Mante bu amizadi ku Jeová fórti timenti bu sta faze kursu ô formason

1-2. (a) Si bu skodje faze un kursu ô formason, kuzê ki bu meste kontinua ta faze? (b) Kuzê ki siginifika “kontinua ta anda na es mésmu kaminhu”? (Filipensis 3:16)

ALGUNS sérvu di Jeová ta disidi faze un kursu ô formason dipôs ki es tirmina liseu. Talvês es ta atxa, ma si es faze kel tipu di kursu ô formason, es pode atxa un trabadju ki ta djuda-s sustenta i faze ses midjór na ses sirvisu pa Jeová. Si bu disidi faze un kursu ô formason, modi ki bu pode kontinua ku un amizadi fórti ku Jeová? (Tia. 4:8a) Di serteza bu pasa pa kuzas ki poi bu fé na próva, na kes anu ki bu staba na skóla, i bu konsigi vense-s. Gósi bu meste “kontinua ta anda na es mésmu kaminhu.” Kel-li krê fla, kontinua ta sirbi Jeová di manera fiel sima bu sta ta faze. — Lé Filipensis 3:16.

² Kes palavra na gregu ki traduzidu pa “kontinua ta anda na es mésmu kaminhu” txeu bês éra uzadu pa pâpia di trópas ki ta kontinua ta marxa tudu djuntu, sen para ô volta pa tras. Si bu disidi faze un kursu ô formason, bu meste ‘kontinua ta marxa pa frenti’ na bu sirvisu pa Jeová, sen para i sen djobe pa atras. Kel studu li, ta ben pâpia di kuatu prinsípiu di Bíblia ki ta ben djuda-u. Dja bu konxe kes prinsípiu. Bu aplika-s na pasadu i bu ta ben meste kontinua ta aplika-s timenti bu sta faze un kursu ô formason i tanbê dipôs ki bu tirmina-l.

KONTINUA TA FAZE KUZAS KI TA DJUDA-U TEN UN AMIZADI FÓRTI KU JEOVÁ

3. Timenti bu ta faze un kursu ô formason, ki dizafiu bu pode pasa pa el na bu dia-dia?

³ Dizafiu. Timenti bu ta faze un kursu ô formason, bu ta fika okupadu i bu ta ten txeu kuza pa faze tudu dia. I dja ki bu krê ten bons nóta, bu pode kumesa ta poi skóla na frenti di bu sirvisu pa Jeová. Ti mésmu bu pode kumesa ta falta runion, ta partisipa más poku na pregason, ta dexa di lé Bíblia tudu dia i ta ora más poku. — Apo. 2:4.

4. Kuzê ki pode djuda-u sta sénpri “okupadu na óbra di Sinhor”? (1 Koríntius 15:58)

⁴ Lé 1 Koríntius 15:58. Pa un bisikléta kontinua ta ba pa frenti, bu meste kontinua ta da pé na pedal. Di mésmu manera, pa bu kontinua ku un amizadi fórti ku Jeová, bu meste kontinua okupadu na se sirvisu. É pamodi kel-li ki Bíblia ta fla pa nu sta “sénpri okupadu na óbra di Sinhor”. Kel-li ka krê fla sô kantu ténpu ki bu ta pasa ta faze kuzas na bu sirvisu pa Jeová. Má é inportanti bu faze-s pamodi es é kes kuza más inportanti pa bo. Lenbra ma sirbi Jeová é kel kuza más inportanti na bu vida, ka bu kursu ô formason. (Mat. 22:37) Un irman jóven ki txoma Samanta fla: “N promete ma si nha kursu kumesaba ta prujudika nha sirvisu pa Jeová, N ta largaba el.”

