KONKLUZON

“Fika xeiu di koraji”

Formatu di livru na papel

1. Kuzê más ki nu sta ben pâpia di el sobri koraji?

Bu respósta

DJA ki livru sta ta tirmina, ten más algun kuza ki nu pode fla sobri koraji? Sin, pamodi kel ki Bíblia ta fla sobri kel asuntu inportanti li é txeu dimás pa nu pâpia di el sô na un livru. I tanbê ten un kuza ki nu meste faze pa kes izénplu di koraji ki sta na Bíblia djuda-nu más txeu. I é di kel-li ki nu sta ben pâpia gósi.

2. Ki otus sérvu di Deus ki mostra koraji?

Bu respósta

² Bu ta lenbra di otus izénplu na Bíblia di algen ki mostra koraji alén di kes ki nu pâpia di el? Talvês bu lenbra di alguns proféta di Skrituras Ebraiku, sima Izaías, Jeremias, Ezekiel, Jonas ô Malakias. Di serteza kes kuza ki Paulu fla kontise ku alguns di es. El fla ma alguns “podu na próva pamodi es fazedu trósa i es sotadu. Na verdadi, más di ki kel-li, es prendedu ku korenti i es podu na kadia.” I ma otus “pasa nisisidadi, es sufri tribulason, es maltratadu” i alguns ti matadu. (Ebr. 11:36, 37) Má simé, es mostra koraji i es sirbi Jeová, sikrê ku prubléma.

3-4. Modi ki dôs mudjer, ki Bíblia ka ta fla ses nómi, proteje rei Davidi duránti un situason prigozu?

Bu respósta

³ Bíblia ka ta fla nómi di txeu algen ki mostra koraji. Pur izénplu, pensa na dôs mudjer di ténpu di rei Davidi. Es djuda Davidi kantu el fuji di Jiruzalen pamodi se fidju Absalon, ki éra orgulhozu i kruel, tenta mata-l pa el bira rei na se lugar. Davidi fla Zadoki, ki éra un saserdóti korajozu, pa el volta pa sidadi i diskubri kal ki éra planu di Absalon. Kantu Zadoki fika ta sabe di kel planu, el manda “un sérva”, ki poi se vida na prigu, pa leba dôs sérvu fiel di Davidi un mensajen. Nu ka sabe se nómi, má nu sabe ma el mostra koraji. Kes dôs sérvu di Davidi ba leba-l kel mensajen, má un algen odja-s i ba konta Absalon. Es foi spértu i es sukundi déntu di un posu. Un otu mudjer, ki Bíblia ka ta fla se nómi, ki éra kazadu ku dónu di kel posu, tapa bóka di kel posu ku un panu i el poi trigu riba di el. Kantu kes sérvu di Absalon bai pa kaza di kel mudjer pa djobe kes dôs ómi di Davidi, el ingana-s i el pô-s ta bai pa otu kaminhu. Kes dôs mudjer li mostra koraji i es proteje kel rei ki Jeová skodje. — 2 Sam. 15:23-37; 17:8-22.

Imajens: Dôs mudjer ki Bíblia ka ta fla ses nómi ki mostra koraji i proteje rei Davidi. 1. Un sérva sta ta pâpia ku dôs sérvu di Davidi. 2. Kel mudjer ki sukundi kes sérvu di Davidi na posu di se maridu, sta ta pensa timenti dôs ómi sta ta bai na otu direson pa lonji di se kaza. — Kel sérva i kel mudjer ki mostra koraji pa djuda povu di Jeová

⁴ Na verdadi, Bíblia sta xeiu di izénplu di ómis ku mudjeris ki mostra koraji. Nu sabe nómi di alguns di es, má otus nu ka sabe. Alguns éra riku i otus éra póbri. Alguns tinha txeu responsabilidadi i otus ka tinha. Má tudu es mostra koraji i fé na Jeová, i ses stória pode djuda-nu.

É inportanti faze orason

5-7. Modi ki Paulu ganha kel koraji ki el mesteba pa infrenta opozison?

