Inki Mutindu Nge Ketesaka Kununga na Luzingu?

JESSE LIVERMORE kuzabanaka sambu na badesizio ya mbote ya yandi vandaka kubaka na mambu ya metala mumbongo, mpi yandi vandaka komersa ya kuluta nene ya bamagazini ya Wall Street yina mezabanaka mingi na Etas-unis. Yandi kumaka mvwama ya nene. Yandi vandaka kulwata bilele ya kuluta ntalu, yandi vandaka kuzinga na nzo mosi ya nene ya bashambre 29, mpi yandi vandaka kutambula na vwatire ya ntalu mingi kibeni.

Davida kuvandaka mpi na lukanu ya kununga na luzingu. Mutindu yandi vandaka kilandi ya mfumu ya kompani mosi ya nene, yo bikalaka fyoti sambu yandi kuma mfumu ya ntete ya kimvuka yankaka ya kompani yina. Mpusa ya lukumu mpi ya kuvanda ti mbongo mingi vandaka kubenda yandi. Kansi, yandi bakaka desizio ya kukatuka na kompani yina. Yandi ketuba nde: “Mu kezaba nde mu tabika kubaka dyaka ve kisika ya nene ya mutindu yina.” Keti nge keyindula nde David kusalaka kifu na kubaka desizio yina?

Bantu mingi keyindulaka nde kununga na luzingu ketendulaka kukuma mvwama, kuzabana mingi, to kukuma muntu ya lukumu. Kansi, bantu yina kevandaka ti kimvwama mingi ya kinsuni kewaka kaka nde bo kekonda kima mosi mpi kevandaka ve ti lukanu na luzingu. Mambu yina kukuminaka mpenza Mr. Livermore. Ata yandi vandaka ti mbongo mingi, luzingu na yandi kuvandaka luzingu ya mawa mpi ya mpasi. Yandi vandaka kunyokwama na mabanza, makwela na yandi kubebaka, mpi kuwakana ya mbote ti bana na yandi kuvandaka ve. Nsukansuka, na nima ya kuvidisa mbongo mingi, kilumbu mosi Mr. Livermore kuvandaka na bar mosi ya bantu ya mbongo mpi yandi kubokutaka sambu na mbongo ya yandi vidisaka. Yandi lombaka nde bo pesa yandi malafu ya ngolo, yandi bakaka karne na yandi ya kwire, yandi sonikilaka nkento na yandi bangogo ya nsuka, mpi kuyambulaka yo pana. Na nima ya kunwa imene, yandi kotaka na kabine mosi mpi kudifwaka mbala mosi.

Ata bikuma kepusaka bantu na kudifwa kevandaka ya kuswaswana, mbandu yai kemonisa kyeleka ya mambu yina Biblia ketuba nde: “Bantu yina ke zolaka kukuma bamvwama . . . [kekudipesaka] mpasi mingi na ntima.”​—1 Timoteo 6:9, 10.

Keti yo lenda vanda nde bantu yina kesadilaka kimvwama, kiyeka, to lukumu sambu na kutesila kununga na luzingu kesadilaka kitesilu ya mbi? Keti nge kemonaka nde nge menungaka na luzingu na nge? Sambu na inki? Inki kitesilu nge kesadilaka sambu na kuzaba yo? Inki kevandaka na bupusi na mutindu nge ketadilaka kununga na luzingu? Disolo yina kelanda ketubila ndongisila mosi ya mbote yina mesadisaka bantu mingi na kununga na luzingu. Bika beto tadila nki mutindu nge mpi lenda nunga na luzingu.

[Noti na nsi ya lutiti]