Keti Nge Tavanda Na Lukutakanu Ya Distrike?

“Beto Kembila Nzambi Na Kyese”

KYESE! Keti ngogo yai kemonika ya mpa na nge, to ya nzenza, na ntangu yai ya mpasi? Ya kyeleka, bazulunalu kepesaka ve bikuma mingi ya kyese. Bitumba na kati ya makanda, nzala na bifulu mingi, kukonda kisalu, bigonsa ya kubeba ya ntoto ti mupepe, kukonda luyalu ya mbote, kugonda bantu​—⁠yai kele bima ya lenda kufulusa ve ntima ti kyese, keti buna ve?

Bantu mingi bubu yai kebwila konso mwa luyangalalu ya bau lenda kumona na luzingu. Kansi kyese? Kyese kutendulamaka bonso “nkadilu ya kuyangalala; ya kufuluka na kyese.” Bantu mingi ve kemonaka kyese ya mutindu yina, mpi kana bau kumona yau, mbala mingi yau kevandaka sambu na ntangu fyoti.

Kansi, na kutalaka bilumbu na beto, Biblia yitaka kutuba nde: ‘Yai kele mambu ya Nkwa Kimfumu Yehowa metuba: “Tala! Bansadi na mono tawa kyese. Tala! Bansadi na mono tatula milolo ya kyese sambu na mvwandilu ya mbote ya ntima.” ’ (Yezaya 65:​13, 14, NW) Inki mutindu yau lenda kusalama?

Na kuzwa mvutu, beto mebinga nge na kukwisa na mosi ya balukutakanu ya distrike ya Bambangi ya Yehowa tasala na 1995. Ntu-dyambu ya balukutakanu yina kele “Beto Kembila Yehowa na Kyese,” mpi bantu yonso lenda kukwisa nkatu kufuta ata kima. Na manaka ya lukutakanu yina ya bilumbu tatu, tavanda ti masolo ya kele na lufulu na Biblia, bansonga, kutubana, mpi mambu ya nkaka. Na kulandaka manaka ya mvimba, ntendula ya pwelele tapesama na ntu-dyambu ya kyese.

Balukutakanu tabanda na Etats-Unis na Yuni ye talanda kusalama na bambanza ya nkaka na nza ya mvimba tii na luyantiku ya mvu 1996. Ziku, mosi tasalama na nzyunga na nge. Sambu na inki kuyufula ve Bambangi ya Yehowa ya kezingaka penepene na nge? Beto mebinga nge na kyese yonso na kuvanda pana.