Fuma é pekadu?

Respósta di Bíblia

Bíblia ka ta pâpia di fumaa nen di otus manera di uza tabaku. Má el ten prinsípius ki ta mostra ma pa Deus fuma é un pekadu, pamodi el ka ta aprova ábitus inpuru i ki ta prujudika nos saúdi.

Ruspetu pa vida. ‘Deus ta da tudu algen vida i folgu’. (Atus 17:24, 25) Vida é un prezenti di Deus, pur isu nu ka debe faze nada ki pode pô-nu ta móre más sédu, sima fuma. Na mundu interu, fuma é un di kes kuza ki más ta poi algen ta móre má ki ta daba pa ivita.
Ama bu prósimu. “Ama bu prósimu sima bu kabésa.” (Mateus 22:39) Un algen ka ta mostra amor óras ki el ta fuma pértu di otus algen. Kes algen ki ta pasa txeu ténpu pértu di pesoas ki sta ta fuma ten más xansi di dizenvolve kes duénsa ki kes algen ki ta fuma ta ten.
Nu meste ser santu. “Nhos oferese nhos korpu sima un sakrifisiu bibu, santu i ki Deus ta seta”. (Romanus 12:1) “Nu linpa di tudu kuza ki ta kontamina korpu i spritu, asi pa nu pode bira más santu ku kel grandi ruspetu pa Deus.” (2 Koríntius 7:1) Nu ka kriadu pa nu fuma. Ken ki ta uza tabaku ta respira txeu kuza ki pode prujudika se korpu. Ken ki ta faze kel-li ka sta ta ser santu ô linpu.

Kuzê ki Bíblia ta fla sobri uza padjinha ô otus dróga pa divirti?

Bíblia ka ta pâpia di padjinha ô di otus dróga sima kel-li. Má el ten prinsípius ki ta mostra ma é mariadu uza kuzas ki ta poi algen visiadu sô pa divirti. Alén di kes prinsípiu ki dja nu pâpia di el, kes prinsípiu li tanbê ta aplika na kes asuntu li:

Nu meste kontrola nos menti. “Ama Jeová, bu Deus. . . di tudu bu menti.” (Mateus 22:37, 38) “Nhos faze tudu kuza ku bon juís.” (1 Pedru 1:13) Un algen ka ta konsigi kontrola se menti dretu óras ki el ta uza dróga. I txeu algen ti ta fika visiadu na es. Envês di pensa na kuzas dretu, ses menti ta konsentra sô na ranja más dróga. — Filipensis 4:8.
Obi ku lei di bu país. “Obi ku govérnus i autoridadis”. (Titu 3:1) Na txeu país, govérnu ta kontrola uzu di alguns dróga. Si nu krê agrada Deus, nu ten ki obi ku kes autoridadi. — Romanus 13:1.

Tabaku i bu saúdi

Organizason Mundial di Saúdi ta fla ma tudu anu sérka di 6 milhon di algen ta móre pamodi duénsas ki ten aver ku uza produtus ki ten tabaku, kel-li ta inklui más di 600 mil algen ki ka ta fuma má ki afetadu pa fumu di sigaru. Odja modi ki tabaku ta afeta saúdi di kes algen ki ta uza-l i di kes algen ki ta sta pértu di pesoas ki sta ta fuma.

Kánser. Fumu di tabaku ten más ki 50 produtu kímiku na el ki ta poi algen ta ten kánser. Di akordu ku un ensiklopédiab talvês fumu di tabaku é “responsável pa 90 pursentu di tudu kazu di kánser di pulmon.” Fumu di tabaku pode poi algen ta ten kánser na otus órgon, sima bóka, trakeia, ezófogu, garganta, larinji, fígadu, pânkria i bixiga.

Duénsas ki ta afeta órgons di respirason. Fumu di tabaku ta poi algen ta ten más xansi di panha duénsas di respirason, sima pineumonia i gripi. Kriansas ki ta sta sénpri pértu di pesoas ki ta fuma, ten más xansi di ten asma, tose króniku, i ses pulmon ta kria más poku i ka ta funsiona dretu.

Duénsas di korason. Kes algen ki ta fuma ten más xansi di panha tronbózi ô di dizenvolve un duénsa di korason. Monóksidu di karbonu ki ten na fumu di tabaku, ta pasa faxi di pulmon pa sangi, i el ta fika na lugar di oksijéniu. Ku ménus oksijéniu na sangi, korason ta meste trabadja más txeu pa leba oksijéniu pa korpu.

Ta prujudika gravidês. Kes mudjer ki ta fuma duránti gravidês ta ten más xansi di ses bebé nase antis di ténpu, ku poku pézu ô ku alguns difisiénsia, sima difisiénsia na bóka.c Kes bebé tanbê pode dizenvolve prublémas di respirason ô móre dirapenti.

a Na kel artigu li, fuma krê fla uza kuzas ki ten tabaku sima, sigaru, xarutu, kanhotu ô xixa. Má kes prinsípiu li tanbê ta aplika na uza siré, nheme érva, txera tabaku i uza sigaru iletróniku ki ten nikotina, i otus produtu sima kes-li.

b Encyclopædia Britannica

c Lábio leporino.