Un jóven sta ta djobe pa pesoas ki ta faze kuzas diferenti ki el pode imita

PERGUNTAS KI JÓVENS TA FAZE

Modi ki nu pode skodje dretu kenha ki nu ta imita?

“Óras ki N ta pasaba pa un prubléma na skóla, un kuza ki ta djudaba mi é pensa na un algen ki N ta adimira i ki pasa pa mésmu prubléma ki mi. Dipôs, N ta tenta imitaba se izénplu. Skodje dretu kenha ki bu ta imita ta djuda-u lida ku prublémas.” — Haley.

Ten un algen pa imita pode djuda-u ivita prublémas i alkansa bus méta. Má é inportanti skodje dretu kenha ki bu ta imita.

Pamodi ki é inportanti skodje dretu?

Kes algen ki bu ta imita ta influensia kes kuza ki bu ta faze.

Bíblia ta insentiva-nu pa nu imita bons izénplu. El ta fla: “Óras ki nhos odja rezultadu di ses konportamentu, nhos imita ses fé.” — Ebreus 13:7.

Konsedju: Kes algen ki bu ta skodje imita ta influensia-u pa dretu ô pa mariadu. Nton, envês di imita kes algen ki é famozu ô ki ten mésmu idadi ki bo, imita kes ki ten bons kualidadi.

“N prende txeu ku atitudi i konportamentu di un irmon ki txoma Adam. Un kuza interesanti é ki ti inda N ta lenbra dretu di alguns kuza ki el fla ô faze. Talvês, nen el ka ta imajina modi ki el influensia-m txeu.” — Colin.
Kes algen ki bu ta skodje imita ta influensia bu manera di pensa i xinti.

Bíblia ta fla: “Ka nhos dexa ningen ingana nhos. Maus koléga ta straga bons ábitu.” — 1 Koríntius 15:33.

Konsedju: Envês di imita algen sô pamodi se aparénsia, imita algen ki ten bons kualidadi. Sinon, bu pode fika diziludidu.

“Si bu fika sô ta konpara ku kes algen famozu, sénpri bu ta atxa ma bo é feiu i ma bu ka bale nada. Kel-li pode pô-u ta konsentra sô na bu aparénsia.” — Tamara.

Pensa na kel-li: Kal ki é prigu di skodje imita kes algen famozu i kes atléta?
Kes algen ki bu ta skodje imita pode djuda-u alkansa bus méta ô pode trapadja-u.

Bíblia ta fla: “Ken ki ta anda ku algen ki ten sabedoria ta ten sabedoria”. — Provérbius 13:20.

Konsedju: Skodje imita kes algen ki ten kes kualidadi ki bu ta gostaba di ten. Si bu presta atenson na es, bu pode odja kuzê ki bu pode faze pa bu alkansa bus méta.

“Tenta poi un méta más dirétu. Pur izénplu, envês di sô fla: ‘N krê ser más responsável’, bu pode fla: ‘N krê ser más responsável sima Jane. Nunka el ka ta atraza i el ta leba ses responsabilidadi asériu.’” — Miriam.

Konkluzon: Óras ki bu ta skodje dretu kenha ki bu ta imita, bu ta konsigi kontrola midjór ki tipu di algen ki bu ta ser.

Un jóven sta ta pensa na kenha ki el ta imita — Skodje dretu kenha ki bu ta imita pode djuda-u alkansa bus méta más rápidu!

Modi ki bu pode skodje?

Bu pode faze kel-li di dôs manera.

Skodje un kualidadi ki bu krê ten i dipôs djobe un algen ki bu ta adimira ki ten kel kualidadi.
Bu pode skodje un algen ki bu ta adimira i dipôs djobe un kualidadi ki el ten ki bu ta gostaba di ten tanbê.

Kel tabéla ki sta ligadu ku kel artigu li pode djuda-u faze kel-li.

Bu pode sigi izénplu di:

Jóvens. “N krê sérba sima nha midjór amiga. Nunka el ka sta okupadu dimás pa djuda otus algen. El é más nova di ki mi, má el ten kualidadis bunitu ki N ka ten. É kel-li ki ta pô-m ta krê imita-l.” — Miriam.
Adultus. Pode ser bu pai ku bu mai ô irmons ku irmans di kongregason. “Di serteza, nha pai ku nha mai é un bon izénplu pa mi. Es ten kualidadis bunitu. N sabe ma es ta fadja, má tanbê N ta odja klaru ma es é fiel. N ta spera ma pesoas ta fla mésmu kuza di mi óras ki N ten ses idadi.” — Annette.
Personájens di Bíblia. “N skodje alguns algen ki Bíblia ta pâpia di el ki N krê imita, sima Timótiu, Rute, Jó, Pedru i kel minininha israelita. N skodje kada un di es pamodi motivus diferenti. Sima N ta ba ta studa sobri es, es ta bira más rial pa mi. N gosta txeu di lé kes stória di livru Imite a sua fé, i tanbê kel párti ‘Exemplo a seguir’ di livru Bons respósta pa perguntas ki jóvens ta faze.” — Melinda.

Konsedju: Skodje más di ki un algen pa bu imita. Apóstlu Paulu fla irmons: “Nhos kontinua ta imita tanbê kes ki sta ta sigi izénplu ki nu dexa nhos.” — Filipensis 3:17.

Bu sabia? Bu pode ser un bon izénplu pa otus algen! Bíblia ta fla: “Bira un izénplu pa kes ki é fiel na bu manera di pâpia, na konportamentu, na amor, na fé i na puréza.” — 1 Timótiu 4:12.

“Sikrê inda bu sta sforsa pa midjora bus kualidadi, bu pode djuda otus algen midjora tanbê. Sen bu sabe, algen pode sta ta djobe pa bo, i kel ki bu ta fla pode muda se vida.” — Kiana.