Toma bons disizon sobri faze kursu ô formason

1-2. (a) Ki disizon jóvens meste toma? (b) Kuzê ki nu sta ben odja na kel studu li? (Odja nóta di rodapé.)

“KI TRABADJU bu krê ten óras ki bu bira grandi?” Si bo é jóven, talvês dja es faze-u kel pergunta li txeu bês. Kel midjór manera di uza bu vida é skodje sirbi Jeová pa ténpu interu. Má tanbê bu meste trabadja i ganha dinheru pa bu pode kuida di bus nisisidadi. (2 Tes. 3:10) Di serteza dja bu pensa na ki trabadju bu krê faze óras ki bu bira grandi.

² Normalmenti, dipôs ki alguns jóven pâpia ku ses pai ku ses mai sobri kel trabadju ki es krê ten óras ki es bira grandi, es ta disidi kontinua ta studa dipôs ki es tirmina liseu.a Talvês bu pode pergunta si bu debe kontinua ta studa dipôs ki bu tirmina liseu. Si sin, ki tipu di kursu ô formason bu debe skodje? Na kel artigu li, nu ta ben odja prinsípius di Bíblia ki pode djuda-u pensa dretu sobri bu disizon di kontinua ta studa. Kenha ki ta pensa ku sabedoria ta toma disizons ku sabedoria. É verdadi ki kel studu li fazedu prinsipalmenti pa kes jóven, má el pode djuda kalker sérvu di Jeová ki sta ta pensa na kontinua ta studa. Kes konsedju ki nu sta ben pâpia di es tanbê pode djuda mai ku pai djuda ses fidju toma bons disizon.

BU DEBE FAZE UN KURSU Ô FORMASON?

3. Pamodi ki alguns sérvu di Jeová ta disidi faze un kursu ô formason?

³ Na alguns lugar, un algen ka meste faze un kursu ô formason pa el ganha kel dinheru ki el ta meste pa el sustenta. Na otus lugar, un algen ta meste faze un kursu ô formason pa el atxa un trabadju ki es ta paga dretu ô ku un bon oráriu. Pa un sérvu di Jeová, kel-li ta da-l más ténpu pa el bai pregason ô pa el partisipa na otus tipu di sirvisu pa Jeová. Má kes ki ta disidi faze un kursu ô formason, ten ki gasta más ténpu, forsa i dinheru, i es ten ki toma alguns disizon inportanti.

4. Ken ki debe disidi si un sérvu di Jeová debe faze un kursu ô formason? (Odja nóta di rodapé.)

⁴ Bíblia ta fla ma kada algen ta “leba se própi karga di responsabilidadi” pa kuzas ki el ta faze ô ki el ka ta faze. (Gál. 6:5.) Kel-li krê fla ma kada sérvu di Jeová adultu ten ki toma se própi disizon si el debe ô nau faze un kursu ô formason.b Pai ku mai tanbê ten responsabilidadi di djuda ses fidju menór toma disizon sobri kel asuntu li. (Efé. 6:1) I es pode djuda ses fidju toma bons disizon si es debe ô nau faze un kursu ô formason óras ki es bira grandi. — Pro. 22:6.

5. Ki ténpu ki un algen debe pensa si el debe ô nau faze un kursu ô formason i pamodi? (Odja imajen.)

⁵ Normalmenti, un jóven ta meste pensa si el debe ô nau faze un kursu ô formason antis di el tirmina liseu. É klaru ki é midjór pa un jóven pâpia sobri kel asuntu li ku se pai ku se mai txeu ténpu antis di el toma disizon. Kel-li ta da-s ténpu pa es faze piskiza djuntu i odja ki opson ki ten. Asi el pode skodje kes disiplina ki pode pripara-l pa kel kursu ô formason ô pa kel trabadju ki el krê. Kel-li krê fla ma un jóven meste toma kel disizon li antis di el tirmina liseu? Nen sénpri. (Pro. 21:5) Alguns jóven ta disidi tirmina liseu, djobe un trabadju i kumesa sirvisu di pioneru timenti es ta pensa si es debe ô nau faze un kursu ô formason. Kel-li é un disizon ki un algen pode toma dipôs.