5. Kuzê ki bu pode faze pa bu mante okupadu na bu sirvisu pa Jeová?

⁵ Kuzê ki bu pode faze antis di bu kumesa un kursu ô formason? Sta disididu na kontinua ta poi Jeová na primeru lugar na bu vida. Pensa na kel pergunta li: ‘Ki planu dja N faze pa N pode kontinua ta sisti tudu runion, partisipa sénpri na pregason i faze studu pesoal?’ (Juz. 1:8; Mat. 28:19, 20; Ebr. 10:25) Pensa tanbê na kel ténpu ki bu staba na skóla. Kuzê ki bu faze pa bu kontinua ta poi kes kuza li na primeru lugar? Si bu da kónta ma bu debe midjoraba na algun kuza, kuzê ki bu pode faze gósi pa bu midjora? Sta disididu na kontinua okupadu na bu sirvisu pa Jeová timenti bu sta faze un kursu ô formason. Faze bu midjór na bu kursu ô formason, má ka bu gasta ténpu dimás na el ki bu ta fika sen ténpu ô forsa pa faze kes kuza ki ta djuda-u ten un amizadi fórti ku Jeová.a — Mat. 6:24.

6. Ki perguntas bu pode faze pa bu odja si inda bu sta poi Jeová na primeru lugar na bu vida? (Odja imajen.)

⁶ Dipôs ki bu kumesa un kursu ô formason, tra ténpu, tudu mês pa bu pensa si Jeová inda é kel algen más inportanti na bu vida. Pa faze kel-li, bu pode pensa na kes pergunta li: ‘Alvês N ta falta runion ô N ta txiga atrazadu? Txeu bês duránti runion, N ta fika ta pensa na kes trabadju di skóla ki N ten pa N faze? N sta ta sisti runion sô pa internet envês di bai pa Salon di Reinu?’ Tanbê bu pode pensa na kes pergunta li: ‘N sta ta ora i ta lé Bíblia más poku di ki antis? N sta bai pregason sô pamodi N ten ki bai i N ta krê volta pa kaza lógu?’ Si bu responde sin pa un ô más di kes pergunta li, faze mudansa lógu. Ka bu dexa bu kursu ô formason inpidi-u di poi Jeová na primeru lugar na bu vida.

“PROTEJE BU KAPASIDADI DI PENSA”

7. Óras ki bu ta faze un kursu ô formason, ki dizafius bu pode pasa pa el ki pode muda bu manera di pensa?

⁷ Dizafiu. Alvês ten alguns kursu ki pode inxina ideias ki é kóntra kel ki Bíblia ta fla. Bíblia ta txoma kes ideia li di “filozofia i ideias falsu”. Pur izénplu, pode inxinadu ma Deus ka izisti i ma umanus ka kriadu. (Kol. 2:8) Tanbê, kuzê ki bu ta prende na alguns kursu pode pô-u ta kunfia más na bu kabésa i ménus na Jeová. Un irmon jóven fla: “Nu ka inxinadu sô modi ki nu ta faze un trabadju, má tanbê modi ki nu debe pensa, i kel-li txeu bês éra diferenti di modi ki Jeová krê pa nu pensa. Pur izénplu, nu inxinadu ma sô nu ta ten un vida filís si nu kunfia na nos própi kapasidadi. Kel-li pô-m ta kumesa ta pensa ma N ka meste ajuda di Jeová pa N ser filís. Fika más difísil pa N kunfia na el.”

8. Pamodi ki é inportanti “proteje bu kapasidadi di pensa”? (Provérbius 5:1, 2)

⁸ Lé Provérbius 5:1, 2. Bíblia ta aviza-nu pa nu “proteje nos kapasidadi di pensa”. Nu ta proteje un kuza óras ki algun algen sta ta tenta straga-l ô toma-nu el. I na verdadi, Satanás i se mundu sénpri ta tenta muda nos manera di pensa. (1 Ped. 5:8) Manera ki pesoas ta pensa sobri kuzê ki é dretu i mariadu, modi ki vida kumesa i si Deus ta izisti mê, pode pô-u ku dúvida sobri kuzê ki Jeová ta inxina na Bíblia. Profesor i otus algen pode tenta pô-u ta pensa ma ses ideia é midjór di ki kalker otu ideia. Má na verdadi, ses ideia é “tolisi pa Deus”. — 1 Kor. 3:18-20.

