Masolo ya Bansamuni ya Kimfumu

Inde​—“Bumosi na Kati ya Bantu ya Mutindu na Mutindu”

“BUMOSI na Kati ya Bantu ya Mutindu na Mutindu” kele bangogo ya bantu yonso kesadilaka sambu na kutubila bumosi yina kele na kati ya bantu ya insi ya Inde. Yo kele pete ve na kutula bumosi na insi yai ya nene ya kele ti bantu ya kele na luzingu ya kuswaswana, bandinga, mabundu, bikanda ya kele na bisina ya kuswaswana, kulwata, mpi kudya. Kansi, bumosi ya mutindu yai kemonanaka na biro ya Bambangi ya Yehowa na Inde, ata ba volontere yina kezingaka mpi kesalaka kuna mekatukaka na bisika mpi na bimvuka ya kuswaswana, ata nkutu bo ketubaka bandinga mingi ya kuswaswana.

• Bika beto sosa kuzaba Rajrani, mwana-nkento mosi ya bwala Penjab, na ndambu ya nordi-westi ya Inde. Ntangu Rajrani vandaka na nzo-nkanda, nduku na yandi mosi ya nzo-nkanda yantikaka kulonguka Biblia ti Bambangi ya Yehowa. Mwana-nkento yai yantikaka kuzabisa Rajrani mambu yina Biblia ketuba. Sambu mwana ya nzo-nkanda na bo vandaka kuzaba ve Kingelesi mbote mpi Nzozulu ya Nkengi vandaka basika ntete ve na Kipendjabi na ntangu yina, yandi lombaka Rajrani lusadisu ya kubaludila yandi mambu yina bo ketuba na zulunalu yina. Mambu yina Rajrani vandaka kutanga na Nzozulu ya Nkengi yantikaka kusimba ntima na yandi mingi na mpila nde, ata bibuti na yandi vandaka kubuyisa yandi, yandi yelaka tii kuna yandi pesaka luzingu na yandi na Yehowa Nzambi. Yandi kesalaka na Betele ya Inde bubu yai, mpi yandi kesalaka kisalu ya mutindu mosi yina kukangulaka yandi meso na kyeleka. Yandi kebalulaka mikanda ya Bukristu na Kipendjabi!

• Baka dyaka mbandu ya Bijoe, yina kukatukaka na ndambu yankaka ya Inde, na sudi-westi ya Kerala. Bo kulaka Bijoe na nzo-nkanda sambu yandi zolaka ve kukota na mambu yina bo vandaka kusala sambu na lukumu ya insi na bo. Na nima ya kusamba na tribinale yina kunungisaka lusambu ya kukonda mvindu na nsuka, Bijoe kuvutukaka na nzo-nkanda.a Yandi kwendaka kulonguka dyaka na nzo-nkanda ya nene. Kansi, luzingu ya mansoni yina vandaka kusalama kuna vandaka kutungisa kansansa na yandi mingi, yo yina, yandi zengaka kulonguka na nima ya bangonda. Na nima ya bamvula kumi ya yandi mesala na Betele bubu yai, yandi kemona nde yandi mebaka mambote mingi mutindu yandi kele mosi na kati ya bantu ya mutindu na mutindu ya kezingaka na bumosi na dibuta ya Betele kuluta mambote yina yandi zolaka kubaka kana yandi landaka kulonguka na nzo-nkanda ya nene.

• Norma ti Lily kele konso muntu ti bamvula 70, bo zole mpi kele mifwidi bamvula mingi meluta. Konso muntu na kati na bo mesalaka bamvula 40 na kisalu ya ntangu yonso. Lily kesalaka kisalu ya kubalula mikanda na ndinga ya Tamil na biro ya filiale bamvula 20 melunga. Norma kwisaka na Betele bamvula 13 meluta na nima ya lufwa ya bakala na yandi. Katula mbandu ya mbote yina bo kepesaka na kisalu ya kikesa mpi ya mbote ya bo kesalaka, bo kele na bupusi ya ngolo ya kuvukisa bantu kumosi na kati ya dibuta ya Betele ya mvimba. Bo kezolaka kusolula ti bantu yina kekwendaka kutala Betele, mpi bo kezolaka kuvanda kisika mosi ti batoko yina kele na kati ya dibuta ya Betele, sambu na kukabisa ti bo kyese yina bo mebakaka bamvula mingi na luzingu ya Bukristu. Ebuna batoko yina mpi kebingaka bo na basuku na bo sambu na kulutisa ntangu kumosi mpi kusadisa bo na ntangu bo kele na mfunu ya lusadisu. Yai bambandu ya mbote mpenza!

Sambu bo menungaka na kumanisa mambu yina kebasisaka bitumba ti kukonda kuwakana na bisika mingi, ba volontere yai kesalaka kumosi na kyese yonso sambu na kusadisa bantu yankaka na kati ya dibuta ya Betele ya Inde yina kezingaka na bumosi.​—Nkunga 133:1.

[Noti na nsi ya lutiti]

[Bangogo ya kemonisa kisina ya foto ya kele na lutiti 18]

Background: Mountain High Maps® Copyright © 1997 Digital Wisdom, Inc.