6. Kuzê ki pode djuda un algen toma un bon disizon sobri faze un kursu ô formason?

⁶ Kuzê ki pode djuda-u toma bons disizon sobri faze un kursu ô formason? Faze orason sobri es asuntu. (Tia. 1:5) Tanbê, faze kes dôs kuza li: Primeru, pensa na pamodi ki bu krê faze kel kursu ô formason. (Sal. 26:2) Sugundu, pensa na kes vantajen i disvantajen di faze un kursu ô formason. (Pro. 14:15) Nu ben pâpia di kada un di kes pontu li.

PAMODI KI BU KRÊ FAZE UN KURSU Ô FORMASON?

7. Kuzê ki nu debe pensa na el si nu krê faze un kursu ô formason?

⁷ Si bu sta pensa na faze un kursu ô formason, é inportanti bu faze kel pergunta li: ‘Pamodi ki N krê faze kel kursu ô formason?’ Txeu algen ta faze un kursu ô formason, asi pa es pode atxa un trabadju ki es gosta ô ki es ta pagadu dretu. Pensa si é mariadu? Nen sénpri. (1 Tim. 5:8) Má, Bíblia ta aviza-nu pa nu ka dexa dinheru ser kel kuza más inportanti na nos vida ô pa nu ka pensa ma é sô dinheru ki ta proteje-nu. (Pro. 23:4, 5; 1 Tim. 6:8-10; 1 Juan 2:17) Si bu obijetivu é bira riku ô pa otus algen fika dimiradu ku bo, bu ka ta ser filís di verdadi i bu ta prujudika bu amizadi ku Jeová.

8-9. (a) Modi ki sérvus di Jeová debe inkara kursu ô formason? (Mateus 6:33) (b) Kuzê ki bu prende ku izénplu di Jozefina, Morine i Íris?

⁸ Modi ki nu debe inkara kursu ô formason? Ka ten nada más inportanti pa nos di ki sirbi Jeová. (Mat. 22:37, 38; Flp. 3:8) Nton, bu obijetivu di faze un kursu ô formason debe ser ten kes kuza ki bu meste timenti bu sta konsentradu ta sirbi Jeová di tudu bu korason. — Lé Mateus 6:33.

⁹ Odja kuzê ki djuda alguns irman inkara kursu ô formason sima Jeová. Jozefina ki ta mora na Xili, fla: “Dipôs ki N tirmina liseu, N kontinua ta studa, asi pa N pode atxaba un trabadju ki ta djudaba mi ten más ténpu pa N sirbi Jeová. Kel kursu ki N faze tinha ki staba di akordu ku nhas méta na sirvisu pa Jeová.” Un irman ki txoma Morine, skodje faze un formason di un anu pa el bira kabelerera. Pamodi? El fla: “Nha obijetivu éra sirbi undi tinha más nisisidadi. Pur isu, N djobe un formason ki ta djudaba mi alkansa nha méta. Dipôs ki N tirmina formason, N trabadja kómu kabelerera i N guarda algun dinheru, asi pa N pode mudaba pa otu tiritóriu undi tinha más nisisidadi. I kantu N muda, kel formason ki N faze djuda-m atxa trabadju.” Íris, ki faze un kursu di txeu anu pa bira dentista, fla: “Faze un kursu ô formason pode djuda-u na alguns kuza, má nunka el ka ta da-u kel filisidadi di verdadi. Si nu poi Jeová na primeru lugar na nos vida nu ta ser filís i nu ta ten tudu kes kuza ki nu meste.” Nton, óras ki nos amizadi ku Jeová é kel kuza más inportanti na nos vida, nu ta toma disizons ki ta djuda-nu ser filís pa tudu ténpu.

