Дауэ лъагъуныгъэрэ захуагъэрэ зэрыбгъэлъагъуэ хъунур зыгуэрым гуэныхь хьэлъэ щищІам деж? (ІыхьиплІым и ещанэр)

1—3. 1) Псалом 5:4—6 къызэрыхэщымкІэ, дауэ Иеговэ мыхъумыщІагъэм зэрыхущытыр? 2) Сабийм лей ехыныр «Мэссихь и унафэм» пэщІэувэу сыт жыпІэ щІэхъунур?

ИЕГОВЭ дэтхэнэ зы мыхъумыщІагъэри илъагъу хъукъым. (Къеджэ Псалом 5:4—6b.) Псом хуэмыдэу, сабийм лей щрахым деж. Ар гущыкІыгъуэ щІэпхъаджагъэщ! Алыхьым хуэдэу, дэри, Иеговэ и Щыхьэтхэм, апхуэдэ Іуэхугъуэр тлъагъу хъукъым. Апхуэдэ бзаджагъэр, хьэбыршыбырыгъэр зэхуэсым щыІэн хуейкъым (Рим 12:9; Евр. 12:15, 16).

² Сабийм лей къытегъэхьэныр, ар сыт хуэдэ щІыкІэуи ирехъу — «Мэссихь и унафэм» пэщІоувэ (Гал. 6:2). Сыт щхьэкІэ? Мыбы ипэ дджа статьям зэритамкІэ, Хьисэ и унафэм — абы зыхуригъаджэу щыта псом, и щапхъэри абы хэту — лъагъуныгъэр лъабжьэ хуохъу икІи захуагъэм утетыну ухуегъэуш. А хабзэм тету Иеговэ и лэжьакІуэхэр сабийхэм фІыуэ хущытщ, абы и фІыгъэкІэ сабийхэр шынэкъым икІи зыхащІэ фІыуэ къызэралъагъур. Зинэ пщІэуэ сабийм лей епхыныр — икъукІэ гущІэгъуншагъэщ. А щІэпхъаджагъэм сабийр шынэу икІи фІыуэ къызэралъагъум шэч къытрихьэу ещІ.

³ Ди жагъуэ зэрыхъунщи, сабийм лей ехыным мы дунейм зыщиубгъуащ. А мыхъумыщІагъэр Иеговэ и Щыхьэтхэми щалъэІэс щыІэщ. «ЦІыху бзаджэхэри гъэпцІакІуэхэри» дунейм тез хъуащ икІи абыхэм ящыщ гуэр зэхуэсым къыхыхьэнкІэ хъунущ (2 Тим. 3:13). Абы нэмыщІ зэхуэсым щыщ гуэрхэми я хъуэпсэныгъэ мыхъумыщІэхэм зыдрагъэхьэхыу сабийм лей щраха къэхъуащ. Иеговэ ар гуэныхь хьэлъэу щІилъытэм и щхьэусыгъуэр адэкІэ зэпкърытхынщ. ИужькІэ дытепсэлъыхьынщ зэхуэсым щыщ гуэрым апхуэдэ гуэныхь ищІамэ, зэхуэсым и нэхъыжьхэм сыт ящІэн хуейми икІи къэтщІэнщ адэ-анэхэм я сабийхэр абы дапхуэдэу щахъумэфынумиc.

ГУЭНЫХЬ ХЬЭЛЪЭ

4, 5. Сабийм лей ехыныр — ар сабийм зэран хуэхъу гуэныхьу сыт жыпІэ щІэхъунур?

⁴ Лей зраха сабийм гухэщІышхуэ иІэщ, абы нэмыщІ ар фІыуэ зылъагъу цІыхухэми — и Іыхьлыхэми, зэхуэсым щыщ къуэш шыпхъухэми — ар хуабжьу зыхащІэ. Сабийм лей ехыныр гуэныхьышхуэщ, абы кърикІуа гуауэшхуэр зэман куэдкІэ сабийм зыхещІэ.