9. Kuzê ki bu pode faze pa proteje bu kapasidadi di pensa?

⁹ Kuzê ki bu pode faze antis di bu kumesa un kursu ô formason? Pa proteje bu kapasidadi di pensa, ten serteza ma kel ki Bíblia ta inxina é verdadi antis di bu kumesa ta faze un kursu ô formason. Pensa na kes pergunta li: ‘Pamodi ki N ta kridita na Deus? Modi ki N sabe ma Bíblia é se Palavra? Kuzê ki ta konvense-m ma kel ki Bíblia ta fla ma é dretu ô mariadu é más midjór di ki kel ki mundu ta fla?’ Tanbê, é bon bu pensa na kes anu ki bu staba na skóla. Bu pode faze kes pergunta li: ‘N kumesa ta ten dúvida si Deus ta izisti mê i si el kria tudu kuza, kantu otus algen fla ma es ta kridita na ivoluson? Foi difísil pa N ka faze kes kuza mariadu ki nhas koléga ta fazeba?’ Si bu responde sin pa un ô más di kes pergunta li, kuzê ki bu pode faze gósi, asi pa bu pode ten serteza ma kuzê ki Bíblia ta inxina é verdadi i ma el é sénpri midjór pa bo? Timenti bu ta faze un kursu ô formason, sta disididu na ka dexa manera di pensa di otus algen pô-u ta ten dúvida di kel ki bu sabe ma é verdadi. — 2 Tim. 2:16-18.b

10. Kuzê ki bu pode faze pa bu kontinua ku bu fé fórti dipôs ki bu kumesa un kursu ô formason?

¹⁰ Mésmu dipôs ki dja bu kumesa un kursu ô formason, sénpri tra ténpu pa faze kes pergunta li: ‘Dja N kumesa ta pensa ma kuzê ki otus algen ta faze é ka mariadu enbóra es ka sta ta faze kel ki Jeová ta fla ma é dretu? N ta konsigi intende ki óra ki algun kuza ki es ta inxina é sô ideias di ómi i ma es é ka verdadi? N ten serteza ma é sô Reinu di Deus ki ta pode rezolve prublémas di mundu?’ Pa proteje bu kapasidadi di pensa, kontinua ta ser un bon studanti di Palavra di Deus. Studa Bíblia i midita na el ta djuda-u ten serteza ma bu tene verdadi. — 1 Tim. 4:15.

UZA BU TÉNPU DRETU

11. Pamodi ki pode ser difísil uza bu ténpu dretu, óras ki bu ta faze un kursu ô formason?

¹¹ Dizafiu. Faze un kursu ô formason pode toma-u txeu ténpu, prinsipalmenti óras ki bu ten ki pripara pa faze testi ô tirmina un prujétu. Si bu ka uza bu ténpu dretu, bu pode fika kansadu dimás i ti mésmu ku txeu stress. Pur isu, é inportanti bu tra ténpu pa bu kuida di bu korpu i bu menti.

12. Ki kuzas bu meste tra ténpu pa faze? (Efézius 5:15, 16)

¹² Lé Efézius 5:15, 16. Pode ser difísil “uza [bu] ténpu di midjór manera”. Kel-li é pamodi bu ten txeu kuza pa faze. Pur izénplu, é verdadi ki bu meste ténpu pa bu studa, má tanbê bu meste pasa ténpu ku bu família i ku irmons na kongregason. (Sal. 133:1; Pro. 18:1) I más inportanti inda é faze kuzas ki ta djuda-u kontinua más amigu di Jeová. (Mat. 6:33) Talvês bu meste faze kuzas na kaza pa djuda bu família i pode ser ki bu ten un trabadju. Alén di kel-li, bu ta meste tra ténpu pa bu kuida di bu saúdi, pa diskansa i pa faze izersísiu. (Ekl. 4:6; 1 Tim. 4:8) Pa faze tudu kes kuza li, bu meste uza bu ténpu dretu.

