Sosa Mambu ya Mpa Ntangu Nge Ke Longuka

Ntangu beto ke yilama sambu na kulonguka, beto lenda kudiyula nde: ‘Inki mambu mono ke zola kulonguka?’ Kansi beto fwete vila ve nde ata beto lenda yindula nde beto ta longuka kima mosi, yo ke tendula ve nde kele ve ti mambu ya mpa yina Yehowa ke zola kulonga beto. Inki beto fwete sala sambu na kuwidikila mambu yina Yehowa ke zola kulonga beto?

Samba sambu na kulomba mayele. Lomba Yehowa na kusadisa nge na kubakisa mambu yina yandi ke zola nde nge longuka. (Yak. 1:5) Kukangama ve kaka na bima yina nge ke zabaka dezia.​—Bing. 3:5, 6.

Bika nde ngolo ya ndinga ya Nzambi kusadisa nge. “Ndinga ya Nzambi kele ya moyo.” (Baeb. 4:12) “Ndinga” ya Nzambi yina kele ya moyo lenda sadisa beto na mitindu ya kuswaswana konso ntangu yina beto ke tanga Biblia. Kansi yo ta sadisa beto kaka kana beto ke ndima nde beto fwete longuka mambu yina Nzambi ke longa beto.

Sepela ti bima yonso yina Yehowa ke sadilaka sambu na kulonga beto. Madia na yandi ya kimpeve kele bonso “nkinsi mosi ya madia ya mbote.” (Yez. 25:6) Kubuya ve kutanga mambu yina nge ke yindula nde nge ta sepela ve ti yo. Kana nge sala mutindu yina, nge ta bika nde Nzambi kusadisa nge na kukuma muntu ya mbote mpi nge ta sepela kibeni ti mambu yina nge ke longuka.