23 Статьяр
«Фысакъ... зыми зыдевмыгъэшэх»!
«Фысакъ, мы дунейм и философие нэпцІымкІэ, цІыхухэр щызыгъауэмкІэ зыми зыдевмыгъэшэх» (КОЛ. 2:8).
96-НЭ УЭРЭДЫР Алыхьым и Псалъэм хъугъуэфІыгъуэ куэд итщ
МЫ СТАТЬЯР ЗЫТЕПСЭЛЪЫХЬЫРa
1. Колоссэ 2:4, 8 зэритымкІэ, дауэ ШейтІаным ди гупсысэкІэр зэІигъэхьэну зэрыхэтыр?
ШЕЙТІАНЫР хуейщ дэ Иеговэ къэдгъэнэну. Абы щхьэкІэ ШейтІаным ди гупсысэкІэр зэІигъэхьэу, езым и гупсысэкІэр къытхипщэну хэтщ. Абы дыкъигъэпцІэну хуейщ, езым жиІэр дгъэзэщІэн щхьэкІэ. ШейтІаным сыткІэ дыдихьэхыфынуми ещІэ икІи фІыуэ ахэр къегъэсэбэп. (Къеджэ Колоссэ 2:4, 8.)
2, 3. 1) Колоссэ 2:8 итыр сыт зыщыдгъэгъупщэ щІэмыхъунур? 2) Мы статьям сыт щызэпкърытхынур?
2 Пэж дыдэу ШейтІаным дэ дыкъигъэпцІэфыну пІэрэ? ДикъигъэпцІэфынущ. Колоссэ 2:8 ит Паул и псалъэхэр уафэм кІуэну гугъэ зиІэхэм хуэгъэзат (Кол. 1:2, 5). Ахэр ШейтІаным къигъэпцІэнкІэ шынагъэ щыІэт. Абы дыкъимыгъэпцІэн щхьэкІэ дэри нэхъыбэжу дыхуэсакъын хуейщ (1 Кор. 10:12). Сыт щхьэкІэ? ШейтІаныр щІылъэм кърадзыхащ икІи абы Иеговэ и лэжьакІуэхэр къигъэпцІэну хэтщ (Апок. 12:9, 12, 17). Абы нэмыщІ ди зэманым «цІыху бзаджэхэми гъэпцІакІуэхэми я бзаджагъэм» кІуэтэхукІэ хагъахъуэ (2 Тим. 3:1, 13).
3 Мы статьям дэ щызэпкърытхынущ ШейтІаным и пцІымкІэ ди гупсысэкІэр зэІигъэхьэну зэрыхэтыр икІи абы и «гъэпцІагъэ мурадхэм» щыщу щыр къэтщІэнущ (Еф. 6:11). КъыкІэлъыкІуэ статьям щызэпкърытхынущ ШейтІаным и дунейм къытхипщауэ гупсысэкІэ диІэхэр зыхэднэн щхьэкІэ сыт тщІэн хуейми. Ауэ япэщІыкІэ дытепсэлъыхьынщ израил цІыхухэр Иеговэ къызэригъэгугъа щІыналъэм ихьа иужь ШейтІаным дапхуэдэу ахэр къигъэпцІами икІи а Іуэхугъуэм сыт хуэдэ дерс хэтхыфынуми къэтщІэнщ.
ИЗРАИЛ ЦІЫХУХЭР ТХЬЭ НЭПЦІХЭМ ХУЭЛЭЖЬЭНУ ШЕЙТІАНЫМ ЗЭРЫХУИГЪЭУШАР
4—6. Второзаконие 11:10, 11 зэритымкІэ, сытым израил цІыхухэм зыхурагъэсэн хуей хъуа, Алыхьым къаритыну къызэригъэгугъауэ щыта щІыналъэм ихьа иужь?