⁵ А гуэныхьыр сабийм зэран хуохъу. НэгъуэщІхэм гуауэрэ гузэвэгъуэрэ езыгъэшэчым гуэныхь ещІэ. КъыкІэлъыкІуэ статьям къызэрыщытщІэнущи, апхуэдэ мыхъумыщІагъэ зыщІэм сабийм гуауэшхуэрэ зэранышхуэрэ къыхуехь. Абы сабийм дзыхь къызэрыхуищІыр къегъэсэбэпри къегъапцІэ, абы къыхэкІкІэ сабийм и гум шынэ илъ мэхъу. Дэ сабийхэр апхуэдэ щІэпхъаджагъэм щытхъумэн хуейщ икІи апхуэдэ лей къызытехьахэм дадэІэпыкъун, дгъэгушхуэн хуейщ (1 Фес. 5:14).

6, 7. Сабийм лей ехыныр — зэхуэсым зэран хуэхъуу икІи апхуэдэ гуэныхь зыщІэм къэрал унафэщІхэм хуэгъэза хабзэншагъэ ищІэу сыт жыпІэ щІэхъунур?

⁶ А гуэныхьыр зэхуэсым зэран хуохъу. Зэхуэсым щыщ гуэрым сабийм лей ирихамэ, абы зэхуэсым и напэр трех (Мт. 5:16; 1 Пет. 2:12). Фегупсысыт а гуэныхьыр зэран зэрахуэхъум «фІэщхъуныгъэм быдэу» тетыну хущІэкъу мелуан бжыгъэ хъу къуэш, шыпхъухэм! (Иудэ 3). ЦІыхум гуэныхь ищІэрэ, абы хущІемыгъуэжу зэхуэсым щыщхэм я пщІэ ириудыхмэ, ар Иеговэ и Щыхьэту адэкІи щыт хъунукъым.

⁷ Апхуэдэ гуэныхь зыщІэр къэрал унафэм йобакъуэ. Иеговэ и Щыхьэтхэр «тепщэныгъэ зиІэхэм яхуэІурыщІэу» щытын хуейщ (Рим 13:1). Абы къыхэкІкІэ къэралым и унафэхэм пщІэ хуэщІын икІи ахэр гъэзэщІэн хуейщ. Зэхуэсым щыщ гуэрым къэралым и унафэм ебакъуэу сабийм лей ирихмэ, абы къэрал унафэщІхэм хуэгъэза хабзэншагъэ ищІэу аращ (Евгъапщэ Апостолхэм 25:8.) Зэхуэсым и нэхъыжьхэм я къалэнкъым къэрал унафэм ебэкъуам тезыр тралъхьэну. Ауэ ахэр хэткъым сабийм лей езыха цІыхур къэралым къытрилъхьэну тезырым щахъумэну (Рим 13:4). Галатие 6:7 зэритымкІэ, «цІыхум хьэсэм трисэр къытрихыжынущ».

8. Зыгуэрым гуэныхь ищІэу, нэгъуэщІ цІыхум зэран хуэхъуныр Иеговэ сыту зэрилъытэр?

⁸ Апхуэдэ щІэпхъаджагъэ зыщІэм Алыхьым и пащхьэм гуэныхьышхуэ къыщехь (Пс. 51:4). Гуэныхь ищІэу нэгъуэщІ цІыхум зэран хуэхъум Иеговэ и пащхьэм гуэныхьышхуэ къыщехь. Алыхьым израил лъэпкъым ирита Хабзэм къызэрыхэщымкІэ, залымыгъэкІэ и гъунэгъум ей гуэр къытезыха е ар къэзыгъэпцІа цІыхур «Иеговэ епцІыжауэ» ябжт (Лев. 6:2—4). Апхуэдэ дыдэу сабийм лей ирихыу, абы и гум шынэ изылъхьэ цІыхур Иеговэ епцІыжауэ жыпІэ хъунущ. Апхуэдэ мыхъумыщІагъэ зыщІэм Иеговэ и цІэр егъэулъий. Абы къыхэкІкІэ зыгуэрым сабийм лей ирихыу щытмэ, ар мыхъумыщІагъэу икІи Алыхьым и пащхьэм гуэныхьышхуэ къыщихьу добж.

