Izaías
33 Ai di bo, distruidor ki ka distruídu,
Traidor ki ka traídu!
Óras ki bu tirmina di distrui, bu ta distruídu.
Óras ki bu tirmina di trai, bu ta traídu.
2 Ó Jeová, ten péna di nos.
Nos speransa sta na bo.
Bira nos brasu* tudu palmanhan,
Sin, nos salvason na ténpu di frónta.
3 Povus ta fuji óras ki es obi un barudju fórti,
Nasons ta spadja óras ki bu labanta.
4 Sima gafanhotu ta djunta, é si tanbê ki es ta ben djunta bus kuza di valor.
Pesoas ta ben djunta na es sima un núven di gafanhotu.
5 Jeová ta ben dadu glória,
Pamodi el ta mora la di riba na séu.
El ta ben intxi Sion di kel ki é justu i rétu.
6 El ta poi bu vida* ta fika suguru,
Kel-li é un grandi tizoru:*
Grandi salvason, sabedoria, konhisimentu i grandi ruspetu pa Jeová.
7 Nhos odja! Ses erói ta grita na rua,
Kes mensajeru di pas ta txora maguadu.
8 Kes strada sta dizértu,
Ka ten ningen ta pasa pa kes kaminhu.
9 Kel téra li sta di lutu* i el sta ta kaba.
Líbanu sta ku vergónha, dja el kaba tudu.
Saron fika sima un dizértu,
I Bazan i Karmelu perde ses folha.
10 Jeová fla: “Gósi N ta ben labanta,
Gósi N ta ben glorifika nha kabésa,
Gósi N ta ben mostra nha puder.
11 Nhos planu i nhos trabadju ka ta sirbi pa nada. Es é sima padja séku i kes padja ki resta.*
Nhos manera di pensa mariadu é sima lumi ki ta ben kaba ku nhos.
12 I kes povu ta ben bira sima un kuza ki kemadu ku kal.
Es ta ben arde na lumi, sima pé di spinhu ki kortadu.
13 Anhos ki sta lonji, nhos obi kuzê ki N ta ben faze!
I nhos ki sta pértu, nhos rekonhese nha puder!
14 Kes pekador na Sion sta xeiu di medu,
Kes ki rabela kóntra Deus sta ta treme di medu i es ta fla:
‘Kal di nos ki ta pode mora na undi ki ten un lumi fórti?
Kal di nos ki ta pode vive na meiu di un lumi ki ka ta paga?’
15 Kel ómi ki ta anda sénpri na justisa,
Ki ta pâpia verdadi,
Ki ta nega kel lukru ki ganhadu ku dizonestidadi i ku mintira,
I ki se mô ta nega subornu envês di seta-l,
Ki ta tapa obidu pa ka obi kes konbérsu sobri mata algen,
I ki ta fitxa odju pa ka odja kel ki é mau,
16 El ta ben mora na kes lugar altu.
Se proteson suguru* ta ben ser na rótxa ki é sima fortaléza,
El ta ben resebe se pon,
I se agu nunka ka ta kaba.”
17 Bus odju ta ben odja un rei na se glória,
Es ta ben odja pa un téra lonji.
18 Na bu korason bu ta ben lenbra di* medu di pasadu i bu ta fla:
“Undi ki sekretáriu sta?
Undi ki kel ómi ki ta pagaba taxa sta?
Undi ki kel algen ki ta kontaba tori sta?”
19 Bu ka ta ben odja kel povu aroganti más,
Un povu ki se língua é difísil dimás pa intende,
Ki ten un língua stranhu* ki bu ka ta konsigi intende.
20 Odja pa Sion, kel sidadi ki nu ta faze nos fésta!
Bus odju ta ben odja Jiruzalen sima un lugar trankuilu pa mora,
Un ténda ki ka ta ben tradu di se lugar.
Se staka di ténda nunka ka ta ben rinkadu,
I ninhun di ses kórda ka ta ben rabentadu.
21 I la, Jeová, kel Deus xeiu di glória,
Ta ben ser pa nos sima un lugar di riu i di kes kanal largu,
Na undi ninhun grupu di barku ki ten rému ka ta ben pasa
I ninhun barku bunitu ka ta ben navega.
22 Pamodi Jeová é nos Juís,
Jeová é Kel ki ta da-nu lei,
Jeová é nos Rei,
É El ki ta salva-nu.
23 Kes kórda di inimigu* ta ben fika froxu,
Es ka ta ben konsigi aguenta mastru nen isa véla.
Na kel ténpu, txeu kuza di valor ta ben divididu,
Ti kes algen manku ta ben toma txeu kuza.
24 I ningen* ka ta ben fla: “N sta duenti.”
Kel povu ki ta mora na kel téra ta ben purduadu ses éru.