Bu respósta

⁵ Modi ki nu pode imita kes izénplu di koraji ki sta na Bíblia? Nu meste intende ma koraji ka ta fazeba párti di ses manera di ser. Es konsigi sirbi Jeová ku koraji sô ku ses forsa? Nau. Ten más un kuza ki djuda-s. É kuzê?

⁶ Pensa na apóstlu Paulu. Na Filipus, un monti di algen ataka Paulu ku Silas. Es tradu ses ropa, es sotadu ku vara txeu bês i es botadu na kel párti más sukuru di kadia, ku pé prézu na tronku. (Atus 16:12, 19-24) Kantu es libertadu, Paulu xinti medu di kontinua ta prega? Kel-li pode kontiseba. Má Paulu sabia ma vontadi di Jeová éra pa el kontinua ta pregaba. El tinha ki ba pregaba na sidadi di Tesalónika. Modi ki el konsigi kel forsa ku koraji ki el staba ta meste?

⁷ Paulu skrebe: “Enbóra nu sufri i nu maltratadu na Filipus, sima nhos sabe, nu ganha koraji ku ajuda di nos Deus, pa nu pâpia ku nhos sobri kes notísia sábi di Deus sikrê ku txeu opozison.” (1 Tes. 2:2) Paulu sabia ma el mesteba koraji pa faze kel ki Deus kreba. Má modi ki el konsigi koraji? Kel koraji staba déntu di el? Nau. El ganha koraji “ku ajuda di nos Deus”. El mostra umildadi i el pidi Jeová pa da-l kel koraji ki el mesteba. I Jeová responde se orason.

8. Sima Paulu, kuzê ki nu pode faze pa ganha koraji?

Bu respósta

⁸ Bu pode faze sima Paulu. Ka bu atxa ma bu ka ta konsigi mostra koraji pamodi el ka ta faze párti di bu manera di ser. Envês di kel-li, faze orason ta pidi Jeová pa da-u kel koraji ki bu meste. — Atus 4:29.

9. Pamodi ki nu meste pidi nos Pai pa da-nu más fé?

Bu respósta

⁹ Tanbê bu pode pidi bu Pai na séu un kualidadi inportanti ki ta djuda-nu ten koraji, ki é fé. Fé ta faze párti di frutu di spritu santu di Jeová. (Gál. 5:22, 23) Tanbê el ta faze párti di kel armadura spritual ki tudu disiplu di Jizus meste. (Efé. 6:16) Fé ten txeu puder! Pur isu, Bíblia ta fla ma el “vense mundu”. (1 Juan 5:4) Fé na Jeová é kel kualidadi ki más ta djuda-nu ten koraji. Si bu kunfia di korason ma Jeová ta djuda-u na situasons difísil, bu ta ten más koraji. Nton, sima kes apóstlu di Jizus, nos tudu nu meste pidi Jeová: “Da-nu más fé.” — Luk. 17:5.

“Nhos ten koraji!”

10-11. Pamodi ki Paulu lenbra kes irmon na Jiruzalen i pértu di la ma éra inportanti ten koraji?

Bu respósta

¹⁰ Kantu Paulu skrebe pa kes irmon na Jiruzalen i pértu di la, el sabia ma ka ta dura es ta ben pasaba pa ténpus difísil. Jizus dja flaba ma Jiruzalen ta sérba distruídu, i kel-li staba kuazi ta kontise. (Luk. 19:41-44; 21:20-24) Modi ki Paulu lenbra-s ma éra inportanti ten koraji? El lenbra-s di un promésa di Jeová ki dja nu pâpia di el na intruduson di kel livru li. Kel promésa é: “Nunka N ka ta dexa-u i nunka N ka ta bandona-u.” Modi ki kel promésa li ta poba es ta xinti? Paulu fla: “Pa nu fika xeiu di koraji i pa nu fla: ‘Jeová é kel ki ta djuda-m. N ka ta xinti medu. Kuzê ki ómi pode faze-m?’” — Ebr. 13:5, 6.