9. Библием тегъэщІа сыт хуэдэ темэхэр илъэс куэд щІауэ ди организацэм къыдигъэкІрэ икІи сыт щхьэкІэ?

⁹ Лей ехыным сабийхэр зэрыщыпхъумэным е апхуэдэу къэхъуамэ, узэрыдэІэпыкъуным теухуауэ Библием тегъэщІа темэхэр илъэс куэд щІауэ Иеговэ и организацэм къыдегъэкІ. Псалъэм папщІэ, «ХъумакІуэ чэщанэ», «Фыкъызэщыу!» журналхэр зэман-зэманкІэрэ топсэлъыхь лей зраха цІыхухэм гупсэхугъуэ зэрызрагъэгъуэтыжыфынум, нэгъуэщІхэр абыхэм къазэрыдэІэпыкъуфынум икІи адэ-анэхэм сабийхэр апхуэдэ мыхъумыщІагъэм зэрыщахъумэфынум. Ди организацэм Библием тегъэщІа чэнджэщхэр зэхуэсым и нэхъыжьхэм ярет апхуэдэ Іуэхугъуэхэр фІыуэ зэхагъэкІын щхьэкІэ. Зэман-зэманкІэрэ а чэнджэщхэм зыщахъуэж къохъу. Сыт щхьэкІэ? Зэхуэсым и нэхъыжьхэм Хьисэ и унафэм тету а Іуэхур зэхагъэкІын щхьэкІэ.

ЗЭХУЭСЫМ ГУЭНЫХЬ ХЬЭЛЪЭ ЗЫГУЭРЫМ ЩИЩІАМЭ

10—12. 1) Зыгуэрым зэхуэсым гуэныхь хьэлъэ щищІауэ, ар зэхуэсым и нэхъыжьхэм щызэхагъэкІым деж, сыт абыхэм зыщагъэгъупщэ мыхъунур? 2) Екъуб 5:14, 15 зэритымкІэ, зэхуэсым и нэхъыжьхэм сыт ящІэр?

¹⁰ Зыгуэрым зэхуэсым гуэныхь хьэлъэ щищІауэ, ар зэхуэсым и нэхъыжьхэм щызэхагъэкІым деж, абыхэм зыщагъэгъупщэ хъунукъым Хьисэ и унафэм тету нэгъуэщІхэм лъагъуныгъэ хэлъу зэрыхущытын хуейр, абы нэмыщІ Иеговэ пэжу икІи захуэу илъытэм зэрытетын хуейр. Сыт ахэр зэгупсысын хуейр? Япэ дыдэрауэ, Алыхьым и цІэр зэрагъэлъэпІэныращ (Лев. 22:31, 32; Мт. 6:9). Абы нэмыщІ абыхэм зыщагъэгъупщэкъым гуэныхь хьэлъэр зэран зыхуэхъуахэр зэрагъэгушхуэн хуейр икІи къуэш, шыпхъухэм ядэІэпыкъун зэрыхуейр, Иеговэрэ абыхэмрэ я зэхуаку зэхущытыкІэфІ дэлъын щхьэкІэ.

¹¹ Зэхуэсым щыщ гуэрым гуэныхь ищІауэ гурэ псэкІэ хущІегъуэжмэ, зэхуэсым и нэхъыжьхэр а цІыхум доІэпыкъу Иеговэ хуиІа ныбжьэгъугъэр зэтригъэувэжыну. (Къеджэ Екъуб 5:14, 15.) Хъуэпсэныгъэ мыхъумыщІэхэр зытригъакІуэу гуэныхь къэзыхьа Иеговэ и лэжьакІуэр сымаджэм ебгъэщхь хъунущ — Иеговэрэ абырэ я зэхуаку дэлъ зэхущытыкІэр зэІыхьащd. Зэхуэсым и нэхъыжьхэри дохутырым ебгъэщхь хъунущ. Абыхэм «сымаджэр» — гуэныхь къэзыхьар — зэрагъэхъужыным иужь итщ. Апхуэдэ цІыхум Иеговэ хуиІа ныбжьэгъугъэр зэтригъэувэжын щхьэкІэ, Библием ит пычыгъуэхэр къагъэсэбэпурэ зэхуэсым и нэхъыжьхэр абы йопсалъэ. Ауэ и гум къыбгъэдэкІыу ищІам хущІегъуэж цІыхуращ ахэр зыдэІэпыкъуфынур (Апост. 3:19; 2 Кор. 2:5—10).

