Kuzê ki Deus krê pa tudu algen?

ÓRAS ki bu ta lé un jornal, odja notísias na tilivizon ô obi rádiu, bu ta odja i bu ta obi un monti kuza mariadu ki sta ta kontise, sima krimi, géra i terorismu. Talvês bu sta ta sufri pamodi un duénsa ô pamodi móre un algen ki bu ta ama.

Pergunta bu kabésa:

É kel-li ki Deus krê pa mi i pa nha família?
Undi ki N ta atxa ajuda pa N lida ku nhas prubléma?
Algun dia ta ben ten pas na mundu?

Bíblia ta da respóstas klaru pa kes pergunta li.

BÍBLIA TA INXINA MA DEUS TA BEN FAZE TXEU MUDANSA NA TÉRA.

Tudu dór ta kaba. Ningen ka ta bira bédju más i nen ka ta móre más. – Apocalipse 21:4
‘Algen manku ta ben salta sima viadu’. – Isaías 35:6
‘Odjus di algen ségu ta ben abri’. – Isaías 35:5
Kes algen ki móre ta ben vive otu bês. – João 5:28, 29
Ningen ka ta ben fika duenti. – Isaías 33:24
Ta ben ten txeu kumida pa tudu algen na Téra. – Salmo 72:16

KUZÊ KI BÍBLIA TA INXINA PODE DA-U UN GRANDI AJUDA

Un Tistimunha di Jeová ta studa Bíblia ku un ómi

É faxi bu pensa ma kuza ki bu lé na kes primeru pájina di es livru é ka verdadi, é sima si algen sta ta sunha. Má é Deus ki faze kes promésa li i ka ta dura el ta ben faze kes mudansa li na Téra. Bíblia ta splika-nu modi ki el ta ben faze-s.

Má Bíblia pode djuda-nu gósi. El ta fla-nu kuzê ki nu meste sabe pa nu ten un vida filís di verdadi gósi. Pensa na bus prubléma. Pur izénplu, falta di dinheru, prublémas na família, duénsa ô mórti di un algen ki bu ta ama. Bíblia pode djuda-u lida ku kes prubléma li. I sabe respóstas di kes pergunta li pode konsola-u:

Pamodi ki nu ta sufri?
Modi ki nu pode lida ku nos prublémas?
Nu pode ten un família filís?
Pa undi nu ta bai óras ki nu móre?
Nu pode ben odja otu bês nos família i amigus ki dja móre?
Pamodi ki nu pode ten sertéza ma Deus ta ben kunpri tudu se promésas?

Si bu sta ta lé es livru é pamodi bu krê sabe kuzê ki Bíblia ta inxina. Es livru ta ben djuda-u. Tudu parágrafus ten perguntas, ki ta djuda-u ntende Bíblia midjór. Ten milhons di algen ki gosta di studa Bíblia ku Tistimunhas di Jeová. Nu ta spéra ma bo tanbê bu ta gosta. Deus ta bênsua-u sima bu ta ba ta prende kes verdadi ki sta na Bíblia!