¹¹ Enbóra Bíblia ka ta fla tudu kuza ki kontise kantu Jiruzalen distruídu na anu 70 D.K., nu pode ten serteza ma kes kriston fiel na Jiruzalen sigi kel konsedju ki Paulu da-s. Es ganha koraji pa faze sima Jizus flaba es. Es “fuji pa montanhas” na óra sértu. — Luk. 21:20, 21.

12. (a) Ki promésas pode djuda-u ten koraji óras ki bu ta pasa pa momentus difísil? (b) Modi ki alguns ómi ku mudjeris di nos ténpu mostra koraji, i kuzê ki bu sta disididu na faze? (Odja kuadru “Imita ses koraji”.)

Bu respósta

¹² Mésmu kuza pode kontise ku bo óras ki bu ta pasa pa momentus difísil gósi i na futuru. (Eze. 38:1, 2, 10-12; Mat. 24:21) Lenbra sénpri ma Jeová promete ma el ta proteje-nu. (Eze. 38:19-23; 2 Tes. 3:3) Nunka el ka ta bandona kes algen ki ta ama-l i ki ten fé na el. Sima Jeová dja flaba Juzué, el ta fla-u tanbê: “Ten koraji i ten txeu forsa”! (Juz. 1:7, 9, 18) I lenbra sénpri ma Jizus fla ses disiplu: “Nhos ten koraji!” Nunka el ka ta fadja na kunpri se promésa di da-u spritu santu di Jeová pa djuda-u ten koraji pa lida ku kalker tipu di prubléma. (Juan 14:26; 15:26, 27; 16:33) Bu pode ten serteza ma bu pode fika “xeiu di koraji”!

Imajens: Irmons ku irmans ki sta ta lida ku provasons ku koraji. 1. Un irman jóven ki sta na sala di aula, tene un sorizu i el tene un livru di skóla i bruxura “Será Que a Vida Teve Um Criador?” na mô. 2. Un pai ku un mai ki sta na un kanpu di rafujiadus, sta ta brasa ses fidju-fémia pikinoti i tudu es tene un sorizu. 3. Un irmon jóven tene un sorizu timenti el tene róstu na meiu di gradi di se séla ta djobe pa frenti. — Ka ta inporta ki situason ki nu sta pasa pa el, Jeová ta promete uza se spritu santu pa da-nu más koraji, asi pa nu lida ku kalker provason.

Imita ses koraji

Martin ku Gertrud Poetzinger

Martin ku Gertrud tinha sô três mês i meiu kazadu. Es staba kontenti ta faze ses trabadju di pioneru djuntu kantu es podu prézu i es mandadu pa lugar diferenti na ténpu ki Adolf Hitler staba ta governa na Alimanha. Na anu 1936, Martin podu prézu i el lebadu pa kanpu di konsentrason di Dachau. Dipôs, Gertrud podu prézu tanbê. Es pasa 9 anu sen odja kunpanheru. Duránti tudu kel ténpu li, ninhun di es ka sabia si kel otu inda staba bibu. Má es tudu dôs staba disididu na kontinua lial pa Jeová. Martin lebadu di Dachau pa kanpu di konsentrason di Mauthausen. I la el tratadu di manera kruel. Gertrud dadu senténsa pa el pasa três anu i meiu na un séla el sô. Dipôs el pasa más kuatu anu prézu na kanpu di konsentrason di Ravensbrück. Kantu géra tirmina, el diskubri ma Martin staba bibu. Dipôs el inplora un komandanti di trópa pa libertaba Martin. Pamodi kel-li, Martin i más 100 otus Tistimunha di Jeová, ki staba na kanpu di konsentrason di Mauthausen, libertadu. Ti ki enfin Martin ku Gertrud odja kunpanheru otu bês! Dipôs es kontinua na ses trabadju di pioneru djuntu. Ku ténpu, es ba sirbi na Betel di Brooklyn, na Nova York, i Martin bira ta faze párti di Grupu Enkaregadu di Óbra di Tistimunhas di Jeová. Txeu bês el ta flaba ses irmon ku irmans: “Koraji é un di kes kualidadi más inportanti ki bu pode ten!” Es kontinua ta sirbi Jeová ku lialdadi i alegria ti ki es móre.