PENSA NA KES VANTAJEN I DISVANTAJEN

10. Modi ki kel prinsípiu ki sta na Deuteronómiu 32:29 pode djuda-u disidi si bu ta faze ô nau un kursu ô formason?

¹⁰ Talvês dja bu pensa na un kursu ô formason ki bu ta gostaba di faze. Tanbê é inportanti bu djobe otus opson ki ten na kel mésmu ária ô na otus ária. (Konpara ku Provérbius 18:17.) Oji, ten txeu opson pa faze kursu ô formason ki na pasadu ka tinha, sima faze un kursu pa internet. Tanbê, djobe si bu ta pode sustenta bu kabésa sen faze un kursu ô formason. Pur izénplu, Juana ki ta mora na Finlándia, ka faze ninhun kursu ô formason. El fla: “Dipôs ki N tirmina skóla, N kumesa ta trabadja pa meiu piriúdu i N bira pionera. Dja N tevi txeu tipu di trabadju i N odja modi ki Jeová sénpri ta kunpri se promésa di da-nu kes kuza ki nu meste.” É inportanti lenbra ma kada disizon sobri si bu ta faze ô nau un kursu ô formason, i ki tipu di kursu ô formason ki bu ta faze, ten vantajen i disvantajen. Nton, pensa na kel pergunta li: ‘Kes vantajen é más txeu di kes disvantajen?’ (Lé Deuteronómiu 32:29; 1 Kor. 10:23) Nu ben odja alguns kuza inportanti ki pode djuda-u responde kel pergunta li.

11. Pamodi ki é inportanti pensa na kantu ténpu ki bu ta ba gasta tudu simana na un kursu ô formason? (Odja imajens.)

¹¹ Oráriu. Djobe kantu óra ki bu ten ki ba pasa kada simana ta sisti aula, ta resebe trenu i ta faze trabadjus di kaza. Simé bu ta kontinua ta ten ténpu pa faze kes kuza ki ta bira bu amizadi ku Jeová más fórti? Bu ta ten ténpu pa faze kuzas na kaza pa djuda bu família? (Flp. 1:10) Bu ta sta kansadu dimás pamodi skóla ki bu ka ta ten forsa pa pripara pa runion ô pa lé i studa Bíblia? É kel-li ki kontise ku Jeroz ki ta mora na Índia. El fla: “Éra difísil pa mi partisipa na pregason i presta atenson na runion. Alvês ti N ta faltaba runion. Gósi N ta xinti ma N ka debe fazeba kel kursu pamodi el toma-m txeu ténpu i forsa.” Má ten alguns kursu ki ka ta toma algen txeu ténpu. Alguns é sô meiu piriúdu i otus bu ka ta tene txeu trabadju di skóla pa faze. Pur izénplu, un irman di Mosanbiki ki txoma Rebeka,c sta kontenti ku kel formason ki el skodje. El fla: “Nha formason éra sô dôs óra pur dia. Pur isu, N kontinua ta ser pionera fíksu duránti formason.”

12. Ki perguntas é bon bu faze, asi pa bu uza bu ténpu di midjór manera? (Ekleziastis 12:1)

¹² Kantu ténpu ki el ta dura. Pensa na kantu mês ô anu ki ta dura pa bu tirmina kel kursu ô formason? Pensa si faze kel kursu ô formason é midjór manera di uza bu ténpu. (Efé. 5:15-17) Si bo é jóven, kel kursu ô formason ta dexa-u da Jeová bu midjór duránti bu juventudi, talvês na sirvisu pa ténpu interu? (Lé Ekleziastis 12:1.) Ten algun kursu ô formason na kel mésmu ária ki ta leba ménus ténpu? Pur izénplu, alguns kursu tékniku i profisional, pode djuda-u ten kes kapasidadi ki bu meste na ménus ténpu i talvês es é más baratu di ki bai universidadi. Un irmon ki txoma Máriu ki ta mora na Xili, fla: “N skodje un kursu tékniku di dôs anu ki éra más baratu di ki bai pa universidadi. N tinha aula sô kuatu bês pa simana, pur isu N konsigi ser pioneru timenti N staba na kel kursu.”

