Kusyamisa mpi Kupesa Bawi Kikesa

ATA bo kekutana ti bampasi ya nki mutindu, bansadi ya Nzambi fwete baka kikesa na dibundu ya Bukristu. Sambu bo baka kikesa yango, ntetentete bankuluntu fwete zikisa mbote kana badiskure mpi bandongisila na bo kepesa mpenza kikesa. Bankuluntu fwete monisa mpenza nde bo kele ‘bonso bisika ya kutinina mupepe ya ngolo ti mvula, bonso banzadi na ntoto ya kuyuma, bonso madidi ya ditadi ya nene na ntoto ya zelo na zelo.’​—Yez. 32:2.

Kana nge kele nkuluntu, keti badiskure na nge kekitisaka ntima ya bampangi mpi kupesa bo kikesa? Keti yo kepesaka bantu yina kesala ngolo na kusadila Yehowa na kwikama yonso kikesa? Keti yo kepesaka bo ngolo ya kukwamina na kusala luzolo ya Nzambi ata bantu mingi kezolaka ve kuwa nsangu na beto to kemengaka beto? Inki nge tasala kana bantu yankaka na kati ya bawi na nge kebela maladi ya basusi, kenyokwama na mpasi ya mbongo, to kenwana ti maladi mosi ya ngolo yina lenda beluka ve? Nge lenda ‘pesa bampangi na nge kikesa na malongi na nge.’​—Yobi 16:5.

Sadila dibaku ya nge kele na yo ya kusala badiskure sambu na kusadisa bampangi na nge na kubaka kivuvu mpi kikesa yina kekatukaka na Yehowa mpi na bangidika yina yandi mesalaka.—Roma 15:13; Ef. 6:10.

Kuvila Ve Mambu Yina Yehowa Mesalaka. Mutindu mosi ya mfunu ya kupesa bampangi kikesa kele ya kumonisa mutindu Yehowa kusadisaka bansadi na yandi ya ntama ntangu bo vandaka na mpasi.​—Roma 15:4.

Yehowa kusongaka Moize na kupesa Yozue “kikesa” ti “ngolo” na ntwala nde bantu ya Izraele kukota na Ntoto ya Lusilu, kisika makanda yina kuvandaka bambeni vandaka kuzinga tii na ntangu yina. Inki mutindu Moize kusalaka yo? Na meso ya Yozue, Moize kuyibusaka dikanda ya mvimba mambu yina Yehowa kusalaka sambu na bo ntangu yandi basisaka bo na Ezipte. (Kul. 3:28; 7:18) Moize kutubilaka mpi mutindu Yehowa kunungisaka bo na ntwala ya bantu ya Amore. Na nima Moize kusyamisaka Yozue nde: “Vanda ngolo ti kikesa.” (Kul. 31:1-8) Ntangu nge kesosa kusyamisa bampangi na nge, keti nge kesadisaka bo na kubaka kikesa na kuyibusaka bo mambu yina Yehowa mesalaka dezia sambu na bo?

Bantangu yankaka bantu mingi kekutanaka ti mambu mingi ya mpasi na mpila nde bo kekudiyulaka kana kilumbu kele bo tabaka balusakumunu ya Kimfumu. Yibusa bo nde balusilu ya Yehowa mefwana na kutudila yo ntima sambu yo talungana kaka.​—Yoz. 23:14.

Na bansi yankaka, bampangi na beto ke na kumona mpasi sambu na bansiku ya luyalu ya kebuyisaka bo na kulonga nsangu ya mbote. Kana mambu kele mpidina, bankuluntu ya kele na zola lenda sadisa bampangi na bo na kubaka kikesa na mambu yina bantumwa ya Yezu Kristu kukutanaka na yo. (Bis. 4:1–5:42) Dyaka, kumonisa mutindu Nzambi kutwadisaka mambu yina bo ketubila na mukanda ya Estere tasadisa mpenza bampangi na kubaka kikesa.

Na bantangu yankaka, bantu mingi kekwendaka na balukutakanu ya dibundu kansi bo keyelaka ve. Mbala yankaka bo keyindulaka nde Nzambi lenda lolula bo ve sambu luzingu na bo ya ntama kuvandaka ya mbi mpenza. Ziku yo tavanda mbote nge ta mutindu Yehowa kusalaka ti Ntotila Manase. (2 Bans. 33:1-16) To nge lenda tubila bantu yina kuvandaka na Korinto ya ntama yina kusobaka luzingu na bo, kukumaka Bakristu, mpi kukumaka bantu ya mbote na meso ya Nzambi.​—1 Kor. 6:9-11.

Keti bantu yankaka keyindula nde bampasi ya bo kemona kesonga nde Nzambi kendima bo dyaka ve? Kana mpidina, nge lenda yibusa bo mambu yina kukuminaka Yobi mpi mutindu yandi bakaka balusakumunu mingi sambu yandi bikalaka ya kwikama na Yehowa. (Yobi 1:1-22; 10:1; 42:12, 13; Nk. 34:20) Banduku ya luvunu ya Yobi kutubaka nde yo fwete vanda nde Yobi salaka masumu. (Yobi 4:7, 8; 8:5, 6) Kansi, ntangu bo vandaka kupesa balongoki kikesa mpi “kubondila bo na kutula kaka ntima na Nzambi,” Polo ti Barnabasi kutubaka nde: “Beto fweti mona mpasi mingi sambu na kukota na Kimfumu ya Nzambi.” (Bis. 14:21, 22) Mutindu mosi bubu yai, nge lenda pesa kikesa na bantu yina kenyokwama na kumonisaka nde Bakristu yonso fwete kanga ntima na ntwala ya mpasi mpi kusala mutindu yina kele na valere mingi na meso ya Nzambi.​—Bing. 27:11; Mat. 24:13; Roma 5:3, 4; 2 Tim. 3:12.

