Bikala ya Kwikama na Yehowa

KWIKAMA, ata kikalulu yai kemonanaka mingi ve bubu yai, bansadi ya Nzambi ya kyeleka, Yehowa, mezabanaka sambu na kikalulu yango yai. Bantu yina kele ya kwikama kebikalaka kaka ya kukangama na kati ya mimekamu mpi ngolo ata ntangu ke na kuluta. Baka mbandu ya Ntotila ya mbote Ezekiasi. Biblia ketuba nde: “Bantu ya Yuda me vandaka ntete ve ti ntotila bonso yandi ata na ntwala na yandi ata na nima na yandi.” Inki kima kukumisaka Ezekiasi muntu ya kuswaswana? Ata yandi vandaka kuzinga na kati ya bantu yina vandaka kusambila nzambi ya luvunu, Moleki, yandi “vandaka kulanda luzolo ya Mfumu Nzambi.” Ee, Ezekiasi “bikaka [Yehowa] ve; yandi landaka bansiku ya Mfumu Nzambi.”​—2 Bantotila 18:1-6.

Ntumwa Polo vandaka muntu yankaka ya kubikalaka ya kwikama na Yehowa. Disolo ya kisalu na yandi yina kele na Masonuku ya Kigreki ya Bukristu kele ti kimbangi ya ngolo yina kemonisa kikesa yina Polo vandaka na yo na kusala kisalu ya Nzambi na ntima ya mvimba. Penepene na nsuka ya luzingu na yandi na ntoto, Polo lendaka kutuba nde: “Mono nwanaka ngolo sambu na kununga na kisalu na mono, mono nwanaka tii na nsuka na yo; mono simbaka mbote lukwikilu na mono.”​—2 Timoteo 4:7.

Ezekiasi ti Polo kele bantu ya kwikama yina kepesa beto bambandu ya mbote kibeni! Bika beto landa lukwikilu na bo na kubikalaka ya kwikama na Nzambi na beto ya Nene, Yehowa.​—Baebreo 13:7.