa, Obadia bakisaka nde yo lombaka nde yandi vanda kikesa mpi yandi sala kima mosi sambu na kugulusa baprofete yina. Kubumba ata profete mosi mpamba vandaka kigonsa. Kansi Obadia bumbaka baprofete 100 mpi yandi vandaka kupesa bo madia na ntangu yina bima ya kudia kumaka mpasi mpenza. Ntembe kele ve nde, kusala mambu yai kukonda nde baprofete mingi ya ntotila mpi ntotila-nkento kumona yandi, vandaka ve pete.​—1 Bant. 18:19.

Mbandu ya muntu yai ya vandaka kuwa Nzambi boma ke longa beto nki? Ya masonga, Obadia vandaka kuwa Ahabi boma. Kansi yandi vandaka kuwa Nzambi boma mingi kuluta. Boma ya Yehowa pusaka yandi na kutula luzingu na yandi na kigonsa sambu na kutanina bampangi na yandi. Kana na kisika yina beto ke zinga, bamfumu me buyisa beto na kusambila Yehowa, beto fwete wa mpi Yehowa boma bonso Obadia. Boma ya mutindu yai ta pesa beto ngolo ya kusadisa bampangi na beto ya ke kutana ti bampasi.