Masolo ya Mvula ya Ngolo Kesimbaka Masolo ya Biblia

MVULA ya Ngolo na ntoto ya mvimba ya bilumbu ya Noa kele dyambu ya kyeleka. Mitindu mingi ya kuta nkenda yango kemonana na masapu ya munoko ya basivilizasio mingi na kati ya inza ya mvimba. Na Tchad, insi mosi ya Afrika, kikanda ya Moussaye ketendula Mvula ya Ngolo na mutindu yai:

‘Kuvandaka ti ntangu mosi, na kisika mosi ya ntama, dibuta mosi vandaka zinga kuna. Kilumbu mosi, mama ya dibuta zolaka kulamba madya mosi ya ntomo sambu na dibuta na yandi. Ebuna, yandi bakaka kibuka na yandi ti nti sambu na kututa mpondo. Na ntangu yina, zulu vandaka ntama ve mutindu yau kele bubu yai. Na kutuba ya mbote, kana nge nangula diboko na nge, nge lendaka kusimba yau. Yandi vandaka kututa mpondo ti ngolo na yandi yonso, mpi ntama mingi ve mpondo kumaka fufu. Kansi, na ntangu yandi vandaka kututa, na kidiba nkento nangula nti ya kibuka mingi, ye yandi tobulaka zulu. Na mbala mosi masa yantikaka kunoka mingi kibeni na zulu ya ntoto. Yau vandaka mvula bonso ya bilumbu yonso ve. Mvula nokaka mwini nsambwadi mpimpa mpi nsambwadi tii kuna ntoto yonso kudindaka na masa. Na ntangu mvula vandaka kunoka, zulu yantikaka kunanguka tii yau kwendaka kusuka kisika yau kele bubu yai​—na zulu kiteso ya muntu lenda kuma ve. Nkuba ya inki mutindu sambu na bantu! Kubanda ntangu yina, beto mevidisaka dibaku ya kusimba zulu ti maboko na beto.’

Na dikebi yonso, bankenda ya ntama yina ketubilaka mvula ya ngolo lenda monana na bisika yonso na inza ya mvimba. Basivilizasio ya ntama ya ba Amerika ti bantu ya ntama ya Australie kele yau yonso ti bankenda ya metadila yau. Mutindu ya kuta yau lenda swaswana, kansi mingi na kati ya bankenda yango kele na ngindu mosi nde ntoto fulukaka na masa ye ndambu fyoti mpamba ya bantu kugulukaka na kima mosi ya muntu kusalaka. Kumonana ya ntu-dyambu yai bisika yonso na ntoto kesimba dyambu yai nde Mvula ya Ngolo kunokaka, mutindu yau mesonama na Biblia.—Kuyantika 7:​11-20.