Masolo ya bansamuni ya kimfumu

Nsangu ya Nzambi memwangana na Namibie

NSANGU ya mbote ya Kimfumu ya Nzambi kukumaka mbala ya ntete na Namibie na nsuka ya bamvu 1920. Banda pana, bantu mingi ya ntima ya masonga kendimaka nsangu ya lugulusu ya Nzambi. Baeksperiansi yai kelanda kemonisa nki mutindu Yehowa ke na kuvukisa bantu yai ya lukumu na kibuka ya mameme na yandi.​—⁠Agai 2:⁠7.

◻ Paulus kele muntu mosi ya kikesa ya kesalaka bilanga. Yandi kezingaka na ndambu ya Nordi-esti ya Namibie. Yandi solulaka mbala ya ntete ti Bambangi ya Yehowa ntangu yandi kwendaka na Windhoek, ntu-mbanza ya Namibie. Ntama mingi ve, Paulus ndimaka na ntima na yandi nde yandi mesengumuna kyeleka. Yandi vutukaka na bwala na yandi ti mukanda Nge lenda zinga mvula na mvula na ntoto yina takituka paladisu. Na nima, ntangu yandi kwendaka na Rundu, mbanza yina kele penepene ti bwala na yandi mpi kisika Nzo ya Kimfumu mosi kele, Paulus kutanaka ti Bambangi mpi yandi bondilaka bo na kwenda kutala yandi.

Kansi, kisika ya yandi vandaka kuzinga vandaka ntama mingi sambu Bambangi kukwenda kulonguka Biblia ti Paulus konso mposo. Paulus kulembaka nitu ve, yandi yantikaka kulonguka Biblia yandi mosi. Na nima, yandi yantikaka kuzabisa bantu yankaka na kikesa yonso mambu ya yandi vandaka kulonguka. Na nima ya ntangu fyoti, bo salaka kimvuka mosi ya fyoti ya kulonguka Biblia. Ntangu kakimvuka yai kuwaka na radio nde Bambangi ya Yehowa tasala lukutakanu na Rundu, bo vukisaka ndambu ya mbongo ya bo vandaka na yo sambu na kubaka kaminio mpi sambu bo kwenda na lukutakanu yina.

Yo vandaka dyambu ya kyese kibeni sambu na bo na kuvukana ti Bambangi ya Yehowa sambu na mbala ya ntete! Ntama mingi ve, bo tindaka bampangi ya kuyela sambu na kutalaka kimvuka yina mbala na mbala. Bubu yai, bansamuni kele sambanu na bwala yina Paulus kezingaka.

◻ Johanna yantikaka kusosa kuzaba zina ya Nzambi ntangu yandi waka muntu mosi ketuba mambu ya mbi sambu na Bambangi ya Yehowa. Yandi keyibuka nde: “Mbala ya ntete kibeni ya mu waka zina ya Yehowa, mu kangaka yo na ntu na munu, mpi mu yantikaka kudiyula nde Yehowa yango kele kibeni nani. Mu vandaka kuzinga ti bakala na munu penepene ya mbanza Walvis Bay yina kele na lweka ya osean na Namibie. Kilumbu mosi, beto kwendaka na mbanza, ebuna mu monaka Bambangi mingi kekabula zulunalu Nzozulu ya Nkengi na balabala. Mu bakaka zulunalu mosi, mpi mu lombaka nde beto yantika kulonguka Biblia sambu mu vandaka ti bangyufula mingi ya kuyula. Mu dilaka ntangu bo zabisaka munu nde mpila ya kukwisa kutala munu tavanda ve sambu kaminio na bo mefwaka. Ntama mingi ve na nima, bakala na munu kufwaka, ebuna mu kwendaka kuzinga na mbanza Keetmanshoop. Bo tindaka mupasudi-nzila mosi ya nene (nsamuni ya ntangu yonso) na bwala yina, ebuna yandi pesaka munu mukanda La vérité qui conduit à la vie éternelle. Kaka na luyantiku mu monaka nde yai kele ndinga ya kyeleka.

“Nsukansuka, bo pesaka munu nswa ya kuyantika kisalu ya kulonga, kansi boma ya bantu vandaka kufwa munu. Na ntangu beto vandaka kulonga nzo na nzo, mu vandaka kusamba nzila-nzila nde mbote Yehowa kubika munu mu fwa na kisika nde mu kwenda kulonga. Ntangu mu salaka mbala ya ntete kimbangi ya balabala, mu kwendaka kubumbana na nzila mosi ya fyoti, ti kivuvu nde ata muntu mosi ve tamona munu. Na nsuka, mu salaka mwa kikesa sambu na kusonga bazulunalu na bantu yina vandaka kuluta, kaka na mwa ntangu yina mu zwaka kikesa fyoti ya kutuba kima. Kilumbu yango, na lusadisu ya Yehowa, mu zabisaka na bantu mwa mingi kivuvu ya mekatuka na Biblia yina mu kele na yo.

“Bubu yai, bamvula 12 na nima, ata mu kele ve na bima mingi ya kinsuni, mu kele kaka na kyese ya kusala kisalu ya kimupasudi-nzila mpi mu kelanda kaka na kumona kyese mingi na kusolula kyeleka ya Kimfumu ti bantu yankaka.”