Ndembikilu Na Nsungi Ya Bamvula Iya Ya Mvita

NA NSUNGI ya bamvula iya ya mvita na teritware ya Yougoslavie ya ntama, bantu mingi monaka bampasi mpi kondaka mpenza bima mingi. Na kati na bau kuvandaka ti mafunda ya Bambangi ya Yehowa, yina kelanda na kusambila “Nzambi ya ndembikilu yonso” na kwikama.—2 Korinto 1:3, NW.

Na Sarajevo, bantu kumonaka mpasi ya ngika ya kuzinga na mbanza ya nene yina vandaka ya kuzyungama na basoda na ntangu yonso ya mvita. Kura, masa, nkuni, ti madya kuvandaka ve. Inki mutindu Dibundu ya Bambangi ya Yehowa ya Sarajevo tambulaka na nsungi yai ya bamvwandilu ya kuluta mpasi? Bakristu ya bansi ya mfinama tulaka luzingu na bau na kigonsa sambu na kunata lusadisu ya bima mingi. (Tala Nzozulu ya Nkengi [ya Kifalansa] ya Novembri 1, 1994, balutiti 23-7.) Dyaka, bampangi na kati ya Sarajevo kabulaka yina bau vandaka na yau ti bankaka, na kutulaka mbalu ya kuluta mingi na kukabula bima ya kimpeve. Na ntangu ya kuzyungama yina, nkengi Mukristu mosi salaka lapolo yai:

“Beto kepesaka mbalu mingi na balukutakanu na beto. Nkento na mono ti mono, kumosi ti bantu yankaka 30, ketambulaka bakilometere 15 konso mbala sambu na kukwenda na balukutakanu. Bantangu yankaka nsangu vandaka kupesama nde masa tapesama na tangu yina balukutakanu vandaka kusalama. Inki Bampangi zolaka kusala? Keti bau zolaka bikala na banzo to bau zolaka kukwenda na balukutakanu? Bampangi na beto vandaka sola kukwenda na balukutakanu. Ntangu yonso, bampangi kesadisana; konso kima yina bau kevandaka na yau, bau kekabulaka. Mpangi-nkento mosi ya dibundu na beto kezingaka na ndilu ya mbanza, penepene na mfinda; yau yina yau kele mwa petepete sambu na yandi na kuzwa ndambu ya bankuni. Yandi kesalaka mpi na nzo ya mampa, mpi lufutu na yandi kevandaka fufu. Na ntangu mpila kele, yandi keyokaka mampa mingi mpi kenataka yau na lukutakanu. Na nima ya lukutakanu, na kubasika, yandi kepesaka konso muntu kitini mosi.

“Yau kele mfunu nde ata muntu mosi ve na kati ya bampangi-babakala to bampangi-bankento kekudiwaka ya kuyambulama. Muntu mosi ve kezabaka nani na kati na beto tavanda na nima ti mfunu ya lusadisu na mvwandilu mosi ya mpasi. Ntangu beto vandaka na nsungi ya madidi, mpangi-nkento mosi vandaka ya kubela, bampangi-babakala ya baleke mpi ya ngolo nataka yandi na balukutakanu na zulu ya pusupusu.

“Beto yonso kevukanaka na kisalu ya kusamuna, mpi Yehowa mesakumuna bikesa na beto. Yandi memona mvwandilu na beto ya mpasi na Bosnie, kansi yandi mesakumuna beto ti kuyela​—kuyela ya beto monaka ve na ntwala ya mvita.”

Mutindu mosi, na bisika yankaka yina mepanzanaka na mvita na Yougoslavie ya ntama, Bambangi ya Yehowa mesepelaka na kuyela ata na kati ya bampasi ya ngolo. Lapolo yai ya metala kibuka mosi ya Bambangi mekatuka na biro ya Bambangi ya Yehowa ya Croatie: “Bampangi yina kezingaka na Velika Kladuša kumonaka mpasi mingi kibeni. Mbala mingi mbanza vandaka kunwanisama. Yau vandaka kulomba nde bampangi kutendula bukatikati na bau na minkangu ya mutindu na mutindu ya Croatie, Serbie, ti ya Musulman. Na ntembe ve, yau lombamaka nde bau kuvibidila mambu mingi—kutulama na boloko, kubulama, nzala, kigonsa ya lufwa. Ata mpila yina, bau yonso sikilaka ya kwikama mpi bau kele na dibaku ya kuluta mbote ya kumona lusakumunu ya Yehowa na bisalu na bau.”

Ata bampasi yai kele, Bambangi ya Yehowa na Velika Kladuša ti ya mfinama ya Bihać kelanda na kusepela ti kuyela mutindu bau kekabula nsangu ya ndembikilu ya Nzambi ti bamfinangani na bau. Kimvuka ya bansamuni ya Kimfumu 26 ya bisika yai zole kele na kutambwisa kulonguka ya Biblia 39 na banzo!