4 ШейтІаным израил цІыхухэр дэкум хуэдэу къигъэпцІащ — ахэр тхьэ нэпцІхэм хуэлэжьэну хуигъэушащ. Дауэ абы ар зэрищІар? ШейтІаным ищІэт ахэр ерыскъы зэрыхуэныкъуэри, ар къигъэсэбэпащ. Алыхьым къаритыну къызэригъэгугъауэ щыта щІыналъэм израил цІыхухэр ихьа иужь, щІым зэрелэжьын хуей Іэмалхэм зрагъэсэн хуей хъуащ. Мысырым я губгъуэхэм псы щІагъэлъэдэн щхьэкІэ Нил псы ежэхыр къагъэсэбэпт. Ауэ израил цІыхухэр зихьа щІыналъэм апхуэдэ псышхуэ щыІэтэкъыми, щІым телажьэхэр уэшх къешххэмрэ уэсэпсхэмрэ щыгугъын хуейт. (Къеджэ Второзаконие 11:10, 11b; 11:12—15; Ис. 18:4, 5.) Израил цІыхухэм дежкІэ тынштэкъым щІым зэрелэжьын хуей Іэмалхэм зрагъэсэну, сыт щхьэкІэ жыпІэмэ щІым зэрытелэжьэн хуей щІыкІэр зыщІэхэм я нэхъыбэр губгъуэ нэщІым щылІат.
Дауэ ШейтІаным израил цІыхухэм я гупсысэкІэр зэрызэІигъэхьар? (4—6-нэ абзацхэм феплъ.)e
5 Иеговэ израил цІыхухэм къагуригъэІуащ здыщыпсэу щІыпІэм щыІэ псэукІэм зрагъэсэн зэрыхуейр. ИкІи иужькІэ абыхэм яжриІар щІым телэжьэным зыкІи пымыщІауэ къыпщыхъункІэ хъунущ: «Фысакъ, фигухэр димыхьэхын щхьэкІэ икІи сэ сыкъэвгъанэу нэгъуэщІ тхьэхэм фахуэлажьэу абыхэм щхьэщэ яхуэвмыщІын щхьэкІэ» (Втор. 11:16, 17). ЩІым зэрелэжьын хуей Іэмалхэм зрагъэсэну Иеговэ израил цІыхухэм щажриІэм щыгъуэ тхьэ нэпцІхэм зыщахъумэну сыт щІажриІар?
6 Израил цІыхухэр я гъунэгъуу псэу лъэпкъхэм зыхуагъазэу щІым зэрытелэжьэн хуей щІыкІэм теухуауэ къащІэну зэрахуеинур Иеговэ ищІэт. ДауикІ, абыхэм я гъунэгъуу псэу лъэпкъхэм щІым зэрытелэжьэн хуейм теухуауэ нэхъыбэ ящІэт икІи израил цІыхухэр куэдым хурагъэсэфынут, ауэ абы шынагъэ пылът. Ханаан щІыналъэм щыпсэу щІым телажьэ цІыхухэр Ваалым хуэлажьэт икІи я диным пыщІат щІым зэрелэжь щІыкІэр. Абыхэм ялъытэт Ваалыр уафэм и тепщэу щыту икІи абы уэшх къригъэшхыу. Иеговэ хуейтэкъым апхуэдэ еплъыкІэ нэпцІхэм израил цІыхухэр щигъэуэну. Ауэ израил цІыхухэм мызэ-мытІэу Ваал хуэлэжьэныр къыхахащ (Чис. 25:3, 5; Суд. 2:13; 1 Цар. 18:18). Дауэ ШейтІаным абыхэм я гупсысэкІэр зэрызэІигъэхьар?
ИЗРАИЛ ЦІЫХУХЭМ Я ГУПСЫСЭКІЭР ЗЭІИГЪЭХЬЭН ЩХЬЭКІЭ ШЕЙТІАНЫМ КЪИГЪЭСЭБЭПА ІЭМАЛИЩ
7. Алыхьым къаритыну къызэригъэгугъа щІыналъэм израил цІыхухэр ихьа иужь я фІэщхъуныгъэр сыт хуэдэ гъэунэхуапІэ ихуа?
7 ШейтІаным къигъэсэбэпа япэ Іэмалыр сыт хуэдэ? Израил цІыхухэр зыхуейр, ахэр зыхуэныкъуэр къигъэсэбэпащ: ахэр уэшх къешхыным хуэныкъуэт, гъавэ яІэн щхьэкІэ. Мэлыжьыхьым и кІэм щыщІэдзауэ, фокІадэм и кІэм нэс а щІыналъэм уэшх мащІэт къыщешхыр. Израил цІыхухэм я гъавэри, къапщтэу щытмэ, я гъащІэри уэшхым елъытат, и нэхъыбэм уэшх къешхын щыщІидзэр жэпуэгъуэрат. ШейтІаным ахэр къигъапцІэри я фІэщ ищІащ гъавэ бэв яІэн щхьэкІэ тхьэ нэпцІ куэд зиІэ лъэпкъхэм я хабзэхэр къащтэн хуейуэ. А лъэпкъхэм я фІэщ хъут тхьэхэм уэшх кърагъэшхын щхьэкІэ зы Іуэхугъуэ гуэрхэр пщІэн хуейуэ. Иеговэ быдэу зи фІэщ мыхъу израил цІыхухэм уэгъу щымыІэн щхьэкІэ тхьэ нэпцІ Ваалым зыгуэр хуащІэн хуейуэ ялъытэу щІадзащ икІи абы хуэлажьэ хъуащ.