13. Kuzê ki pode kontise si bu ba faze un kursu ô formason lonji di undi ki bu ta mora?

¹³ Lugar. Talvês bu pode atxa un kursu ô formason pértu di undi ki bu ta mora. Má i si bu ten ki faze un kursu ô formason na un otu sidadi? I si bu ten ki ba vive djuntu ku otus koléga timenti bu ta faze kel kursu ô kel formason? Lenbra ma óras ki bu ta dexa bu família pa bu ba vive djuntu ku otus algen ki ka ta sirbi Jeová, kel-li pode prujudika bu amizadi ku Jeová. (Pro. 22:3; 1 Kor. 15:33) Matias di Mosanbiki faze un kursu baratu di un anu. Má simé el rapende di se disizon. Pamodi? El fla: “N pasa tudu kel ténpu lonji di kaza. Tudu dia N ta xintiba tentadu na faze kuzas mariadu. N ka ta rekumenda ningen pa ba faze un kursu ki ta pô-l ta fika lonji di se família.” Un irman di Rúsia fla: “Pamodi N kontinua djuntu ku nha mai i nha pai envês di mora djuntu ku otus koléga, N ivita txeu prubléma i tentason.” Tanbê, bu pode djobe si bu ta konsigi faze un kursu pa internet.

14. Modi ki kel prinsípiu ki sta na Lukas 14:28 pode djuda-u óras ki bu sta pensa na faze un kursu ô formason?

¹⁴ Kantu ki el ta kusta. Alguns kursu é baratu ô talvês é govérnu ki ta paga. Na kes kazu li, bu pode faze un kursu ô formason sen gasta txeu dinheru. Má ten txeu kursu ki é karu. Tanbê, talvês bu ten ki gasta más dinheru na otus kuza, sima paga aula partikular asi pa bu pode kualifika pa faze kel kursu ki bu krê. Alguns kursu é karu dimás, ki studantis ta ten txeu anu ta paga dívida. Adilson di Mosanbiki rapende di disizon ki el toma. El fla: “Nhas avó ki kria-m fika sen dinheru pa kunpra alguns kumida i otus kuza ki nu ta mesteba pa N pode fazeba un kursu di kuatu anu.” Óras ki bu ta pensa na faze un kursu ô formason, faze kes pergunta li: ‘Kantu ki el ta kusta? Ta ben ser difísil pa mi ô pa nha família paga es kursu ô formason? Ten otu kursu ô formason ki é más baratu?’ (Lé Lukas 14:28.) ‘Si N inprista dinheru, kantu ténpu ki N ta ten pa paga-l? Na kel trabadju ki N ta ben ten, N ta ben ganha dinheru ki ta txiga pa N sustenta i tirmina di paga kel dinheru ki N inprista?’ — Pro. 22:7.

15. Pamodi ki bu debe pensa na kel tipu di trabadju ki ten na lugar ki bu ta mora antis di skodje un kursu?

¹⁵ Tipu di trabadju. Pensa na kel tipu di trabadju ki ta ba mestedu na undi ki bu ta vive ô na undi ki bu krê ba vive. Kel kursu ô formason ki bu krê faze ta djuda-u atxa un trabadju? Alguns kursu ka ta inxina kuzas prátiku. Envês di kel-li, es ta konsentra más na inxina tioria, konhisimentu i filozofia. (Kol. 2:8) Un irman di Índia fla: “Nha kursu ka djuda-m ten kes kapasidadi ki N mesteba pa kel trabadju ki N kreba. Pur isu, N ka atxa trabadju na kel ária ki N faze kursu.” Na otus kazu, bu pode prende modi ki bu ta faze un trabadju, má é ka fásil bu atxa trabadju na kel ária la. Odja izénplu di un irmon di Repúblika Séntru-Afrikanu ki txoma Samuel. El faze un kursu di un anu pa el prende konpo ar kondisionadu. Má el fla: “Na undi ki N ta vive, maioria di pesoas ta konpo ses kuza es mê óras ki es straga, pur isu é difísil atxa trabadju.”