¹² Зэрытлъагъущи, зэхуэсым и нэхъыжьхэм къалэнышхуэ я пщэ дэлъщ. Абыхэм лъагъуныгъэ яхэлъу Иеговэ дзыхь къахуищІа мэл цІыкІухэм кІэлъоплъ (1 Пет. 5:1—3). Зэхуэсым и нэхъыжьхэр хуейщ къуэш, шыпхъухэр зы щхьэкІи мышынэну икІи гупсэхугъуэ зыхащІэну. Абы къыхэкІкІэ, гуэныхь хьэлъэ зыгуэрым ищІауэ щытмэ, псалъэм папщІэ сабийм лей ирихамэ, зэхуэсым и нэхъыжьхэм а Іуэхур занщІэу зэрызэхагъэкІыным иужь итщ. Зэхуэсым и нэхъыжьхэр зэгупсысын хуей мыхьэнэшхуэ зиІэ упщІищ адэкІэ зэпкърытхынщ.

13, 14. Сабийм лей ирахауэ зыгуэрым гурыщхъуэ ищІу зэхуэсым и нэхъыжьхэм къащІамэ, полицэм жраІэн хуей? КъыдгурывгъаІуэ.

¹³ Сабийм лей ирахауэ зыгуэрым гурыщхъуэ ищІу зэхуэсым и нэхъыжьхэм къащІамэ, полицэм жраІэн хуей? Хуейщ. Къэралым и унафэмкІэ апхуэдэ Іуэхур полицэм жеІэн хуеймэ, зэхуэсым и нэхъыжьхэр а унафэм тетщ (Рим 13:1). А унафэр Иеговэ и хабзэхэм пэщІэувэкъым (Апост. 5:28, 29). Абы къыхэкІкІэ сабийм лей ирахауэ зыгуэрым гурыщхъуэ ищІу зэхуэсым и нэхъыжьхэм къащІамэ, абыхэм занщІэу филиалым зыпащІэ, апхуэдэ Іуэхугъуэ къэхъуа иужь къэралым и хабзэмкІэ ящІэн хуейр зэхагъэкІын папщІэ.

¹⁴ Зэхуэсым и нэхъыжьхэм лей зрахам, абы и адэ-анэм икІи а Іуэхум щыгъуазэ нэгъуэщІ цІыхухэм къыгурагъаІуэ лей зыгуэрым ирахауэ абыхэм гурыщхъуэ ящІмэ полицэм жраІэну хуитыныгъэ зэраІэр. Абы къыхэкІкІэ мыпхуэдэ упщІэ къэхъеинкІэ хъунущ: ягъэкъуаншэр зэхуэсым щыщмэ икІи а Іуэхур зэхуэсым хэтхэм нэмыщІ нэгъуэщІ цІыхухэми къащІэмэ, къэхъуар полицэм жезыІэ Иеговэ и лэжьакІуэм Алыхьым и цІэр имыгъэулъийуэ пІэрэ? Хьэуэ. Алыхьым и цІэр зыгъэулъийр сабийм лей езыхаращ.

15, 16. 1) 1 Тимофей 5:19 зэритымкІэ, сыт зэхуэсым и нэхъыжьхэм ящІэн хуейр правовой комитет ящІын ипэ икІи сыт щхьэкІэ? 2) Зэхуэсым щыщ гуэрым сабийм лей ирихауэ ягъэкъуаншэу щытмэ, зэхуэсым и нэхъыжьхэм сыт ящІэр?

