‘Zabisa Nsangu ya Mbote Kukonda Boma’
1 Keti bantangu yankaka yo kevandilaka nge mpasi na kutubila lukwikilu na nge na nzo-nkanda to na kisalu ntangu bo kepesaka nge dibaku ya kusala yo? Keti yo kevandaka mpasi sambu nge ta kimbangi ya dibaku ya mbote na bampangi na nge mpi na bamfinangani to nkutu na bantu yina nge mezaba ve? Inki tasadisa beto yonso na kusadila mabaku ya mbote sambu na “kuzabisa nsangu ya mbote kukonda boma”?—Filp. 1:14.
2 Kuvutuka Ve Nima: Keti nge tavutuka nima na kukotila nduku to mpangi mosi ya ngolo yina bo mefunda kukonda kikuma? Banda bamvu-nkama mingi, bantu memonisaka Yehowa yina kele nduku na beto ya ngolo na mutindu mosi ya mbi. Beto kele ti dibaku ya mbote mpenza ya kuta kimbangi sambu na Nzambi na beto ya nene! (Yez. 43:10-12) Zola ya ngolo sambu na Yehowa lenda sadisa beto na kununga boma ya beto lenda vanda ti yo mpi kupusa beto na kuvutuka ve nima na kimbangi na kyeleka ti kikesa yonso.—Bis. 4:26, 29, 31.
3 Kuvila ve nde beto kezabisaka nsangu ya mbote. Yo tanatila bantu yina kendima yo mambote ya kimakulu. Kana beto ketula dikebi na kisalu ya kusamuna, kansi na beto mosi to na bambeni na beto ve, yo tasadisa beto na kulonga ti kikesa.
4 Mbandu ya Bantu Yankaka: Beto lenda baka kikesa na luzingu ya kwikama ya bantu yankaka yina kuzabisaka ndinga ya Nzambi kukonda boma. Mu mbandu, Enoki kuzabisaka ti kikesa yonso bandola yina Yehowa zolaka kupesa na bantu ya masumu. (Yude 14, 15) Noa kusamunaka na kwikama yonso na bantu yina vandaka kutula ve dikebi ata fyoti. (Mat. 24:37-39) Bakristu ya mvu-nkama ya ntete yina kuvandaka ‘bantu ya mfunu mingi ve mpi ya melongukaka ve’ landaka na kusamuna ata na kati ya kimbeni ya ngolo. (Bis. 4:13, 18- 20) Mbala na mbala, mikanda na beto kevandaka ti masolo ya luzingu ya bantu yina kunungaka boma ya bantu mpi kumaka bansamuni ya kikesa sambu bo vandaka kumonisa lukwikilu na Yehowa.
5 Beto lenda baka kikesa na kutadilaka luzingu ya bansadi ya kwikama ya ntangu ya ntama yina kukutanaka ti mambu ya mpasi. (1 Bant. 19:2, 3; Mar. 14:66- 71) ‘Nzambi pesaka bo kikesa’ mpi bo zabisaka nsangu kukonda boma. Beto mpi lenda sala yo!—1 Tes. 2:2.