“Koraji é un di kes kualidadi más inportanti ki bu pode ten!”— Martin Poetzinger

Valentina Garnovskaya

Valentina ta moraba na Belarus kantu un Tistimunha di Jeová pâpia ku el pa primeru bês na anu 1945. El tinha uns 20 anu. Kel Tistimunha di Jeová pâpia ku el más dôs bês. Valentina gosta txeu di kes kuza ki el prende na Bíblia. Má dipôs, Valentina ka odja-l nunka más. I dja ki govérnu proíbi trabadju di Tistimunhas di Jeová, éra difísil pâpia ku es. Má el mostra koraji i el pâpia ku otus algen di kes kuza ki el prende. Pamodi kel-li, el pasa 8 anu prézu. Kantu el libertadu na anu 1953, lógu el kumesa ta pâpia otu bês sobri kes verdadi di Bíblia. Pur isu, el podu prézu otu bês, i di es bês es da-l senténsa di 10 anu na kanpu di trabadju forsadu. Na un di kes kanpu, el inkontra ku alguns irman. Es tinha un Bíblia, má es tinha ki sukundiba el. Un di kes irman mostra Valentina kel Bíblia. Kel-li éra primeru bês ki Valentina staba ta odja un Bíblia désdi ki kel Tistimunha di Jeová papiaba ku el pa primeru bês. Dipôs ki Valentina libertadu na anu 1967, el batiza i el bira Tistimunha di Jeová. El prega ku zelu ti ki el podu prézu otu bês na anu 1969, i el dadu más três anu di kadia. Má simé, el kontinua ta pâpia sobri Jeová i kes notísia sábi. Antis di el móre na anu 2001, el djuda uns 44 algen prende verdadi di Palavra di Deus. Na fin di se vida, Valentina fla: “Nunka N ka tevi un lugar di mora. Tudu kuza ki N tinha ta kebeba na un maléta. Má sénpri N ta xintiba alegria na sirbi Jeová.”

“Nunka N ka tevi un lugar di mora. Tudu kuza ki N tinha ta kebeba na un maléta. Má sénpri N ta xintiba alegria na sirbi Jeová.”— Valentina Garnovskaya

Alfredo Fernández

Alfredo tinha uns 19 anu kantu el txomadu pa ba trópa na Arjentina. Pamodi se konsénsia, el ka krê tinha nada aver ku géra. Pur isu, el nega ba trópa i ti mésmu bisti ropa di trópa. Pamodi kel-li, el mandadu pa kadia i la kes guarda tortura-l i alguns bês es finji ma es ta mataba el. Má el kontinua ta lé se Bíblia i ta toma nóta di kes kuza ki el ba ta prende. Na dia di se julgamentu, juís fla-l ma si el bistiba ropa di trópa na tribunal, el ta libertaba el. Má el mante firmi i el nega. Pur isu, el mandadu pa kadia otu bês. Pamodi kes tortura, el fika duenti ti pontu ki dotor di kadia fla ma prósimu bês ki el ta odjaba Alfredo ta sérba déntu di un kaxon. Dja ki Alfredo da kónta ma el staba kuazi ta móre, el skrebe un karta pa se família. El skrebe: “Nha família ki N krê txeu. Nunka N ka dizejaba skrebe un karta sima kel-li pa nhos. Má pamodi kes kuza ki N sta pasa pa el, N ta xinti ma N meste skrebe nhos.” El agradese se família pamodi es da-l koraji i es djuda-l timenti el staba na kadia. El skrebe tanbê: “N ta agradese nos Deus Jeová di korason pamodi el dexa-m faze párti di un família sima kel-li... N ta intende ma óras ki nhos lé kel karta li, nhos ta fika tristi dimás. N ta pidi nhos sô un kuza. Ka nhos dexa pa kel dór li da ku nhos na txon, má nhos luta kóntra el. Nhos dexa Palavra di Deus, ki é kel fonti di konsolu ki ka ta kaba, konsola nhos... Nhos lenbra sénpri ma mórti é ka pa tudu ténpu. N ta spera ma kes lenbransa ki nhos ten di mi ta da nhos koraji pa nhos kontinua fórti.” Na anu 1982, três anu dipôs ki Alfredo podu prézu, el móre ku 21 anu. El kontinua fiel ti fin di se vida.

