Sambu na Inki Nsungi Yai Kele ya Kuluta Mbi?

NTANGU ya nge kefongaka sambu na kutanga zulunalu to na kutala bansangu na TV to kulanda bansangu na radio, nge kevingilaka kuwa bansangu yankaka ya mbi, keti buna ve? Nge keyitukaka ve mbala yankaka na kuwa nde mvita ya kele na kusalama kelanda kaka kuluma, nde kufwa ya nku kekuma kaka mingi, to nde nzala kelembisa ngolo ya ntoto ya kesosa kutoma.

Kana nge kezingaka ntama ti kisika mambu yai kebwa, mbala yankaka nge kewaka ve mpasi ya mingi na balapolo ya mutindu yina. Na kutuba ya mbote, nani lenda kuka kuwila bantu yina yonso ya kemona mpasi mawa? Ata mpidina, yau kele mpasi mingi na kukanga ntima kana beto kele na ntwala ya mutindu mpasi kesimba bantu. Na mutindu yankaka ya kutuba, kutanga nsangu ya mvita to kuyindula ntalu ya bantu ya mefwa kele kima mosi; kansi kutanga nsangu ya Adnan, kamwana ya bakala ya mvula uvwa ya Bosnie yina fwilaka mama ntangu bombi kufwaka nzo na bau, kele kima yankaka kibeni. Na nima ya bangonda, ntangu bau vandaka kutambula ti tata na yandi na balabala, muntu mosi ya kubumbana kubulaka tata na yandi masasi. Kaka bamposo fyoti na nima, mpangi na yandi ya nkento basikaka menga mpi fwaka na meso na yandi, sambu na grenade ya losamaka na lupangu ya nzo-nkanda na bau. Minganga yina sansaka Adnan sambu na maladi ya boma ya mingi na ntima kumonaka nde kamwana bakala yina vandaka bonso ya kufwa, ya kukonda mawi yonso​—⁠ata ngindu ya kusosa kuzaba konso kima. Boma ti kubambuka mambu vandaka kupesa yandi kyadi bantangu yandi vandaka ketala; bandosi ya mbi vandaka kumanisa yandi mpongi. Yandi kele mwana ya kemona mpasi; beto fwete wila yandi mawa.

Yau kele mutindu mosi mpi sambu na bimbefu yankaka ya inza. Kutanga bansangu ya nzala kele kima mosi; kansi kumona foto ya mwana ya nkento ya mvula tanu ti kadivumu ya kuvimba ti tumakulu mpi tumaboko ya kukonda, muntu ya kezinga na mpasi sambu na nzala, kele kima yankaka mpenza. Kutanga bansangu ya bantalu ya kugonda kele kima mosi; kansi kuwa nde bau bulaka, yibaka mpi ladisaka na kingolongolo mununu ya mufwidi mosi, kele kima yankaka kibeni. Kutanga bansangu ya kubwa ya dibuta kele kima mosi; kansi kuwa nde mama mosi bikaka mwana na yandi nzala na luzolo yonso mpi monisaka yandi mpasi na ntima ya mbi kibeni, kele kima yankaka kebeni.

Yau kele mpasi mingi na kutanga mambu ya mutindu yina. Kansi, yau kele mpasi mingi kuluta ntangu bampasi yai yonso kebwila beto kibeni! Ntangu nge mosi kemonaka mpasi, kimvuka na yau yonso ya bansangu ya inza kemonisa lenda kulutisa ndilu. Yau kepesaka boma mingi na kumonaka dyambu yai nde mpasi ya kekwisa na kugonda, mvita, nzala, mpi kimbefo kele na kuyela na kiteso ya mekondaka kusalama na nkenda ya bantu. Ya kyeleka, malanda ya kutadila mambu ya mvu-nkama yai ya 20 lenda kuvanda mingi​—⁠kisakasaka, boma, mpi kunyokwama ya mabanza yina kekumina bantu yonso.

Bantu ya mabundu mingi kesosa bamvutu na bangyufula ya mpasi ya mutindu yai, Sambu na inki mambu kele ya kuluta mbi? Bantu kele na kukwenda wapi?

Na mawa yonso, mbala mingi ve bubu yai mabundu kepesa bamvutu ya keyangidika. Ntangu nge monaka ntete ngyufula yango na lutiti ya zulu ya zulunalu yai, nge lendaka kundima yau ti ketiketi​—⁠mvutu mosi ya kubakisama. Mabundu ya Misioni kemekaka mbala mingi kubasisa na kingolongolo na Biblia mambu ya kele na kati na yau ve ata fyoti​—⁠kilumbu kibeni ti ntangu ya lufwa ya inza. (Matayo 24:36) Bambasisi ya zulunalu yai kezola kubikisa Biblia yau mosi kutendula. Nge lenda kuyituka na kuzaba nde masolo ya Biblia ya bilumbu ya nsuka kele ya kyeleka mpi ya mayele. Mpi Biblia kesuka ve na kutendula kaka kikuma mambu kele ya kuluta mbi. Yau kepesa mpi kivuvu sambu na makwisa, dyambu mosi ya kelembika. Beto kelomba nge na kutadila masolo ya kelanda sambu na kumona inki mutindu yau kele buna.