“Mono Kele Mfunu Mingi na Meso ya Yehowa!”

NA “BILUMBU yai ya mpasi mingi,” bansadi mingi ya kwikama ya Yehowa kele na kuvibidila ndwana ya ngolo ti mawi ya kudiwa ya kukonda mfunu. (2 Timoteo 3:⁠1) Yau kele mambu ya kuyituka ve, sambu mosi na kati ya “mayele ya imbi” ya Satana kele kunata beto na kudiwa nde beto kele ya kuzolama ve, ata nkutu na Ngangi na beto! (Efezo 6:​11, NW, noti na nsi ya lutiti) Na mutindu ya kufwana, na nimero ya Aprili 1, 1995, ya Nzozulu ya Nkengi, kuvandaka ti masolo zole ya kulonguka na dibundu yina vandaka na bantu-dyambu: “Nge Kele Mfunu Mingi na Meso ya Nzambi!” mpi “Inki Mutindu Kupusana na Zola mpi na Bisalu ya Mbote?” Masolo yai kubasisamaka na lukanu ya kuyibusa beto nde Yehowa kepesaka mbalu na bikesa na beto. Mambu yai ya kelanda kele bakomantere ya lumonisu ya ntonda ya kuzwamaka:

“Mbala mosi ve na bamvula 27 ya mono mesala bonso Mbangi ya Yehowa, zulunalu mosi mebulaka mono na ntima mutindu yai. Yau kulombaka kaka nde mono kudila​—masolo yai kunatilaka mono ndembikilu ya mingi. Ntangu yai mono kekudiwa ya kuzolama na Yehowa. Yau kele kaka bonso bau mekatula mono kizitu ya nene na zulu ya mapeka.”​—C. H.

“Mono kutangaka zulunalu yai mbala iya na kilumbu mosi. Mono kusepelaka na mutindu ya disolo kutubaka nde bau longaka nge luvunu kana nge keyindulaka nde nge kele na mfunu ve. Mono tasadila disolo yai sambu na kisalu ya kugungula mpi kusamuna nzo na nzo.”​—M. P.

“Satana menungaka mbotembote na kundimisa bantu, ti bayina mpi ya kezolaka Yehowa nde bau kevandaka na mfunu ve mpi kezolamaka ve. Ngibusa ya ‘mpika ya kwikama’ yai nde Yehowa kezolaka beto ngolo mpi nde yandi kendimaka bima ya fyoti ya beto kesalaka sambu na yandi kele kima ya kuluta kusyamisa ya beto metanga. Na bamvula mingi, mono vandaka na mawi ya beno metubila na bamasolo yai. Mono mekudiwaka ve ya kufwana na kuzolama na Yehowa, yau yina mono kumekaka na kusala ngolo kibeni na kisalu na yandi sambu yandi kuzola mono. Kansi kima ya vandaka kupusa mono kele mawi ya kubaka dikambu ti nsoni. Yau yina, ata mono vandaka kusala bangunga ikwa na kisalu ya kusamuna, to mono vandaka kusadisa bantu ikwa, mono vandaka kumona kaka nde yau vandaka ya kufwana ve. Mono vandaka kumona kaka nde kima vandaka kukondana. Ntangu yai ya mono kesadila Yehowa ya kupusama na zola, mono keyindula nde yandi kemweta mpi kewa kyese sambu na mono. Mambu yai kepusa zola na mono na kukuma dyaka mingi kuluta mpi kepusa mono na kusala mingi. Ntangu yai mono kemona kyese ya kutuba ve na kisalu na mono sambu na Yehowa.”​—R. M.

“Yai kele masolo ya kuluta kitoko, ya kuluta kutunga, ee, ya kufwana kibeni sambu na kusimba ntima na beto ya mono metangaka ntete ve! Mono ketangaka Nzozulu ya Nkengi kubanda bamvula 55, mpi masolo ya kitoko mebasikaka mingi. Kansi disolo yai kuluta kima yina yonso ya beto mevandaka na yau sambu na kukatula boma ya kudyengana mbundu mpi kubanga nde beto kele ‘na mfunu ve’ mpi ya ‘kuzolama ve’ mpi beto lenda kusala mingi ve na ‘kuzwa’ zola ya Yehowa. Nzozulu ya Nkengi yai kele ti lusadisu ya kimpeve yina ya bampangi na beto kele na yau mfunu. Lukanu na mono kele ya kusadila masolo yai mbala na mbala na kisalu ya kugungula.”​—F. K.

“Sambu na bayina na kati na beto ya kele ti mawi ya kukonda kudindima, to nkutu ti mawi ya kudiyina, yau lenda kuvanda mpasi na kuvanda na ngolo ya kusikila na kyeleka. Disolo yai kumonisaka nkenda ti mbakisa mosi ya mudindu, yau kuvandaka bonso kupakula ndambu ya vicks yina kelembikaka, yina kebelulaka, na zulu ya ntima kibeni. Ndembikilu ya inki mutindu na kutanga bangogo ya mutindu yina na Nzozulu ya Nkengi mpi kuzaba nkatu mbefula nde Yehowa kubakisaka beto mpenza! Matondo mingi na kuyibusa beto nde Yehowa kepusaka ve bansadi na yandi na nsadisa ya mawi ya kubaka dikambu, nsoni, to kubanga. Ata nkutu kisalu na mono ya kusamuna kuvandaka ya kukita mingi bilumbu ya meluta sambu na mambu ya mbongo mpi ya mavimpi yina kele na dibuta na beto, mono kele na kuyangalala kaka na yina ya mono kelunga na kusala. Mono kemona kaka kyese mingi na kisalu na mono kana mono mebikisa zola kuvanda ngolo yina ketinda mono.”​—D. M.

