Izaías
24 Nhos odja! Jeová sta ta tra tudu algen di kel téra li* i el ta ben fika bandonadu.
El ta ben bira-l di kabésa pa baxu i el ta spadja kes algen ki ta mora na el.
2 Ta ben kontise mésmu kuza ku tudu algen:
Povu i saserdóti,
Sérvu i se sinhor,
Sérva i se sinhora,
Kel ki ta kunpra i kel ki ta bende,
Kel ki ta inprista i kel ki ta toma inpristadu,
Kel ki ta inprista dinheru i kel ki ta debe dinheru.
3 Tudu algen ta ben tradu di kel téra li,
Ta ben tomadu tudu kuza ki ten na el,
Pamodi é Jeová ki fla kes palavra li.
4 Kel téra ta ben fika di lutu,* el ta ben kaba.
Kel txon ki ta da kumida ta ben seka, el ta ben dizaparse.
Kes algen inportanti di kel téra ta ben fika fraku.
5 Kel téra fika inpuru pamodi kes algen ki ta mora na el,
Pamodi es dexa di obi ku kes lei,
Es muda kes mandamentu,
I es viola kel kontratu ki é pa tudu ténpu.*
6 É pur isu ki kel maldison sta ta kaba ku kel téra li,
I kes algen ki ta mora na el é kulpadu.
É pur isu ki kes algen ki ta mora na el bira poku,
I dja resta poku ómi.
7 Vinhu novu sta di lutu, kel pé di uva sta ta seka,
I tudu kes ki ten korason kontenti sta ta jeme.
8 Kel son alégri di kes panderu dja tirmina,
Kel barudju di kes algen ki gosta di fésta dja kaba,
Kel son alégri di arpa dja tirmina.
9 Es ta bebe vinhu sen múzika,
I bebida alkólika ten gostu margós pa kes ki ta bebe-l.
10 Kel sidadi ki bandonadu sta distruídu,
Tudu kes kaza sta fitxadu, asi pa ningen ka entra na es.
11 Na rua es sta grita ta pidi vinhu.
Tudu ses filisidadi dja kaba,
Alegria di kel téra li dja dizaparse.
12 Kel sidadi sta tudu distruídu,
Kel porton kebradu tudu.
13 Pamodi é si ki ta ben kontise na kel téra li, entri kes povu di kes otu nason:
Ta ben ser sima óras ki olivera sakudidu,
I sima óras ki kes réstu di uva ta panhadu na fin di kodjéta.
14 Es ta ben labanta ses vós,
Es ta ben grita di alegria.
Désdi mar* es ta ben pâpia di grandéza di Jeová.
15 É pur isu ki es ta ben da Jeová glória na kes zóna di lus,*
Na kes ilha di mar, es ta ben da glória pa nómi di Jeová, kel Deus di Israel.
16 Nu sta obi kántiku désdi kes párti más lonji di téra:
“Glória* pa kel Justu!”
Má N fla: “N sta ta kaba, N sta ta kaba!
Ai di mi! Kes traisueru aji ku falsidadi,
É ku traison ki kes traisueru aji ku falsidadi.”
17 Abo ki ta mora na kel téra li, txeu medu, braku i armadilhas sta ta spera-u.
18 Ken ki fuji di barudju ki ta da medu ta ben kai na braku,
I ken ki sai di braku ta panhadu na armadilha.
Pamodi kes pórta na séu ta ben abridu,
I kes alisérsi di téra ta ben treme.
19 Kel téra li dja abri,
El sakudidu,
I el sta ta treme ku txeu forsa.
20 Kel téra li sta da di ladu, sima un algen ki sta moku,
El sta balansa pa li i pa la, sima un kabana na béntu.
Ses pekadu sta peza txeu riba di el,
I el ta ben kai i el ka ta labanta nunka más.
21 Na kel ténpu, Jeová ta ben kastiga kes poderozu ki sta la di riba na séu
I kes rei di téra, na téra.
22 I es ta ben djuntadu
Sima algen prézu na un braku,
I es ta ben podu prézu na kadia.
Dipôs di txeu dia es ta ben kastigadu.*
23 Lua xeia ta ben fika ku vergónha,
I sol ki ta brilha ta ben fika ku vergónha,
Pamodi Jeová di izérsitu bira Rei na monti Sion i na Jiruzalen,
El bira xeiu di glória dianti di kes ansion di se povu.*