Ta ben ten pas na mundu

Tudu algen tene gana di vive na un mundu na pas. Dja ten txeu ténpu ki govérnus sta ta sforsa pa poi pas na kes lugar na mundu ki ka ten pas. Alvês es ta konsigi poi pas pa un ténpu, má infilismenti txeu bês dipôs kel pas ta kaba. Será ki un dia nu ta ben ten pas na mundu? Klaru ki sin! Odja kuzê ki Jizus inxina-nu sobri kel-li.

Kuzê ki Jizus ta ben faze

Bíblia ta mostra kuzê ki Jizus sta ben faze pa poi pas na mundu interu.

• ‘Jizus ta ben txomadu di Prínsipi di Pas. Se govérnu ta ben spadja pa tudu lugar i pas na se reinu ka ta ben ten fin’. (Izaías 9:6, 7) Jizus ta ben ser Rei na Reinu di Deus i el ta ben poi pas na mundu interu pa tudu ténpu.

• “El ta ben salva kes algen póbri ki sta ta txora ta pidi ajuda . . . i tudu kes ki ka ten ningen pa djuda-s.” (Salmu 72:12-14) Jizus ta ben uza se autoridadi pa faze justisa, kaba ku tudu géra, violénsia i sufrimentu.

• “Ninhun nason ka ta ben labanta spada kóntra kel otu nason i nen es ka ta ben prende géra más.” (Izaías 2:4) Óras ki Jizus ben governa téra, tudu algen ta ben prende sta na pas envês di prende géra.

Pa bu sabe modi ki Jizus ta ben poi pas na mundu i modi ki bu pode ben vive na un mundu ku pas, odja un vídiu pikinoti ku téma Kuzê ki é Reinu di Deus?

Kuzê ki Jizus inxina

Mésmu gósi, kes kuza ki Jizus inxina sta ta djuda milhons di algen vive na pas. Na kel Diskursu na Monti ki el faze, Jizus da alguns konsedju ki ta djuda-nu sta na pas ku otus algen. Odja alguns izénplu.

• “Filís é kes ki ta inpenha pa pas.” (Mateus 5:9) Jizus insentiva ses sigidor pa inpenha pa pas envês di sô ivita géra.

• “Bai faze pas ku bu irmon primeru, dipôs volta i intrega bu oférta.” (Mateus 5:23, 24) Jizus insentiva-nu pa nu rezolve prublémas ku otus algen faxi. El fla ma faze pas ku otus algen é inportanti pa nu ten un bon amizadi ku Deus.

• “Nhos para di julga, asi pa nhos ka julgadu.” (Mateus 7:1) Jizus fla ma nu ka debe julga otus algen di manera duru ô spera ma es ta faze kuzas ki nos nu ka ta faze, pamodi kes kuza li ta kria prublémas. Envês di djobe fadjas di otus algen, nu debe ‘kontinua ta púrdua-s’ ses fadja. — Lukas 6:37.

Ten txeu algen na mundu interu ki sta sigi kes konsedju di Jizus. Sikrê es ta vive na kes lugar ki ten txeu violénsia ku géra, es sta ta prende rezolve prublémas ku otus algen, pamodi envês di guarda rankor es ta púrdua otus algen i es ta mostra amor ti pa kes algen ki ka ta trata-s dretu.

Pa odja modi ki kes konsedju di Jizus ta djuda alguns algen vive na pas, lé kel artigu “Modi ki bu pode ten pas sikrê ku txeu géra na mundu?.”