“Mono mekatuka kumanisa kutanga disolo ‘Nge Kele Mfunu Mingi na Meso ya Nzambi!’ Konso paragrafe vandaka kubasisa mono mansanga na meso. Mono basikaka na dibuta mosi yina vandaka kumonisa zola ya mingi ve. Bau vandaka kukitisa mono, kudidisa mono, kuseka mono. Yau yina tuka kileke, mono bandaka kudiwa ya kukonda mfunu. Mono kele tii bubu yai na mawi ya kuyambulama yina ya mono bakaka tuka kileki na mono, mawi ya kenyokulaka mono ntangu mono kekutanaka na bampasi. Ntangu mono kubikisaka kusala bonso nkuluntu ya dibundu, mono kudiwaka, mutindu yau kele kikalulu na mono, ya kukonda kununga​—na meso ya Nzambi, ya dibuta na mono, mpi ya bampangi na mono na kati ya dibundu. Mawi yango yai kekatukaka ve nswalunswalu, kansi disolo yai na ntangu ya mbote mesadisa mono na kuvanda dyaka na mwa bukatikati. Yau metemuna mboninu na mono.”​—D. L.

“Matondo mingi sambu na disolo ‘Nge Kele Mfunu Mingi na Meso ya Nzambi!’ Mono kenwanaka ti mawi ya kudiyina mpi ya kukonda mfunu, yina mekunamaka tuka kimwana mosi ya mpasi. Yau mefwana mpenza na kutadila mabanza ya imbi yai bonso mayele ya imbi ya satana. Yau lenda mpi nkutu kufwa luzolo ya muntu ya kuzinga. Konso kilumbu mono fwete kusala ngolo sambu na kununga luvunu ya kele nde mono kele ya kuzolama ve. Disolo yai ketendula bima mingi na mono yina beno lenda kubakisa ve.”​—C. F.

“Bubu yai bampangi mingi mekuma kundima dibanza yai nde Yehowa kendimaka bisalu na beto yina mepusama na zola kansi yina ya bau ketindikaka muntu ve. Kutadila kimuntu ya Yehowa ya tiya mpi ya zola, dikebi na yandi na bansadi na yandi bonso bantu, mpi mutindu ya yandi kekudikangulaka kepesa mpenza ndembikilu mpi kikesa. Sambu na mambu yai, kaka ntangu ya beto kuzwaka disolo ‘Nge Kele Mfunu Mingi na Meso ya Nzambi!’ bantu mingi kumonisaka ntonda. Yau kemonana nde yau takangula nzila sambu na bantu mingi na kuyedisa kinduku na bau ti Yehowa. Nkento na mono ti mono, beto kezola kumonisa matondo na beto sambu na nsonikilu mpi dikebi na mawi na beto ya memonika na bazulunalu Nzozulu ya Nkengi ya mekatuka kubasika. Beto kele na kusala ngolo sambu na kusadila mpenza bandongisila yai ntangu ya beto ketala mabundu.”​—Nkengi ntambudi mosi.

“Mono kevandaka mutangi ya kwikama na bamvula kiteso ya 30, kansi mono metangaka ntete ve kima ya kepemisa, ya ketunga ya mutindu yai. Mukapu ya ngolo, ya kusolama mbotembote mesadisa mono na kukatula bansimbulu ya luvunu yina kuvandaka na mawi na mono, na kupesaka mono nzila na kufinama na Yehowa. Na bamvula mingi, kele mawi ya kubaka dikambu vandaka kupusa mono na kusadila Yehowa. Mono vandaka kuzaba dilongi ya nkudulu ti zola ya Nzambi kaka na ngangu mpamba. Matondo mingi sambu na disolo ya mutindu yai ya kufuluka na mayele mpi na mabanza ya mbote. Mono kele na kivuvu ya kutanga masolo ya nkaka mingi ya kitoko bonso yau.”​—M. S.

“Na bamvula yonso 29 ya mono mesala na kyeleka, mono keyibuka ve, inki kilumbu disolo kuvumbulaka na ntima na mono ntonda mpi mawi ya mutindu yai. Ata mono kuyelaka na kati ya zola ya mingi mpi na dibuta ya mbote, mono mekudiwaka ntete ve ya kufwana na kuvanda na luzingu, nkatu kutubila kuvanda ya kufwana na kusadila Yehowa. Na nima ya disolo yai, mono kufukamaka, mpi mono kutondaka Yehowa ti mansanga ya mingi. Mono tazolaka disolo yai kimakulu. Mono takuditalaka na mutindu ya nkaka sambu ntangu yai mono kele na mbakisa nde mono kele na mfunu mingi na meso ya Yehowa.”​—D. B.