Syamisa bawi na nge na kuyindula mutindu Yehowa melungisaka balusilu na yandi na luzingu na bo mosi. Kana nge yibusa bo mwa mambu ya ntama, bo lenda bakisa mutindu Yehowa mesalaka dezia mambu mingi sambu na bo, kaka mutindu yandi silaka. Na Nkunga 32:8, beto ketanga nde: “Mono ta songa nge nzila ya nge fweti landa, mono ta longa nge mambu yonso, mono ta talaka nge.” Kana nge sadisa bawi na nge na kuyibuka mutindu Yehowa ketwadisaka to kepesaka bo kikesa, nge tasadisa bo na kubakisa mutindu Yehowa yandi mosi kesungiminaka bo mpi nde yandi tasadisa bo kaka na konso mpasi yina bo mekutana na yo bubu yai.​—Yez. 41:10, 13; 1 Pie. 5:7.

Monisa Kyese Sambu na Mambu Yina Yehowa Ke na Kusala Ntangu yai. Ntangu nge kesosa kusyamisa bampangi na nge, benda dikebi na bo na mambu yina Yehowa ke na kusala ntangu yai. Kutubila mambu yai yonso na mutindu mosi ya kemonisa nde mambu yango kepesa nge mosi kyese tapusa bawi na nge na kuvanda mpi na kyese ya mutindu mosi.

Yindula mutindu Yehowa kesadisaka beto na kukanga ntima mpi kununga na kunwana ti bampasi ya luzingu. Yandi kemonisaka beto mutindu ya kuluta mbote ya kuzinga. (Yez. 30:21) Yandi kepesaka bikuma yina kesalaka nde mambu ya nku, ya kukonda lunungu, bunsukami, maladi, mpi lufwa kusalama mpi yandi kesongaka beto mutindu yandi takatula mambu yai yonso. Yandi mepesaka beto bampangi ya kezolaka beto. Yandi mepesaka beto dikabu ya kitoko ya kusamba. Yandi mepesaka beto dibaku ya kuvanda Bambangi na yandi. Yandi mesadisaka beto na kubakisa nde Kristu meyantikaka kuyala na zulu mpi nde bilumbu ya nsuka ya ngidika yai ya ntama kekwenda nswalu na nsuka na yo.​—Kus. 12:1-12.

Katula balusakumunu yai yonso, beto kele mpi ti balukutakanu ya dibundu, balukutakanu ya nene, mpi ya distrike. Kana nge ketubila bangidika yai na mutindu mosi ya kemonisa ntonda na nge sambu na yo, nge tapesa bantu yankaka kikesa ya kukonda kumona mpamba kuvukana ti bampangi na bo.​—Baeb. 10:23-25.

Masolo yina kemonisaka balusakumunu ya Yehowa na bikesa ya beto kesalaka na kisalu ya kusamuna kepesaka mpi kikesa ya mutindu mosi. Na mvu-nkama ya ntete, ntangu Polo ti Barnabasi vandaka kukwenda na Yeruzalemi, bo “pesaka kiese mingi na bampangi yonso” mutindu bo vandaka kutela bo masolo ya bantu ya makanda yina kubalulaka ntima. (Bis. 15:⁠3) Nge mpi lenda pesa bampangi kikesa kana nge ketela bo baeksperiansi yina kepesa kikesa.

Bantu tabaka dyaka kikesa kana nge sadisa bo na kubakisa mfunu ya mambu yina bo kesala. Sikisa bo sambu na kisalu ya Bukristu ya bo kesala. Sikisa bantu yina mekumaka kusala bangunga fyoti mpenza sambu na kimununu mpi maladi kansi yina kekanga ntima na kwikama yonso. Yibusa bo nde Yehowa kevilaka ve zola yina bo monisaka na zina na yandi. (Baeb. 6:10) Lukwikilu yina menunga mimekamu kele kima mosi ya mfunu mingi. (1 Pie. 1:6, 7) Yo kelomba kuyibusa bampangi mambu yai.

Tubila Kivuvu Yina Kele na Ntwala na Kyese Yonso. Balusilu ya kupemama ya mambu yina tasalama na ntwala kele nto ya nene ya kepesa kikesa na bantu yonso yina kezolaka Nzambi. Ziku bantu mingi na kati ya bawi na nge kewaka yo mbala mingi. Kansi, kyese ya nge kemonisa ntangu nge ketubila balusilu yai lenda sadisa bo na kumona nde balusilu yai kele ya kyeleka. Nge lenda sadisa bo na kutula kivuvu na kulungana na yo, mpi kupusa bo na kumonisa ntonda. Kusadila mambu ya nge melonguka na Nzo-Nkanda ya Kisalu ya Teokrasi lenda sadisa nge na kusala yo.

Yehowa yandi mosi kele Muntu ya Kesyamisaka mpi Kepesaka kikesa na bansadi na yandi. Kansi, nge lenda sala kumosi ti yandi sambu na kusyamisa mpi kupesa kikesa na bantu yankaka. Ntangu nge ketuba na ntwala ya dibundu, sadila mbote dibaku yai sambu na kusala yo.