Baluzayisu

◼ Mikanda ya kukabula na Yuni: Inki Biblia Kelongaka Mpenza? Kana bawi kele dezia ti mukanda yai, bansamuni lenda pesa konso mukanda ya balutiti 192 yina kubasikaka na ntwala ya mvu 1992. Yuli ti Augusti: Beno lenda sadila konso kamukanda yina na kati ya tumikanda yai ya balutiti 32: Bampeve ya bafwa​—⁠Keti bau lenda sadisa nge to kusala nge imbi? Keti ya kyeleka bau kele?; Inki Kekuminaka Beto Kana Beto Mefwa?; Keti ya Kyeleka Nzambi Kekudibanzaka Sambu na Beto?; Le nom divin qui demeure à jamais; Ntangu Muntu ya Nge Kezolaka Mefwa; Nzila Yina Kenataka na Luzingu ya Mvula na Mvula​—⁠Keti Nge Mezwaka Yo? mpi Zinga Mvula na Mvula na Kiese na Ntoto! Septembri: Inki Biblia Kelongaka Mpenza? Kana mpila kele bansamuni tasala ngolo sambu na kuyantika kulonguka Biblia ti bantu na mbala ya ntete ya bo tapesa bantu yango mukanda yai. Sadisa nsonga ya kemonisa na bunkufi mutindu beto kelongukaka Biblia ti bantu sambu na kusonga bo mutindu bo lenda bakila yo mambote.

◼ Konso ntangu ya nge kebaka bangidika sambu na kusala nzyetelo na insi mosi yina bo mevutukila ve zina na yo na rapore ya mvula ya kisalu ya mpa to yina adresi na yo kele ve na lutiti ya nsuka ya Annuaire ya mpa, beto kelomba nge na kusolula ti biro ya filiale sambu na kuzaba bangidika to bantuma ya sipesiali yina yo lenda lomba nde nge landa. Mbala yankaka bo mebuyisaka Kisalu ya Kimfumu na kitini yina na kiteso mosi buna. (Mat. 10:16) Na bansi yankaka, yo lenda vanda ve mbote nde banzenza kusosa kukutana ti Bambangi to mabundu ya insi yango. Bo lenda pesa nge mpi bantuma yankaka na yina metala mutindu ya kuta kimbangi ya dibaku ya mbote to kunata mikanda na beto. Kulanda lutwadisu yai tasadisa na kubuya mambu ya kukonda mfunu yina lenda kumina nge to kisalu ya Kimfumu.​—⁠1 Kor. 14:​33, 40.