“N ta pidi nhos sô un kuza. Ka nhos dexa pa kel dór li da ku nhos na txon, má nhos luta kóntra el.”— Alfredo Fernández

Karen Oehm

Karen sirbi Jeová ku alegria désdi ki el éra minininha. El gostaba di se trabadju di pioneru. Dipôs el kaza ku Rainer i es ba sirbi djuntu na Betel di Mérka. Má kantu el tinha uns 55 anu, el diskubri ma el tinha un duénsa ki ka ten kura. Kel duénsa li ta ataka i ta mata kes sélula di sérbru. Pur isu, poku-poku kel algen ki ten kel duénsa li ta perde kapasidadi di pâpia, di mexe i dipôs el ta móre. Désdi komésu, Karen staba disididu na faze se midjór, sikrê na se situason difísil. Timenti se duénsa inda ta dexaba el, el gasta txeu ténpu ta studa i ta prega. I el sforsa txeu pa kustuma ku se novu situason. Kantu el kumesa ta perde se kapasidadi di pâpia, el prende uza un konputador ki ta dexaba el skodje létra ku odju pa forma palavras ki ta parseba na ekran. Dipôs konputador ta flaba kes palavra ku vós altu. Skrebe di kel manera li é difísil. Má simé, Karen ta skrebeba komentáriu pa runion i kartas pa da tistimunhu. Un di kes irman ki ta kuidaba di el ki é infermera, fla: “Nunka el ka ta perguntaba: ‘Pamodi ki kel-li kontise ku mi?’ Dôs simana antis di Karen móre, el skrebe un karta pa un mudjer ki N daba tistimunhu i el tirmina kel karta ta fla asi: ‘Si bu sta dizanimadu dimás, bu pode konta ku mi.’” Un otu infermera fla: “Nunka Karen ka txora pamodi se duénsa. El tinha txeu motivu pa el fikaba dizusperadu. Má pamodi se fé fórti na resureison, el sabia ma fika dizusperadu ka ta fazeba sentidu. El sabia ma Jeová ta ben kordaba el perfeitu i xeiu di saúdi.” Na komésu, kantu Karen fika duenti, se irman jémia pergunta-l: “Modi ki bu ta konsigi ten txeu koraji asi?” Karen responde-l: “É Jeová ki ta da-nu kel forsa ki nu meste.” I Jeová da-l koraji ti fin di se vida. Dipôs ki Karen móre, se maridu intrega txeu karta ki Karen skrebeba pa família i amigus pa agradese-s, konsola-s i da-s koraji.

“É Jeová ki ta da-nu kel forsa ki nu meste.”— Karen Oehm

13. Kuzê ki ta djuda-u kontinua ta mostra koraji?

Bu respósta

¹³ Pensa na kel ténpu ki téra interu ta ben sta na pas, i ki nu ta ben resebe tudu kes algen ki sta na mimória di Jeová ki ta ben resusita. Imajina ben inkontra ku kes ómi i kes mudjer di koraji ki nu pâpia di el na kel livru li, i txeu otus tanbê! Bu ta atxa ma alguns di es ta ben rapende di skodje sirbi Jeová na mundu di Satanás, sikrê es matadu pamodi es mostra koraji? Klaru ki nau! I bo? Timenti bu ta trabadja djuntu ku es pa téra interu bira un paraízu, bu ta ben rapende pamodi bu mostra koraji i amor pa Jeová na es ténpu di fin? Klaru ki nau! Nton, sta disididu na kontinua ta mostra koraji ti fin. Bu ta fika kontenti pa tudu ténpu pamodi bu faze kel-li!

Irmons, irmans i mininus pikinoti sta kontenti na Paraízu. Alguns sta ta da jirafa kumida, otus sta ta djobe pa un animal ki txoma karakal, ta faze piza, ta pâpia ku kunpanheru ô ta toka instrumentu di múzika.