13. Kuzê ki bu pode faze pa bu uza bu ténpu di midjór manera?

¹³ Kuzê ki bu pode faze antis di bu kumesa un kursu ô formason? Bíblia ta fla ma un algen ki ta faze planu ta ten bons rezultadu. (Pro. 21:5) Nton, faze un bon prugrama antis di bu kumesa bu kursu ô formason. Pa djuda-u faze kel-li, pensa na kel ténpu ki bu staba na skóla. Faze kes pergunta li: ‘Modi ki N ta ranjaba ténpu pa faze tudu kes kuza inportanti? Si bu xinti ma bu pode fazeba midjór, ki mudansas bu pode faze gósi?’ Sta disididu na kontrola bu ténpu envês di dexa ténpu kontrola-u.c

14. Ki perguntas pode djuda-u odja si bu sta ta uza bu ténpu di midjór manera?

¹⁴ Timenti bu sta ta faze un kursu ô formason, sénpri djobe modi ki bu sta ta uza bu ténpu. Faze kes pergunta li: ‘N sta ta konsigi ten ténpu pa N diskansa dretu i faze izersísiu? Inda N ten ténpu pa N divirti ku irmons i irmans di nha kongregason? N ta konsigi tirmina nha trabadju di skóla na ténpu? Si N ka ta konsigi, é pamodi N tene kuzas dimás pa faze ô N sta ta dexa kuzas inportanti pa dipôs? Nha família i nhas amigu ta atxa ma N meste faze alguns mudansa?’ Si bu da kónta ma bu meste faze mudansas na bu prugrama ô ma bu meste sigi-l midjór, nton faze-l lógu. Talvês bu pode pâpia ku otus algen ki é bon na uza ses ténpu dretu. — Pro. 11:14.

KONTINUA TA “ANDA KU ALGEN KI TEN SABEDORIA”

15. Timenti bu sta ta faze un kursu ô formason, ki dizafiu bu pode pasa pa el?

¹⁵ Dizafiu. Timenti bu sta faze un kursu ô formason, bus koléga pode konvida-u pa bu pasa ténpu ku es dipôs di aula. Bu pode xinti tentadu na bai ku es. Kel-li talvês é pamodi nhos é di mésmu idadi, talvês nhos gosta di kes mésmu kuza i nhos ta sta djuntu na aula. Ô bu pode ti atxa ma bu ten más kuza igual ku bus koléga di ki irmons na bu kongregason. Má bu meste toma kuidadu. Enbóra bu pode ten alguns kuza igual ku bus koléga di skóla, nhos é diferenti pamodi bu krê agrada Jeová, i es nau. I kantu más ténpu bu pasa ku es, más bu ta kumesa ta pensa sima es. (1 Kor. 15:33) Mixel, ki faze un kursu di eletrisidadi di kuatu anu, fla ma kel-li é verdadi. El fla: “N ta pasaba más di 40 óra pa simana ku kolégas ki ta flaba kuzas mariadu, ki ta obiba múzikas ki sérvus di Jeová ka ta obi, i ki ka ta mostraba ruspetu pa mudjer. N kumesa ta pensa ma kuzê ki es ta flaba i fazeba ka éra tantu mariadu si.”

16. Kuzê ki Provérbius 13:20 ta inxina-nu?

¹⁶ Lé Provérbius 13:20. Bíblia ta avizu-nu sobri prigu di maus koléga. Má “ken ki ta anda ku algen ki ten sabedoria ta ten sabedoria”. Lison é klaru: kes algen ki nu ta pasa ténpu ku es ta influensia-nu pa kuza dretu ô pa kuza mariadu. Nton, faze amizadi ku kes algen ki ta ama Jeová sima bo i ki krê kel ki é midjór pa bo. — Sal. 101:6, 7; 119:63.

