Madya ya Nkokila ya Nsuka Ketendula Inki Kibeni?

INKI kekwisila nge na mabanza kana nge wa bangogo “madya ya nkokila ya nsuka”? Bantu mingi tayindula bifwanisu ya kele na zulu ya dibaya mosi ya kitoko yina kele na bwala Milan na Italie yina Léonard de Vinci (1452-1519) kusalaka ya kemonisa nkokila ya nsuka ya Yezu kulutisaka ti bantumwa na yandi. Yo ke kyeleka nde banda ntama Madya ya Nkokila ya Nsuka kevandaka ntu-dyambu mosi ya mbote sambu na bantu ya kesalaka bifwanisu, na bansoniki, mpi na bantu ya kebulaka miziki.

Kansi, Madya ya Nkokila ya Nsuka ketendula nki kibeni, mpi yo ketendula nki sambu na bantu yina kezinga na mvu-nkama yai ya 21? Ba ansiklopedi ti badiksionere tasonga nge nde Madya ya Nkokila ya Nsuka, ya bo kebingaka dyaka nde Madya ya Nkokila ya Mfumu, kele madya yina Yezu Kristu kudyaka ti bantumwa na yandi na nkokila na ntwala ya lufwa na yandi ya kimenga. Sambu yo vandaka madya ya nkokila ya nsuka yina Yezu kudyaka ti balongoki na yandi ya kwikama, bantu mingi kebingaka yo Madya ya Nkokila ya Nsuka. Mpi sambu Mfumu Yezu Kristu yandi mosi muntu kutulaka yo, zina Madya ya Nkokila ya Mfumu mefwana mpenza.

Na nima ya bamvula mingi, bantu mingi mepesaka luzingu na bo bonso kimenga sambu na mambu yina bo vandaka kumona bonso ya mfunu mingi. Lufwa ya ndambu ya bantu yango kupesaka mwa mambote na ndambu ya bantu sambu na mwa ntangu fyoti. Kansi, kana beto fwanisa yo ti lufwa ya Yezu, ata lufwa mosi ve ya kuditambika ya bantu yina, ata yo lenda vanda ya lukumu, lenda vanda na mfunu mutindu lufwa ya Yezu Kristu kele na yo. Kuluta dyaka, ata lufwa mosi ve ya bantu ya kezinga na inza yai ya mavwanga lenda vanda na bupusi ya ngolo na bantu bonso lufwa ya Yezu. Sambu na inki?

Sambu na kuzwa mvutu na ngyufula yai mpi kusadisa nge na kubakisa ntendula ya Madya ya Nkokila ya Mfumu sambu na nge, beto kelomba nge na kutanga disolo yai kelanda.