54 APÓSTLU JUAN
El mostra koraji na ténpus difísil
APÓSTLU Juan skrebe: “Kel-li é últimu óra”. Dja el staba algen grandi i el sabia ma ténpu di kes apóstlu staba kuazi ta kaba. Tanbê el sabia ma Jizus i apóstlu Paulu dja avizaba ma kes instrutor falsu ta entraba na kongregason pa disviaba irmons. Kes apóstlu éra sima un barera pa ka dexaba kel-li kontise. (Mat. 7:15; Atus 20:29, 30; 2 Tes. 2:6, 7) Má dipôs, kes otu apóstlu móre i ta parse ma é sô Juan ki fika. Imajina modi ki el xinti na kes ténpu difísil ki el odja kes instrutor falsu ta entra na un kongregason tras di kel otu. Má simé, Juan nunka ka dexa medu ô dizusperu toma kónta di el.
Kantu apóstlu Juan staba algen grandi, el pirsigidu, el podu prézu i el odja kes instrutor falsu ta entra na kongregason. Modi ki el konsigi lida ku kes kuza li?
Kantu Juan tinha más di 90 anu, inda el staba ta prega ku zelu. El fla: “N pâpia sobri Deus i N da tistimunhu di Jizus.” Pamodi kel-li, el podu prézu na Patmus, ki éra un ilha séku i xeiu di rótxa, ki ta fikaba na mar Ejeu. Kuzê ki da Juan koraji pa el ka dizanima? Di serteza el ta lenbraba di kel promésa ki Jizus fazeba ses disiplu: “Nhos fika ta sabe ma N sta ku nhos tudu dia, ti fin di es mundu.” — Mat. 28:20.
Más di 60 anu dipôs ki Jizus faze kel promésa li, di serteza Juan fika dimiradu di odja i obi Jizus na un vizon. Jizus mostra Juan kuzê ki ta ben kontiseba na futuru. El mostra Juan ma “na dia di Sinhor”, povu di Deus na mundu interu ta ben adoraba Jeová sima el ta krê i di manera unidu. Jizus tanbê mostra Juan ma el ta ben djudaba ses disiplu kontinua lial, sikrê ku txeu prubléma.
Jizus uza “sinal” pa mostra Juan kes kuza li. Di serteza Juan ka intende maioria di kes kuza ki el odja na kel vizon. Má ten un kuza ki el intende dretu. Jeová ku Jizus ka ta dexaba kes algen ki staba ta spadja kes ensinu falsu na kongregason ta ten bon rezultadu. Duránti dia di Sinhor, povu di Deus ta ben biraba txeu i Jeová ta ben fazeba txeu kuza sábi pa es. Satanás ta ben perdeba un géra na séu i botadu pa baxu, pa téra. I dipôs, el ta ben sérba distruídu pa tudu ténpu. Di serteza, kel vizon da Juan más koraji i el skrebe “tudu kes kuza ki el odja.”
Juan ka perde se alegria i zelu pamodi el staba prézu na Patmus. Na kel ténpu Domisianu éra inperador di Roma, i el ta pirsigiba kes disiplu di Jizus. Má ta parse ma kantu el móre, Juan libertadu i ku ténpu talvês el bai pa Éfezu. Kantu el tinha uns 100 anu, el dadu un diziginason difísil.
Jeová uza Juan pa skrebe kel kuartu i últimu Ivanjélhu. Talvês el sabia ma kuzê ki el sta ben skrebeba ta spadjaba pa tudu kongregason i ta intxiba korason di irmons di fé i koraji. Tanbê el sabia ma pamodi kel-li, kes inimigu di verdadi ta odiaba el más txeu inda. Má simé, Juan ka perde koraji.
Enbóra dja pasaba uns 70 anu désdi mórti di Jizus, spritu santu djuda Juan lenbra klaru di kuzê ki Jizus fla i faze. El skrebe stória di vida di Jizus di un manera ki ta toka korason. I 90 pursentu di kes kuza ki el skrebe ka sta na kes otu três Ivanjélhu. Pur izénplu, é sô Juan ki pâpia di resureison di Lázaru i ki fla ma kes xéfi di relijion faze planu pa mata-l. (Juan 11:1-46; 12:10) Juan tanbê skrebe kes monti kuza bunitu ki Jizus fla ses disiplu na kel noti antis di el matadu i kel orason di korason ki Jizus faze pa es. Ivanjélhu di Juan é un grandi prezenti pa tudu disiplu di Jizus!