8. ШейтІаным къигъэсэбэпа етІуанэ Іэмалыр сыт хуэдэ?
8 ШейтІаным къигъэсэбэпа етІуанэ Іэмалыр сыт хуэдэ? Абы израил цІыхухэм хъуэпсэныгъэ мыхъумыщІэхэм гъуэгу иратыну хуигъэушащ. НэгъуэщІ лъэпкъхэм зинэ щІэным пыщІа мыхъумыщІагъэ куэд ящІэт, я тхьэхэм щыхуэлажьэкІэ. Тхьэ нэпцІхэм щыхуэлажьэ унэм къэхьпагъэ зыщІэ цІыхухъухэри цІыхубзхэри щыІэт. ЦІыхухъуитІ е цІыхубзитІ зэгъусэнымрэ зинэ щІэным пыщІа нэгъуэщІ Іуэху Іейхэмрэ ядэ къудейтэкъым, атІэ ар тэмэму, апхуэдэу щытын хуейуэ къалъытэт! (Втор. 23:17, 18; 1 Цар. 14:24). Тхьэ нэпцІхэм хуэлажьэхэм я фІэщ хъут апхуэдэ Іуэху мыхъумыщІэхэр зэращІэм и фІыгъэкІэ тхьэхэр арэзы ящІу икІи гъавэ бэв къратыну. Израил цІыху куэдым ягу ирихьат зинэ щІэным пыщІа Іуэхугъуэхэр, абы къыхэкІкІэ тхьэ нэпцІхэм хуэлэжьэн щІадзащ. Апхуэдэу ШейтІаным абыхэм я гупсысэкІэр зэІигъэхьащ.
9. Осия 2:16, 17 зэритымкІэ, ШейтІаныр дауэ зэрыхэтар Иеговэ хэтми израил цІыхухэм ящигъэгъупщэну? (Сноскэм феплъ.)
9 ШейтІаным къигъэсэбэпа ещанэ Іэмалыр сыт хуэдэ? Иеговэ хэтми израил цІыхухэм ящигъэгъупщэну хэтащ. Бегъымбар Иеремия и зэманым Иеговэ жиІауэ щытащ ШейтІаным ар дапхуэдэу ищІами: бегъымбар нэпцІхэм израил цІыхухэм Алыхьым и цІэр щагъэгъупщащ «Ваалым щхьэкІэ» (Иер. 23:27). Израил цІыхухэм Алыхьым и цІэр къагъэсэбэпын щагъэтри, ар Ваал цІэкІэ яхъуэжащ, абы «зиусхьэн», «зи ІэмыщІэ ІэщІэлъыр» къикІыу аращ. Абы къыхэкІкІэ израил цІыхухэм Иеговэ хуэлэжьэнымрэ Ваалым хуэлэжьэнымрэ яфІызэхэзэрыхьри тІуми хуэлажьэу щІадзащ. (Къеджэ Осия 2:16, 17c.)d
НОБЭ ШЕЙТІАНЫМ КЪИГЪЭСЭБЭП ІЭМАЛХЭР
10. ШейтІаным нобэ сыт хуэдэ Іэмалхэр къигъэсэбэпрэ?
10 ШейтІаным къигъэсэбэп Іэмалхэм захъуэжакъым. Нобэ цІыхухэм я гупсысэкІэр зэІигъэхьэн щхьэкІэ ахэр зыхуейр, зыхуэныкъуэр къегъэсэбэп, хъуэпсэныгъэ мыхъумыщІэхэм гъуэгу иратыну хуегъэуш икІи Иеговэ хэтми къаримыгъэщІэну хэтщ. ЯпэщІыкІэ иужьрей Іэмалыр зэпкърытхынщ.
