Kulonguka ya Mukanda Sambila Nzambi

Bo basisaka mukanda Sambila Nzambi Mosi Kaka ya Kyeleka sambu na kulonguka yo ti bantu ya mpa yina memanisa kulonguka mukanda Biblia Kelongaka. Mutindu beto talonguka mukanda yai na Kulonguka ya Mukanda ya Dibundu, yo tasadisa beto na kusadila mbote kisadilu yai na kisalu ya kusamuna mpi na kuyedisa zola ti ntonda na beto sambu na Yehowa mpi organizasio na yandi. Inki mutindu beto lenda baka mpenza mambote na kulonguka na beto ya mukanda Sambila Nzambi?

Mutindu ya Kutwadisa Kulonguka: Sambu beto talongukaka kapu ya mvimba konso mposo, bankengi ya kulonguka ya mukanda fwete sadila ntangu na mayele yonso. Bo fwete lutisa ve minuta mingi na baparagrafe ya ntete sambu bo bumba ntangu ya kutadila mbote baparagrafe ya kati-kati yina kevandaka mbala mingi ti malongi ya mfunu. Kutadila na bunkufi bangyufula yina ke na lupangu na nsuka ya konso kapu tasadisa bawi na kusimba malongi ya mfunu.

Bangyufula yina kesadisa beto na kuyindula mpi na kutadila kumosi kele na bakapu mingi ya mukanda Sambila Nzambi. Mbandu mosi kele na balutiti 48-9. Mfunu ya kutanga bangyufula yina kumosi ti baparagrafe kele ve. Ntangu beno ketadila bangyufula yango na kimvuka, nkengi fwete lomba na kutanga mpi kutadila baverse yonso ya bo mepesa kana ntangu kele.

Kudibongisa na Ntwala: Kuyidika kulonguka ya mbote kelombaka mambu mingi kuluta kutenda kaka bikokila na bamvutu. Kuyindulula mbote na baverse yina bo mepesa tasadisa beto ve kaka na kupesa bakomantere, kansi kuluta dyaka na kubongisa ntima na beto. (Esd. 7:10) Beto yonso lenda pesana kikesa kana beto kepesa bakomantere ya mbote na kudikulumusa yonso.​—⁠Roma 1:​11, 12.

Kulonguka ya mukanda Sambila Nzambi tasadisa beto na kupusana penepene ya Yehowa mpi tabongisa beto na kusadisa bantu ya ntima masonga na kukwisa kuvukana ti beto sambu na kusambila Yehowa. (Nk. 95:6; Yak. 4:⁠8) Bika nde beto yonso kubaka mpenza mambote ya ngidika yai ya mbote ya kimpeve.