17. Kuzê ki bu pode faze pa bu ivita maus koléga?

¹⁷ Kuzê ki bu pode faze antis di bu kumesa un kursu ô formason? Poi limiti na kantu ténpu bu ta pasa ku bus koléga di skóla i ti ki pontu bu ta ser ses amigu. Un irmon ki txoma Trenton fla: “N ta trata nhas koléga di skóla dretu, má N ka ta pasa ténpu ku es dipôs di skóla. Es é sô nhas koléga di skóla, es é ka nhas midjór amigu.” Kuzê ki bu ta faze pa bu ten serteza ma bu ka ta pasa ténpu dimás ku bus koléga di skóla ô bu ka ta fika mutu ses amigu? Pa djuda-u responde kel pergunta li, pensa na kes anu ki bu staba na skóla: Kuzê ki bu faze pa kes kuza li ka kontiseba? Si bu xinti ma bu pode fazeba midjór, ki mudansa bu pode faze gósi? Sta disididu na kontinua ta “anda ku algen ki ten sabedoria” i kontinua ta ivita pasa txeu ténpu ku kes algen ki ka ta ama Jeová.d

18. Ki perguntas bu pode faze pa bu djobe modi ki bu sta? (Odja imajen.)

¹⁸ Duránti bu kursu ô formason, sta sénpri ta djobe modi ki bu sta. Faze kes pergunta li: ‘Dja N kumesa ta pâpia, ta pensa ô ta faze kuzas sima nhas koléga? Modi ki Jeová ta xinti sobri amizadi ki N ten ku nhas koléga di skóla?’ (Sal. 1:1) Si bu da kónta ma bu meste faze alguns mudansa, nton faze-s lógu. Skodje sô kes algen ki ta ama Jeová pa ser bus midjór amigu. Tanbê, ka bu ten medu di da bus koléga di skóla tistimunhu. Dja ki es konxe-u i bu ta pasa ténpu ku es na skóla, bu ten kes midjór oportunidadi pa pâpia ku es sobri Jeová i sobri Bíblia.

STA PRIPARADU

19. Modi ki bu pode pripara pa bu vense kes kuza ki pode poi bu amizadi ku Jeová na prigu? Da un izénplu.

¹⁹ Pur izénplu, antis di subi un montanha, un algen meste pripara. Enbóra el ka ta sabe antis di tudu dizafiu ki el pode pasa pa el, el meste ten serteza ma el ten forsa pa subi kel montanha, ma el tene ropa dretu i el ten ki ten un obijetivu, ki é sabe undi ki el krê txiga. Bu pode faze mésmu kuza óras ki bu ta pripara pa faze un kursu ô formason. Mante bu fé fórti, bisti “kel armadura konplétu di Deus,” i ten un obijetivu. Bu obijetivu é ka ten “susésu” na mundu, má é faze tudu kuza pa glória di Jeová. — Efé. 6:11-13; 1 Kor. 9:26, 27; 10:31.

20. Modi ki bu pode kontinua ta ‘djobe si bu sta na fé’?

²⁰ Bíblia ta da-nu kel avizu li: “Nhos kontinua ta djobe si nhos sta na fé. Nhos kontinua ta prova ken ki nhos é.” (2 Kor. 13:5) Bu pode faze kel-li timenti bu sta ta faze un kursu ô formason. Sénpri djobe modi ki bu sta na kes ária ki nu pâpia di el na kel studu li. Bu sta ta faze kes kuza ki ta djuda-u ten un amizadi ku Jeová más fórti? Bu sta ta proteje bu manera di pensa di sabedoria di mundu? Bu sta ta uza bu ténpu dretu? Bu sta ta faze amizadi ku kes algen ki ta ama Jeová i bu sta ta ivita maus koléga? Kes-li é perguntas ki bu debe faze, ka ta inporta si bu sta na skóla, na trabadju ô na kalker otu lugar. Sta disididu na mante bu fé fórti, ka ta inporta ki situason bu sta pasa pa el gósi. Jeová ta ben djuda-u ten kel midjór vida ki ten, timenti bu ta sforsa pa kontinua se amigu. — Pro. 3:5, 6.