Keti Nge Kesadilaka Mukanda Comment raisonner?
1. Inki mutindu ntumwa Polo ti Yezu vandaka kulonga bantu yankaka?
1 Ntumwa Polo vandaka kusala kikesa sambu na kuyindula ti bantu na nsadisa ya “Mukanda ya Nzambi.” (Bis. 17:2, 3; 18:19) Na kusalaka mutindu yina, yandi landaka mbandu ya Yezu, yina vandaka kuvutukila mbala na mbala Masonuku mpi kusadila bingana sambu na kusadisa bawi na yandi na kubakisa luzolo ya Nzambi. (Mat. 12:1-12) Mukanda Comment raisonner à partir des Écritures mesalamaka sambu na kusadisa beto na kusala mpidina.
2. Inki mutindu beto lenda sadila mukanda Comment raisonner sambu na kubongisa bangogo ya mbote ya kuyantika masolo?
2 Kubongisa Bangogo ya Mbote Sambu na Kuyantika Masolo: Mukanda Comment raisonner à partir des Écritures na balutiti 9-15 kele ti bangogo ya kuyantika masolo ya ketedimisa mpusa. Kulonguka mpi kusadila bangogo mingi ya kuyantika masolo, mingimingi kana nge kesalaka teritware na nge mbala na mbala, tasadisa nge na kuvanda ti bangogo mingi ya kuyantika masolo na kisalu na nge ya kusamuna, mpi na kusoba ti na kuvanda ngolo na mitindu na nge ya kuyantika masolo. Beto lenda tanga bangogo ya kuyantika masolo mbala mosi na mukanda yai na ntangu beto keta kimbangi na telefone to na interphone na banzo ya nene yina kele na lutaninu ya ngolo.
3. Inki mambu kele na balutiti 16-24 ya mukanda Comment raisonner yina tasadisa nge na kisalu ya kusamuna?
3 Mutindu ya Kununga Bantembe: Sambu na nki ve kuyindula na ntwala bantembe yina bantu lenda basisa na teritware na beno mpi kubaka mwa minuta na ntwala ya kusamuna sambu na kutadila mambu yina kele na balutiti 16-21 ya ketendula mutindu ya kupesa mvutu? Keti kele ti bawi yina lenda vanda Babudiste, Bahindu, Bayuda, to Bamizuluma? Kana bo kele, mambu yina kele na balutiti 21-24 tasadisa nge.
4. Inki mutindu beto lenda sadila mukanda Comment raisonner kana muntu meyula ngyufula to mebasisa dyambu mosi ya kebasisa ntembe?
4 Kupesa Bamvutu: Mukanda Comment raisonner lenda sadisa beto mpi kana muntu meyula ngyufula to mebasisa dyambu mosi ya kebasisa ntembe. Nge lenda zabisa muntu yango kaka nde nge tazola kumonisa yandi kima mosi ya kitoko ya ketubila dyambu yina, mpi basisa mukanda na nge Comment raisonner. Sambu masolo yango kele ya kusonika na ndonga, kangula na ntu-dyambu yina nge keyindula nde yo tavanda ti bangindu ya nge kesosa. Sosa nswalu bangyufula yina kele ya kusonika na bisono ya ndombe. Kana nge mona yo ve nswalu, kangula index yina kele na balutiti ya nsuka. Kana nge zwa mambu ya nge kesosa, tanga yo mbala mosi na mukanda. Kana beno ketadila verse mosi ya sikisiki, nge lenda zwa mambu ya nge kele na yo mfunu na lutiti 445 na ntu-dyambu: “Textes bibliques souvent mal compris.”
5. Inki kele mwa mitindu yankaka ya mbote ya kusadila mukanda Comment raisonner?
5 Mutindu Yankaka ya Kusadila Mukanda Yai: Bampangi yankaka kevandaka ti mukanda Comment raisonner na bisika na bo ya kisalu to na nzo-nkanda sambu yo sadisa bo na kupesa mvutu na bangyufula bonso, ‘Sambu na nki beno ketaka ve Nkinsi ya Lubutuku?’ Baleke memonaka nde bantu-dyambu “Creation” ti “Evolution” mesadisaka bo na kuyidika masolo ya kusala na nzo-nkanda. Keti nge kekwenda kutala muntu mosi ya kebela to ya mefwisa muntu ya yandi kezolaka? Disolo ya ntu-dyambu “Encouragement” lenda sadisa nge na kupesa kikesa ya mekatuka na Masonuku. Mukanda Comment raisonner kele mpi ti mambu ya mfunu sambu na bantu yina kesalaka badiskure mpi ketwadisaka balukutakanu sambu na kisalu ya bilanga.
6. Inki kevandaka lukanu na beto ntangu beto kesamunaka?
6 Ntangu beto kesamunaka, lukanu na beto kevandaka kaka ve ya kununga bangindu to ya kuzabisa kaka nsangu. Beto kezolaka kuyindula ti bantu na mayele yonso na nsadisa ya Masonuku. Ntangu beto kesadilaka mbote mukanda Comment raisonner, beto kemonisaka nde beto ketulaka ntangu yonso dikebi na malongi na beto.—1 Tim. 4:16.