“Kimfumu na Nge Kukwisa”

Yehowa silaka nde: ‘Bidilu, mpasi, maladi, mpi lufwa ta vandaka diaka ve. Mono ta kusula mansanga na meso na bo. Bantu ta vila mambu yonso ya ntama.’

Yehowa tulaka Adami ti Eva na kilanga ya Edeni sambu bo zinga na ngemba mpi na kiese. Yo lombaka nde bo sambila Tata na bo ya zulu mpi bo fulusa ntoto ti bana na bo. Adami ti Eva kolamaka na Yehowa, kansi lukanu na yandi sobaka ve ata fioti. Na mukanda yai, beto me mona nde mambu yonso yina Nzambi ke silaka ke lunganaka. Kimfumu na yandi ta nata balusakumunu ya kitoko na ntoto mutindu yandi silaka Abrahami.

Kubika fioti Satana, bademo na yandi, mpi bantu yonso ya mbi ta vanda diaka ve. Bantu yonso yina ta bikala na luzingu ta sambilaka Yehowa. Beto ta belaka ve mpi ta fwaka ve. Beto ta telamaka konso kilumbu na ngolo mingi mpi beto ta sepelaka na luzingu. Ntoto ta kuma paladisu. Bantu yonso ta vanda ti madia mpi banzo ya mbote. Bantu ta vanda ntima-mbote; bo ta vanda ve nku to mubulu. Bambisi ya makasi ta wa beto ve boma; beto mpi ta wa bo ve boma.

Yo ta vanda kiese mingi ntangu Yehowa ta yantika kufutumuna bantu. Beto ta yamba bantu yina zingaka na ntangu ya ntama, bonso Abele, Noa, Abrahami, Sara, Moize, Ruti, Estere, mpi Davidi. Bo ta sala kumosi ti beto sambu na kukumisa ntoto paladisu. Beto ta vanda ti bisalu mingi ya kitoko.

Yehowa ke zola nde nge vanda kuna. Nge ta zaba yandi na mitindu yina nge me yindulaka ntete ve. Bika nde beto pusana pene-pene ya Yehowa konso kilumbu, bubu yai mpi kimakulu!