Zulunalu Mosi ya Kesimbaka Ntima

BAZULUNALU mingi kebasisama na inza ya mvimba sambu na kumanisa nzala ya batangi ya kuzaba nsangu to ya kuzwa luyangidilu.

Inki keswaswanisa zulunalu yai na maboko na nge? Mukanda yai, ya biro ya filiale ya la Société Watch Tower ya Allemagne kuyambaka, lenda kupesa mvutu:

“Matondo mingi, bampangi ya zolwa, sambu na kikesa mpi kisalu na beno. Ntangu bana na mono zole ya babakala ti mono katukaka na lukutakanu, ata nkutu yau vandaka 9:30 ya mpimpa, mono vandaka kuwidikila kaka nimero ya mpa ya Nzozulu ya Nkengi [na kaseti]. Ntangu mono vandaka kuyobisa malonga, mono bandaka kuwidikila disolo ya tatu ya kulonguka (Aprili 1, 1995). Mono waka nde mono fwete widikila yau dyaka, ebuna mono kangisaka kisalu na mono na kikuku mpi mono tangaka disolo yango [“Nge Kele Mfunu Mingi na Meso ya Nzambi!”] na Nzozulu ya Nkengi na kulandaka kaseti. Yau simbaka ntima na mono, mingimingi paragrafe ya iya ti ya tanu. Na nima mansanga bandaka kubasika​—kansi ntangu mingi ve. Mono kele na ntonda mingi na Yehowa na mpila mono kezinga mpi kele na kati ya bantu na yandi mpi sambu mono, kumosi ti bantu yankaka mingi, lenda zabisa zina na yandi. Kele ve mpenza ti kikuma ya kudiwa ya kukonda mfunu. Mpeve ya Yehowa kele ti bantu na yandi. Bika beto yonso kuvibidila mpi kubikala ngwi na kati ya lukwikilu, na bumosi. Ti zola ya Bukristu, mpangi na beno ya nkento na lukwikilu.”

Nzozulu ya Nkengi kepesaka ve bansangu mpamba. Yau kesimbaka ntima ya batangi na yau mpi kemanisaka nzala na bau ya madya ya kimpeve ti ya kikesa na ntangu ya mbote. Ee, Nzozulu ya Nkengi kepesaka “madya na ntangu ya mbote.”​—Matayo 24:​45, NW.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P.634 Limete, Kinshasa, Zaïre, to na mosi na adresi mebonga na nge yina kele na lutiti 2.