11. Сыт ШейтІаным ищІар цІыхухэм Иеговэ хэтми къамыщІэн щхьэкІэ?
11 ШейтІаным Иеговэ хэтми цІыхухэм къаримыгъэщІэну хэтщ. Апостолхэр лІа иужь Хьисэ и лъэужь ирикІуэу зызыбжыж языныкъуэхэм гупсысэ нэпцІхэм цІыхухэр хурагъаджэу щІадзащ (Апост. 20:29, 30; 2 Фес. 2:3). Алыхьым епцІыжа а цІыхухэм Иеговэ теухуа пэжыр зрахъуэкІыу щІадзащ. Псалъэм папщІэ, Библием и копие щащІым щыгъуэ, абыхэм Алыхьым и цІэр ямытхыу, «Зиусхьэн», «Тхьэ» титулхэмкІэ ар яхъуэжащ. Абы къыхэкІкІэ Библием еджэхэм я дежкІэ гугъут къагурыІуэну Иеговэ адрей «тхьэхэм» къазэрыщхьэщыкІыр (1 Кор. 8:5). Алыхьым епцІыжахэм Иегови Хьиси ЗиусхьэнкІэ зэреджэм щхьэкІэ, цІыхухэм къагурыІуэтэкъым Иеговэрэ абы и Къуэмрэ зыуэ зэрыщымытыр икІи увыпІэ яІыгъыр зэрызэхуэмыдэр (Ин. 17:3). Апхуэдэу зэрызэхагъэзэрыхьам къыхэкІкІэ цІыхухэм Тхьэнапищыр я фІэщ хъууэ щІадзащ, абы теухуауэ Алыхьым и Псалъэм зыри зэримытым емылъытауэ. Абы къыхэкІкІэ Алыхьыр зэи къыпхуэмыцІыхуну щэху гуэру щыту куэдым къащыхъуу хъуащ. Сыту Іейуэ ШейтІаным цІыхухэр къигъэпцІа! (Апост. 17:27).
ШейтІаным дин нэпцІыр къигъэсэбэпу цІыхухэр дауэ зэрыхуигъэушыр хъуэпсэныгъэ мыхъумыщІэхэм гъуэгу иратыну? (12-нэ абзацым феплъ.)f
12. Дин нэпцІым цІыхухэр сытым хуигъэушрэ икІи Рим 1:28—31 зэрыжиІэмкІэ, сыт абы кърикІуэр?
12 ШейтІаным цІыхухэр хуегъэуш хъуэпсэныгъэ мыхъумыщІэхэм гъуэгу иратыну. Израил цІыхухэр зинэ щІэным хуигъэушын щхьэкІэ ШейтІаным дин нэпцІыр къигъэсэбэпу щытащ. Ноби абы ар дыдэращ ищІэр. Дин нэпцІыр зинэ щІэным тэмэму хущытщ, уеблэмэ, абы зыри Іей хэмылъу цІыхухэр егупсысыну хуегъэуш. Абы щхьэкІэ Алыхьым хуэлажьэу цІыху куэдым жаІэми, Библием гурыІуэгъуэу ит хабзэхэр ягъэзащІэкъым. Паул Рим дэсхэм яхуитха письмом къыщыхигъэщащ Алыхьым и хабзэхэм ебэкъуэным сытым ухуишэми. (Къеджэ Рим 1:28—31.) «ЕмыкІу Іуэхуу» Паул зи гугъу ищІам хохьэ зинэ щІэным пыщІа сыт хуэдэ Іуэхугъуэри, псалъэм папщІэ цІыхухъуитІ е цІыхубзитІ зэгъусэныр (Рим 1:24—27, 32; Апок. 2:20). Дэ, Иеговэ и лэжьакІуэхэм, Библием гурыІуэгъуэу ит хабзэхэм дытетыным мыхьэнэшхуэ иІэщ.
13. ШейтІаным иджыри сыт хуэдэ Іэмал къигъэсэбэпыр?
