Masolo Ya Bansamuni Ya Kimfumu

Yehowa Kele Ngolo Kuluta Bambeni na Yandi

DYABULU ti bampeve na yandi ya mbi kesosaka ntangu yonso kukanga nzila na kisalu ya kusamuna nsangu ya mbote na nsadisa ya lusambu ya luvunu mpi ya lusambu ya bampeve ya mbi. Biblia ketubila lukanu ya mbi ya Satana na 2 Korinto 4:4 kisika yau ketuba nde: “nzambi ya ngidika ya bima yai mefwaka meso ya mabanza ya bantu ya kukonda lukwikilu, sambu nde nsemo ya nkembo ya nsangu ya mbote na yina metala Kristu, yina kele kifwanisu ya Nzambi, kutemuna bau ve, NW.”

Kansi Yehowa Nzambi kele ngolo kuluta Satana. Kele na kima ata mosi ve yina bambeni ya Yehowa lenda kusala sambu na kukandikila ndungisa ya luzolo ya Nzambi, yina kele nde “bantu ya mitindu yonso kugulusama mpi kubaka nzayilu ya kyeleka kibeni.” (1 Timoteo 2:​4, NW) Masolo yai kelanda ya bansamuni ya Kimfumu ya kezingaka na Australie kemonisa yau.

◻ Mvula 20 na nima ya kuyambula dibundu na yandi, nkento mosi ya makwela kuyantikaka dyaka na kutanga Biblia. Mpwisa yina ya mpa sambu na Biblia kunataka yandi na kukuma na bangyufula mingi, yau yina yandi kusambilaka Nzambi na kusadisa yandi na kuzwa bamvutu. Yandi vandaka kuzola kusosa kyeleka, kansi yandi kuzabaka nde na kuvutukaka na dibundu na yandi ya ntama yandi takuka ve kuzwa kyeleka. Ebuna, yandi kuyantikaka nsosa na yandi na kukotaka na magazini mosi ya mikanda ya ntama mpi na kuyulaka kana bau kuvandaka na mikanda ya ketubila mambu ya Nzambi.

Nkento nkwa magazini kuyibukaka nde yandi kuvandaka na mukanda mosi ya ketubila mambu ya Nzambi, na kati ya magazini ve, kansi na nzo. Ntu-dyambu ya mukanda yango kuvandaka: Nge Lenda Zinga Mvula na Mvula na Ntoto Yina Takituka Paladisu, ya kubasisamaka na Bambangi ya Yehowa. Nkento yango kutangaka mukanda yina nswalunswalu mpi yandi kuzwaka bamvutu na bangyufula mingi ya Biblia. Na nima ya kusosa Bambangi ya Yehowa na nsadisa ya mukanda ya banimero ya telefoni, nsukansuka yandi kukutanaka na bau mpi yandi yantikaka kulongaka ya Biblia ya ntangu yonso.

◻ Mwana ndumba mosi kufutilaka zulunalu ya lusadisu ya nsi na bau sambu na kuzabisa kutekama ya nsinga ya nkisi sambu na lutaninu. Luzayisu kumonisaka yau bonso ‘nsinga ya nkisi sambu na lutaninu mosi ya ntangu ya ntama yina kele na ngolo mingi.’ Mbangi ya Yehowa mosi ya nkento kumonaka luzayisu yango. Yandi kubakaka lukanu ya kubinga nkento yina na nsadisa ya nimero ya telefone ya kupesamaka mpi ya kusolula ti yandi na yina metala nto ya yina kebingama ngolo ya nsinga ya nkisi sambu na lutaninu. Disolo ya ngindu ya Biblia na yina metala bisalu ya bampeve ya mbi kulandaka. Mwana ndumba nkwa nsinga ya lutaninu kumonisaka nde kaka kilumbu ya kuyitaka disolo na bau, yandi sambilaka Nzambi sambu na kusadisa yandi na kununga mambu na yandi ti bampeve ya mbi. Mbangi yango kusalaka bangidika sambu na kusolula ti yandi dyaka na telefoni.

Ntangu yandi kubingaka, mwana ndumba yango kuvandaka ve na nzo. Mama na yandi kupesaka mvutu na telefoni mpi yandi kutubaka nde: “Mono kezaba ve inki nge tubaka na mwana na mono ya nkento, kansi dyambu ya mesalama kele kimpa!” Yandi kutaka nde na nima ya kubinga ya telefoni ya ntete, mwana na yandi ya nkento kulosaka bifwanisu ti mikanda na yandi yonso yina kuvandaka na kuwakana ti Satana mpi yandi kuyantikaka na kutanga Biblia.

Mwa ntangu fyoti na nima, bangidika kusalamaka sambu na kukutana na mwana ndumba yango yandi mosi. Na mbala mosi, yandi kundimaka kulonguka ya Biblia ya ntangu yonso ti Bambangi ya Yehowa. Yandi yantikaka mpi na kuvukana ti Bambangi na kukwendaka na balukutakanu na bau ya Bukristu. Dyaka, Yehowa kunungaka bampeve ya mbi na kungengisaka mpenza nzayilu ya kyeleka ya Biblia.