Masonga: Kekwisaka Yau Mosi to Muntu Kesolaka?
AUTOLYCUS, muntu mosi ya kukonda masonga na nkenda mosi ya William Shakespeare (The Winter’s Tale) tubaka nde: “Ata mono kevandaka ve ti kikalulu ya kutuba masonga, ntangu yankaka yau kekwisilika mono yau mosi.” Yau kemonisa kikalulu mosi ya mbi yina kele ti bantu—kikalulu ya kusala mambi, yina kekatukaka na ‘ntima ya luvunu.’ (Yeremia 17:9; Nkunga 51:5; Roma 5:12) Keti yau kesonga nde na dyambu yai muntu kele ti kiyeka ya kusola ve? Keti bikalulu ya kutoma kekwisaka kaka yau mosi? Ata fyoti ve!
Ntangu bana Izraele vandaka mesala ka na nseke ya Moabi, na ntwala ya kukota na Ntoto ya Lusilu, Moize tubaka na bau. Yandi monisaka bau mambu zole ya pwelele ya kusola: kulemfuka na bansiku ya Nzambi sambu na kubaka lusakumunu na yandi, to kubuya yau sambu na kumona malanda ya mbi ya masumu. (Kulonga 30:15-20) Nsola vandaka ya bau mosi.
Bonso bantu yina kele ti kimpwanza ya nsola, beto mpi kele ti dyambu ya kusola. Kele ti muntu mosi ve—katula mpi Nzambi—ya kepusaka beto na kusala mambu ya mbote to mambu ya mbi. Kansi, mbala yankaka, bankaka tayula nde, ‘Kana ntima na beto kebutukaka ti nzala ya kusala mbi, inki mutindu beto lenda sala mambu ya mbote?’ Munganga ya meno ketalaka meno mbotembote sambu na kusengumuna kisika meno meyantika kupola na ntwala yau kuma bisika yonso. Mutindu mosi, beto fwete fimpa ntima na beto ya kifwani sambu na kusosa bifu to bikalulu ya kupola. Sambu na inki? Sambu Yezu tubaka nde: “Mabanza ya mbi yina ke basikaka na ntima ya muntu yo yina ke bendaka yandi na kufwa bantu, na kusala pite, na kusala mambu ya nsoni, na kuyiba, na kutuba luvunu ti na kuvwenza bantu ya nkaka.”—Matayo 15:18-20.
Sambu na kutanina dinu, munganga ketumunaka kisika yonso ya kupola ya yandi memona. Mutindu mosi, yau kelombaka nzengolo ya ngolo sambu na kusukula “mabanza ya mbi” ti bampusa ya mbi yina kele na ntima. Na kutangaka mpi na kuyindulaka na Ndinga ya Nzambi, Biblia, beto kezabaka kaka banzila ya Ngangi mpamba ve, kansi beto kelongukaka mpi kusala mambu ya kusungama.—Yezaya 48:17.
Sambu na kununga na kusala mambu ya kusungama, Davidi, Ntotila ya Izraele, sosaka lusadisu yankaka ya mfunu. Yandi sambaka nde: “Nzambi, yingisa mono ntima ya mpembe, yidika yo, yo kuma ya mpa ti ya kikesa.” (Nkunga 51:12 [51:10, NW]) Na kutulaka ntima na Yehowa Nzambi na nsadisa ya kisambu, beto mpi lenda nunga ngolo ya mbi yina ketindaka beto na kusala mambi mpi kukuna “ntima ya mpembe” sambu na kusala mambote. Na mutindu yai, beto takinga ve nde masonga kukwisa yau mosi. Yau tavanda dyambu ya kusola.
[Kifwanisu ya kele na lutiti 19]
Mutindu yau salamaka na Davidi, kusamba Yehowa lenda sadisa beto sambu na kusala mambote