13 ШейтІаным цІыхухэр зыхуейр, зыхуэныкъуэр къегъэсэбэп. Ди щхьэр тпІыжын икІи ди унагъуэр зыхуей хуэдгъэзэн щхьэкІэ щІэныгъэ зэдгъэгъуэтыну дызэрыхуейм зыри Іей хэлъкъым (1 Тим. 5:8). Школым фІыуэ ущеджэмэ, апхуэдэ щІэныгъэ зэбгъэгъуэтыфынущ. Ауэ абы шынагъэ хэлъщ. Къэрал куэдым я еджапІэхэм щІалэгъуалэм зыхуэныкъуэ щІэныгъэрэ ІэщІагъэрэ щызрагъэгъуэтыфынуми, апхуэдэ еджапІэхэм ШейтІаным и дунейм и гупсысэкІэр щІалэгъуалэм хапщэ. Абыхэм Алыхьыр зэрыщыІэм шэч къытрахьэу щІадзэ икІи Библием дзыхь хуащІкъым. Абыхэм къыжраІэ дунейр къызэрыхъуар эволюцием псом нэхърэ нэхъ пэжу къыбгуригъаІуэу (Рим 1:21—23). А псор «Тхьэм и акъылыфІагъэм» пэщІоувэ (1 Кор. 1:19—21; 3:18—20).
14. Мы дунейм и Іущагъым цІыхухэр сытым хуигъэушрэ?
14 Мы дунейм и еплъыкІэр Иеговэ и хабзэхэм пэщІоувэ. А еплъыкІэм Алыхьым и къару лъапІэм къыбгъэдэкІ хьэл-щэнхэр зыхэплъхьэну ухуигъэушкъым, атІэ «гуэныхьыщІэ щэныжьым къыхэкІ Іейхэр» пщІэну ухуигъэушу аращ (Гал. 5:19—23). Апхуэдэ еплъыкІэм и зэранкІэ цІыхухэр пагэу, щхьэхуещэу икІи «езыхэм фІыуэ залъагъужу» мэхъу (2 Тим. 3:2—4). А хьэл-щэнхэр Алыхьым и лэжьакІуэхэм яхэлъын хуей Іэдэбагъым пэщІоувэ (2 Сам. 22:28). Алыхьым и лэжьакІуэ языныкъуэхэм щІэныгъэ нэхъыщхьэ зрагъэгъуэта иужь ШейтІаным и дунейм и еплъыкІэр къащтащ. Зы щапхъэ зэпкърытхынщ.
Мы дунейм и еплъыкІэр ди гупсысэкІэм дауэ зэран зэрыхуэхъуфынур? (14—16-нэ абзацхэм феплъ.)g
15, 16. Ди зы шыпхъум и щапхъэм сытым фыхуигъасэрэ?
15 Илъэс 15 хъуауэ полновременнэу лажьэ ди зы шыпхъум жеІэж: «Сэ Иеговэ и Щыхьэту сыщытт икІи щІэныгъэ нэхъыщхьэ зэбгъэгъуэтыным шынагъэ зэрыпылъыр сщІэт, ауэ абы мыхьэнэшхуэ есттэкъым. Ар сэ сэмыхьэлІауэ къысщыхъут». Сыт абы кърикІуар? Абы жеІэж: «ЕджапІэм къарурэ зэман куэдрэ тезгъэкІуэдэн хуей хъути, Иеговэ лъэІукІэ зыхуэзгъэзэну зэман хухэсхыфтэкъым. Хуабжьу сызэрезэшым къыхэкІкІэ, Алыхьым и Псалъэм итымкІэ цІыхухэм садэгуэшэну икІи зэІущІэхэм зыхуэзгъэхьэзырыну къару къысхуэнэжтэкъым. Си насыпщи, Иеговэ хузиІэ ныбжьэгъугъэм еджапІэр зэран зэрыхуэхъур къыщыслъэгъуам, зыгуэр зэрысхъуэжын хуейр къызгурыІуащ. Абы къыхэкІкІэ университетыр къэзгъэнащ».
16 Университетым зэрыщеджар дауэ ди шыпхъум и еплъыкІэм зэран зэрыхуэхъуар? Ар къыддогуашэ: «Сэ иджыпсту ар жысІэжыну соукІытэ, ауэ цІыхухэм я щыуагъэхэмрэ ныкъусанхэмрэ фІэкІ фІым гу лъызмытэу сыхъуат, псом хуэмыдэу си дэлъху, си шыпхъухэм. Сэ абыхэм яхузэфІэмыкІын яхуэзгъэувт икІи апхуэдэуи сахыхьэтэкъым. Зэман куэд дэкІын хуей хъуащ си еплъыкІэр схъуэжын щхьэкІэ. КъысщыщІам къызгуригъэІуащ уафэм щыІэ ди Адэм и организацэр къигъэсэбэпу къыдит чэнджэщхэм уебэкъуэным шынагъуэшхуэ зэрыпылъыр. Сэ зэрызысцІыхужым нэхърэ нэхъыфІу Иеговэ сицІыхут. Щхьэ абы семыдэІуарэ!»
