Kyelo Mekanguka Sambu na Bantu Yonso ti Lukanu

“INKI bo kesalaka awa?” Bantu mingi yina kelutaka na bakamio na ntwala ya lupangu ya nene ya Bambangi ya Yehowa na Mogale City (Krugersdorp), penepene ya Johannesburg, na Afrika ya Sudi, keyulaka ngyufula yina. Yo yina, na Oktobri 12 mpi 13, 2007, Bambangi ya Yehowa kubakaka lukanu ya kubika kyelo ya lupangu ya filiale ya kukanguka sambu na bantu yonso. Yo vandaka ti balukanu zole​—⁠kukatula bangindu ya mbi sambu na mambu ya luvunu yina bantu ketubaka mpi kumonisa bantu yonso mambu yina kesalamaka na filiale ya Bambangi ya Yehowa sambu na kupesa maboko na kisalu yina Yezu Kristu kutumaka.​—Matayo 28:19, 20.

Bantu yina kesalaka na biro ya filiale yina kutulaka bisono ya nene na kyelo ya lupangu sambu na kuzodila bantu kukwisa ya mbote, mpi bo kabulaka ba emvitasio ya sipesiali na bantu yina kezingaka penepene na bo. Bo bingisaka mpi bantu yina ketekilaka bo bima ti mabuta na bo. Inki kumonanaka? Bantu kuluta 500 ya kele ve Bambangi kusalaka viziti na filiale yina.

Kima ya kubendaka mingi dikebi ya bantu kuvandaka masini ya nene ya kunyemina mikanda (MAN Roland Lithoman), yina kenyemaka bazulunalu 90 000 na ngunga mosi. Kima yankaka ya kuyitukisaka bo kuvandaka kisika ya nene ya bo kekangisaka balutiti ya mikanda, mpi ketulaka mikanda kuluta batone 14 na karto konso kilumbu sambu na kutinda yo na bisika yankaka. Bambangi ya kesalaka na badepartema ya kuswaswana kusonikaka mambu ya kebenda dikebi na batablo ya ketendula mambu ya kesalamaka na badepartema yango. Mosi ya batablo yina vandaka kutendula na bunkufi mutindu mikanda kenyemamaka, banda na ntangu ya Gutenberg tii na ntangu na beto. Tablo yankaka vandaka kumonisa mutindu filiale kesalaka yonso sambu na kubebisa ve mupepe. Mu mbandu, masini mosi ya sipesiali kebendaka bansudi mpi midinga ya mbi yina kebasikaka na bamasini yina kenyemaka mikanda, mpi bamvindu ya bapapie.

Zulunalu mosi ya insi yina kusonikaka disolo mosi ya kutubaka nde bantu ya luzolo ya mbote 700 ya kezingaka na kati ya lupangu yango “kele baministre ya metumamaka mpi ya mekudipesaka na Yehowa.” Yo tubilaka mpi “bunkete ya ngolo mpi mutindu mambu yonso” ya metala kunyemama ya mikanda “kesalamaka na ntangu.” Bakala mosi yina vandaka kuzola ve Bambangi ya Yehowa kusalaka mpi viziti. Na nima yandi sonikaka mukanda mosi yina yandi tubaka nde: “Mono kesikisa beno. Bisika kele ve mingi ya muntu lenda mona mambu ya kesalama na mutindu mosi ya mbote mpenza.”

Banzenza mingi kumonisaka ntonda mutindu bo salaka viziti na filiale mpi bo yitukaka na kumona nde filiale yango kele ti mikanda ya ketendulaka Biblia na bandinga 151 mpi kenyemaka mikanda sambu na bansi 18 ya Afrika ya sudi mpi ya kati-kati. Babiro ya bafiliale ya Bambangi ya Yehowa na nsi-ntoto ya mvimba kevandaka ya kukanguka na bangunga ya kisalu sambu na kusala viziti. Sambu na nki ve kusosa ntangu sambu na kukwenda kusala viziti ya filiale ya bwala na nge?

[Bifwanisu ya kele na lutiti 10]

Filiale ya Afrika ya Sudi na Mogale City, na Afrika ya Sudi

[Kifwanisu ya kele na lutiti 10]

Kisalu ya kukangisa mikanda

[Kifwanisu ya kele na lutiti 10]

Masini ya kunyemina mikanda MAN Roland Lithoman

[Kifwanisu ya kele na lutiti 10

Kisalu ya kuyidika mpi ya kutinda mikanda

[Kifwanisu ya kele na lutiti 11]

Bantu ya kekwisa kutala filiale

[Kifwanisu ya kele na lutiti 11]

Emvitasio