16. Pamodi ki é inportanti pensa na kel tipu di trabadju ki bu ta ba faze dipôs ki bu tirmina bu kursu ô formason?

¹⁶ Tanbê pensa na kel tipu di trabadju ki bu pode atxa dipôs ki bu tirmina kursu. Bu ta ba gosta di el? (Ekl. 3:12, 13) Modi ki ta ba ser anbienti di trabadju? É un trabadju ki ta ba ten txeu konpitison i bu ta pasa txeu stress? Kel trabadju ta pô-u ta kóre prigu? Kantu ki un algen di kel ária li normalmenti ta ganha? El ta txiga-u pa bu sustenta? É un trabadju ki bu ten ki sta sénpri ta studa? I más inportanti, el ta dexa-u kontinua ta poi Jeová na primeru lugar na bu vida? (Ekl. 12:13) É klaru ki óras ki ka ten txeu trabadju, nen sénpri nu ka ta pode atxa kel trabadju ki nu krê. Má simé bu pode toma un bon disizon sobri ki kursu ô formason bu ta faze, asi pa dipôs bu pode atxa un trabadju. Un irman di Índia ki txoma Tabita, skodje faze un formason di kusturera ki dura 6 mês. El fla: “N odja ma ser kusterera ta djudaba mi ser pionera. Na kustura sénpri ta ten trabadju pa faze. Bu ta pode faze bu oráriu i bu ka meste txeu dinheru pa bu kumesa ta faze kel trabadju.” Kel formason djuda Tabita atxa un trabadju ki djuda-l kontinua pionera.

17. (a) Modi ki un sérvu di Jeová pode atxa kes informason ki el meste pa el toma un bon disizon sobri faze un kursu ô formason? (b) Ki prinsípius di Bíblia pode djuda-u toma un bon disizon? (Odja kuadru “Prinsípius di Bíblia ki pode djuda-u”.)

¹⁷ Na kel studu li, dja nu pâpia di txeu kuza inportanti ki nu debe pensa na el sobri faze un kursu ô formason. Modi ki bu pode atxa kes informason ki bu meste pa bu toma un bon disizon? Bai kes skóla ô vizita ses pájina na internet pa bu pode sabe más informason sobri kel kursu ô kel formason ki bu sta interesadu na el. Djobe si é fásil atxa trabadju na kel ária. Tanbê, bu pode pâpia ku pesoas ki faze un kursu ô formason sima kel-la ô ki ta trabadja na kel ária. (Pro. 13:10) Faze-s kel pergunta li: “Kal ki é kes vantajen i disvantajen di kel kursu ô formason ô di kel trabadju?” Tanbê, pâpia ku kes algen ki sta kontenti ta sirbi Jeová. (Pro. 15:22) Ki kursu ô formason i trabadju es ta rekumenda-u faze? Talvês ti es pode fla-u di un tipu di trabadju ki nen bu ka pensaba na el.

18. Di kuzê ki nu debe lenbra di el?

¹⁸ Sima dja nu prende, faze un kursu ô formason ten vantajen i disvantajen. Pur isu, ora i pensa sobri kada un di kes opson. Lenbra ma faze un kursu ô formason pode djuda-u atxa un trabadju, asi pa bu pode ten dinheru pa bu kuida di bus nisisidadi. Má úniku manera di bu ser filís di verdadi é ten un amizadi fórti ku Jeová. (Sal. 16:9, 11) Jeová sénpri ta kuida di se povu, ka ta inporta si es faze ô nau un kursu ô formason. (Ebr. 13:5) Má i si bu disidi faze un kursu ô formason? Kuzê ki pode djuda-u kontinua ku un amizadi fórti ku Jeová duránti kel ténpu ki bu ta sta ta studa? Nu ta ben pâpia di kel-li na kel otu studu.