Masolo Ya Bansamuni Ya Kimfumu

Nsangu ya Mbote ya Kimfumu Tasamunama

KUBANDA bamvunkama mingi, mbeni ya ntete ya Nzambi, Satana Dyabulu, mesadilaka na mayele ya mbi baluyalu ya politike ti lusambu ya luvunu na bikesa na yandi sambu na kutula lukakilu na kuyalumuka ya Bukristu ya kyeleka. Kansi bansadilu na yandi tanunga ve. Yezu kuyitaka kutuba nde “nsangu ya mbote ya kimfumu tasamunama [yau metubama ve nde “yau lunga kusamunama” to, “yau talenda kusamunama”] na ntoto ya mvimba bonso kimbangi na mabuta yonso, ebuna nsuka takwisa.”​—⁠Matayo 24:​14,  NW.

Kukonda kununga ya Satana kumonanaka pwelele na Grèce. Na bwala yina, dibundu ya Orthodoxe mekaka na kutula nkandikilu na kisalu ya kusamuna nsangu ya mbote ya Kimfumu. Kansi, bonso yau memonisama pwelele na disolo yai melanda, na nsuka kyeleka ya Biblia kusimbaka ntima ya bantu ya masonga ata nkutu luyinu kuvandaka.

Penepene na bamvula 30 kulutaka, nganga-nzambi mosi ya dibundu ya Orthodoxe ya Grèce kundimaka nsangu ya mbote mpi nkutu yandi kumonisaka mpwisa ya kukuma mosi na kati ya Bambangi ya Yehowa. Kansi, dibuta na yandi kubasisaka luyinu ya ngolo na nsola na yandi mpi kupusaka yandi na kuyambula kuvukana ti Bambangi. Sambu na kuyangidika dibuta na yandi, yandi landaka kisalu na yandi ya kinganga-nzambi; kansi, yandi vandaka kundima ntangu yonso nde Bambangi ya Yehowa kusadisaka yandi na kulonguka kyeleka mpi nde yandi kuyambulaka kyeleka yango sambu na kulunda kisika ya lukumu na kati ya dibundu ya luvunu.

Ata mpila yina, ntangu mabaku vandaka kumonana, yandi vandaka kukotila mbala ya nkaka Bambangi ya Yehowa. Na mabaku mingi, yandi vandaka kusyamisa bantu nde kana bau kezola kulonguka bakyeleka ya Biblia, bau fwete kulonguka na Bambangi ya Yehowa. Na nima ya bamvula, bankaka kulandaka mpenza nsyamisa na yandi.

Na bilumbu mekatuka kuluta, nganga-nzambi yango kubelaka ngolo mpi yandi kudindimisaka nde kubika fyoti yandi tafwa. Ntangu yandi vandaka na lupitalu, yandi kubingisaka bana na yandi, mpi bau yonso kuvukanaka penepene na yandi.a Na nima, yandi kutendudilaka bau nde kana yandi kufwa, bau talenda kukutana na yandi dyaka. Yandi kutubilaka bau nde Biblia kelongaka nde Yehowa tafutumuna bantu sambu nde bau kuzinga na paladisu awa na ntoto, kansi kana bau kezola kumona ndungisa ya mambu yina yonso, bau fwete kulonguka kyeleka na kati ya Biblia mpi kukatuka na dibundu ya luvunu. Yandi kudodokilaka bau na kuvukana ti Bambangi ya Yehowa mpi kulonguka kuna na bau inki mutindu kukuma mukristu ya kyeleka.

Mwa ntangu fyoti na nima, nganga-nzambi yango kufwaka. Kansi, ndongisila na yandi ya nkabwana na bana na yandi kubutaka mbutu ya kitoko. Mwana na yandi ya nkento, kiteso mosi ti bamambere mingi ya dibuta na yandi vandaka kuyina mpenza Bambangi ya Yehowa ti kisalu na bau. Kansi, yandi lendaka ve kuvila dodokilu ya masonga ya tata na yandi ya vandaka kulakana, yau yina yandi kwendaka nswalunswalu kukutana ti Bambangi ya Yehowa mpi yandi yantikaka kulonguka Biblia. Ntama mingi ve, yandi mosi kukumaka Mbangi, kupesaka luzingu na yandi na Yehowa Nzambi mpi kumonisaka kudipesa na yandi na mbotika ya masa.

Na Grèce, kiteso mosi ti na bansi 230 ya nkaka, Bambangi ya Yehowa ketulaka ntima na ngolo ya mpeve santu ya Nzambi. Kele na lusadisu mpenza ya mpeve santu ya bau kevukanaka na ndungisa ya mbikundulu ya Yezu yai: “Beno tabaka ngolo ntangu mpeve santu takwisa na zulu na beno, ye beno tavanda bambangi na mono na kati ya Yeruzalemi mpi na kati ya Yudea yonso mpi na Samaria mpi tii na nsuka ya ntoto.”​—⁠Bisalu 1:​8, NW.

[Footnote]

[Caption on page 1]

[Footnote]