Ngemba ya Inza: Takatuka Wapi?

KETI kana bo kumisa malongi ya banzo-nkanda ti ya banzo-nzambi yonso na ntoto mutindu mosi, yo tanata ngemba? Dr. Robert Muller keyindula nde yo tanata. Yandi vandaka ntete sekretere generale ya Nations unies ye na 1989, UNESCO pesaka yandi kado sambu na kisalu na yandi ya kulonga ngemba. Zulunalu mosi (The Vancouver Sun) tubaka nde, Dr. Muller “kendimaka mpenza nde bana ya nzo-nkanda yonso na ntoto fwete landa programe kaka mosi ya malongi ti bikalulu ya metadila ntoto, bantu, ti kuyambula bitumba.” Yandi keyindula nde, tavanda ti kilumbu, bimvuka yonso yina kelongaka bana na ntoto talongaka bo nde O.N.U. kele kivuvu ya kuluta mbote sambu na ngemba. Zulunalu yango tubaka nde yandi kekwikilaka mpi nde “mabundu yonso ya inza fwete sala kimvuka mosi bonso O.N.U., bo binga yo nde Kimvuka ya Mabundu.” Na ntangu yina, “mabundu yonso tabanda kulonga bantu na kubikisa bitumba.”

Keti kilumbu kele ya ngemba takuma kima ya kyeleka na ntoto ya mvimba? Yo kele! Kansi yo takatuka ve na kimvuka mosi ya bantu tasala. Bamvula kiteso ya 2700 meluta, na mpema ya Nzambi, nsoniki mosi monisaka nto mosi ya kuluta mbote ya malongi ya ngemba. Yandi bikulaka nde “Yehowa muntu talonga” bantu ya ntima ya mbote, mpi ngemba na bo tavanda “mingi.”​—⁠Yezaya 54:​13, NW.

Biblia ketuba nde Nzambi kele muntu ya ‘ke pesaka ngemba.’ (Roma 16:20) Awa ya beto ketuba, programe mosi ya mbote ya kulonga ngemba kele na kusalama na ntoto ya mvimba. Yehowa kelonga bantu na yandi na ‘kusosa ngemba ti kulanda yo,’ na ‘kukumisa bambele na bo ya bitumba bansengo,’ mpi na ‘kuyilama diaka ve sambu na kunwana bitumba.’​—⁠1 Piere 3:11; Yezaya 2:​2-4.

Nzambi kendimaka mpi kesakumunaka kaka lusambu yina kesalamaka na kyeleka, yina kele na bumfarizi ve, luvunu mpi ve. (Matayo 15:​7-9; Yoane 4:​23, 24) Lusambu ya lenda basisa bantu ya kezingaka na ngemba, na bumosi, mpi ya kezolanaka mpenza bo na bo, kele kaka lusambu ya kyeleka, yina kewakanaka mbotembote ti Ndinga ya Nzambi.​—⁠Yoane 13:⁠35.

Sambu na kuzaba mambu mingi ya Ndinga ya Nzambi ketuba sambu na ngemba, beto kelomba nge na kusonikila bantu yina kebasisaka zulunalu yai.

[Lupangu ya kele na lutiti 32]

KETI NGE TAZOLA MVUTUKILU MOSI?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, République démocratique du Congo, to na mosi na adresi mebonga na nge yina kele na lutiti 2.