Más ô ménus na kel mésmu ténpu, Jeová poi Juan ta skrebe três karta pa da ses irmon ku irmans koraji. El mostra koraji i el aviza-s pa es tomaba kuidadu ku kes instrutor falsu ki staba ta influensia kongregason. I el fla-s pa es ka staba djuntu ku es i nen pa es ka flaba es mantenha. Kes três karta di Juan tanbê staba xeiu di amor i speransa. Juan inxina ma “Deus é amor”, i el mostra kel amor li na inkorajamentu i konsedju ki el da irmons. Tanbê el skrebe ma el staba kontenti di odja ma kes algen ki el inxina verdadi kontinua “ta anda na verdadi”. Di serteza kes kuza ki Juan skrebe da-s koraji pa es kontinua ta faze kel-li.
Nunka nu ka ta ben pasa pa kes kuza ki Juan pasa pa el. Dipôs ki Juan móre, kes instrutor falsu bira mutu más txeu i es kontamina adorason puru. Má Jeová promete ma nunka más el ka ta dexa kel-li kontise otu bês. (Iza. 54:17; Atus 3:21) Sima Juan, nu pode pasa pa prubléma, pirsigison i ti podu prézu. Má nu debe sigi se izénplu. Ka ta inporta kuzê ki kontise, pa nos tudu sta disididu na kontinua ta anda ku Deus ku koraji!
Lé kel stória li na Bíblia:
Responde kel pergunta li:
Modi ki Juan mostra koraji?
Piskiza más
1. Kuzê ki ta mostra ma Juan tinha un manera di ser fórti? (bt p. 33, kuadru pars. 3-4)
2. Pamodi ki alguns algen ta atxaba ma Juan éra un ómi “sinplis i ku poku skóla”? (Atus 4:13; w08 15/5 p. 30 par. 6-wcgr)
3. Modi ki Juan kontinua ti ki Jizus ben? (Juan 21:22, nóta di studu, nwtsty-wcgr)
4. Modi ki nu sabe ma é Juan ki skrebe kel kuartu Ivanjélhu? (it “Notísias sábi ki Juan skrebe” pars. 2-8-wcgr) Imajen 1
Fondation Martin Bodmer, Cologny (Genève)
Imajen 1: Un kópia di Ivanjélhu di Juan ki fazedu más ô ménus na anu 200 D.K. ku téma (distakadu) “Notísias sábi ki Juan skrebe”
Pensa na kuzê ki bu prende
Na kes livru di Bíblia ki Juan skrebe, el pâpia más di 100 bês di sakrifisiu di Jizus ô di modi ki es sakrifisiu ta djuda-nu. Modi ki nu pode imita Juan i mostra ma nu ta da valor pa sakrifisiu di Jizus?
Juan tinha kuazi 100 anu kantu Jeová uza-l pa skrebe sinku livru di Bíblia. Kuzê ki kel-li ta inxina-nu sobri kuzê ki Jeová ta atxa di kes algen grandi? Imajen 2
Imajen 2
Modi ki bu pode imita koraji di Juan?
Kuzê más ki bu pode pensa na el
Kuzê ki kel stória li ta inxina-m sobri Jeová?
Modi ki kel stória li sta ligadu ku vontadi di Jeová pa nos i pa téra?
Pamodi ki N ta fika kontenti di sabe ma Juan skodjedu pa ba governa ku Kristu na séu?
Djobe más
Irmons ku irmans ki dja sta algen grandi ta konsigi mostra koraji sima Juan?
Juan pâpia txeu sobri amor. Odja kuzê ki nu pode prende di kes kuza ki el skrebe i di se izénplu.
“Kuzê ki nu ta prende ku ‘kel disiplu ki Jizus ta amaba’” (w21.01 pp. 8-13)