17. 1) Сыт дэ дызыхущІэкъун хуейр? 2) Сыт къыкІэлъыкІуэ статьям щызэпкърытхынур?
17 ШейтІаным «мы дунейм и философие нэпцІымкІэ, цІыхухэр щызыгъауэмкІэ... зыдевмыгъэшэх». Абы зыкъевмыгъэгъапцІэ (1 Кор. 3:18; 2 Кор. 2:11). Иеговэ хэтми фщигъэгъупщэну ШейтІаныр хуит фымыщІ. Алыхьым и хабзэхэм фытету фыпсэу. Иеговэ чэнджэщ къыдитхэр ІэщІыб фымыщІ. Ауэ сыт пщІэн хуейр ШейтІаным и дунейр зэран къыпхуэхъуауэ гу лъыптамэ? КъыкІэлъыкІуэ статьям къыдгуригъэІуэнущ хьэл мыхъумыщІэхэмрэ еплъыкІэхэмрэ зыхэднэну Алыхьым и Псалъэр къызэрыддэІэпыкъунур (2 Кор. 10:4, 5).
49-НЭ УЭРЭДЫР Иеговэ и гур гъэгуфІэ
a ШейтІаныр къэгъэпцІэнкІэ Іэзэщ. Абы цІыху куэдым къащегъэхъу хуитыныгъэ яІэу, ахэр абы и ІэмыщІэ илъми. Мы статьям щызэпкърытхынущ цІыхухэр къигъэпцІэн щхьэкІэ ШейтІаным къигъэсэбэп Іэмалищ.
b Второзаконие 11:10, 11: «Сыт щхьэкІэ жыпІэмэ, зыІэрыбгъэхьэну уздэкІуэ щІыналъэр укъыздикІыжа Мысыр щІыналъэм ещхькъым. Абы фэ жылэхэр щыхэфсэт икІи щІым, хадэм хуэдэу, фи лъакъуэмкІэ псы щІэфкІэн хуейт. Ауэ зыІэрывгъэхьэну фыздэкІуэ щІыналъэр — бгыхэмрэ аузхэмрэ здэщыІэ щІыналъэщ, уафэм къешх уэшхыр абы иреф».
c Осия 2:16, 17: «А махуэм къэхъунущ,— жеІэ Иеговэ,— уэ „силІ“ жыпІэу укъызэджэнущ икІи „зи ІэмыщІэ сызыІэщІэлъыр“ жыпІэу афІэкІа укъызэджэнукъым. Ваа́л тхьэнапэхэм я цІэхэр жамыІэжын хуэдэу сщІынущ икІи ахэр афІэкІа къащІэжынукъым».
d 16-нэ едзыгъуэм ит „зи ІэмыщІэ сызыІэщІэлъыр“ жыхуиІэ псалъэхэр «си Ваал» жыпІэу зэбдзэкІ хъунущ.
e СУРЭТЫР. Хананейхэм я гъусэ израил цІыхухэр щІохъуэпс Ваалым хуэлэжьэну икІи зинэ щІэным пыщІа Іуэхугъуэхэм хэтыну.
f СУРЭТЫР. Члисэм и рекламнэ плакатым тетым икІи плъыфэ зэмыфэгъухэм къагъэлъагъуэ члисэм цІыхухъуитІ е цІыхубзитІ зэгъусэныр зэридэр.
g СУРЭТЫР. Ди шыпхъу ныбжьыщІэр университетым щоджэ. Ар къыдеджэхэм я гъусэу наукэмрэ технологиемрэ цІыхубэм я гугъуехьу хъуар зэрагъэкІуэдыным теухуа лекцэм дихьэхауэ йодаІуэ. Ди шыпхъур дыщызэхуэс Унэм щозэш икІи ар къуэш, шыпхъухэм я щыуагъэхэмрэ ныкъусанхэмрэ фІэкІ фІым гу лъимытэу хъуащ.