¹⁵ Зэхуэсым и нэхъыжьхэм правовой комитет ящІын щхьэкІэ нэхъ мащІэ дыдэу щыхьэтитІ щыІэн щІыхуейр сыт? Ар Библием ит захуагъэм тохуэ. ЦІыхум гуэныхь хьэлъэ ищІауэ ягъэкъуаншэмэ, ауэ езым мыкъуаншэу жиІэу щытмэ, зэхуэсым и нэхъыжьхэм правовой комитет ящІ щыхъунур щыхьэтитІ щыІэу щытмэщ (Втор. 19:15; Мт. 18:16; къеджэ 1 Тимофей 5:19). Абы къикІрэ щыхьэтитІ щымыІэу щытмэ, сабийм лей ирахауэ щытынкІэ зэрыхъунур полицэм жеІэн хуэмейуэ? Хьэуэ. ЩІэпхъаджагъэ ящІауэ щытынкІэ зэрыхъунур полицэм жеІэн хуейщ, щыхьэтитІ щымыІэми.

¹⁶ Зэхуэсым щыщ гуэрым сабийм лей ирихауэ ягъэкъуаншэу зэхуэсым и нэхъыжьхэм къащІауэ щытмэ, абыхэм къэралым и унафэм тету а Іуэхур полицэм жраІэ. Абы иужь Библием итым тету а Іуэхур зэхагъэкІ правовой комитет щІын хуейрэ хуэмейрэ къагурыІуэн щхьэкІэ. Ягъэкъуаншэ цІыхум езым мыкъуаншэу жиІэмэ, зэхуэсым и нэхъыжьхэр щыхьэтхэм жаІэм йодаІуэ. Зэхуэсым и нэхъыжьхэм правовой комитет ящІынущ, нэхъ мащІэ дыдэу цІыхуитІым нэгъуэщІ цІыхур ягъэкъуаншэу щытмэ. Япэ щыхьэтыр — цІыхур зыгъэкъуаншэращ, етІуанэр — ягъэкъуаншэм а сабийм е нэгъуэщІ сабийм лей зэрырихам щыхьэт техъуэ гуэр жызыІэфынуращe. Ауэ зы щыхьэт фІэкІ щымыІэмэ-щэ? Абы къикІкъым зы цІыхум жиІэр пцІыуэ. Сабийм лей зэрырахам щыхьэт техъуэ цІыхуитІ щымыІэми, зэхуэсым и нэхъыжьхэм къагуроІуэ щІэпхъаджагъэ щыІауэ щытынкІэ зэрыхъунур. Апхуэдэ щІэпхъаджагъэ щыІауэ щытмэ, абы, дауикІ, нэгъуэщІхэм гуауэшхуэ къахуихьащ. Апхуэдэм деж зэхуэсым и нэхъыжьхэр сыт щыгъуи хьэзырщ дэІэпыкъуэгъу зыхуэныкъуэхэр ягъэгушхуэну. Абы нэмыщІ сабийм лей ирихауэ ягъэкъуаншэ цІыхум зэхуэсыр зэрыщахъумэным ахэр иужь итщ (Апост. 20:28).

17, 18. Правовой комитетым сыт и къалэныр?

¹⁷ Правовой комитетым сыт и къалэныр? А комитетым хыхьэ зэхуэсым и нэхъыжьхэм зэхагъэкІ гуэныхьышхуэ зыщІа цІыхур зэхуэсым хэт хъунрэ мыхъунрэ. Абыхэм унафэ ящІкъым сабийм лей езыхар къэралым и унафэм зэребэкъуам щхьэкІэ тезыр телъхьэн хуейрэ хуэмейрэ. Зэхуэсым и нэхъыжьхэм къагуроІуэ тезыр телъхьэн хуейрэ хуэмейрэ зэхэзыгъэкІыну зи къалэныр къэрал унафэщІхэрауэ зэрыщытыр (Рим 13:2—4; Тит 3:1).

¹⁸ Правовой комитетым хыхьэ зэхуэсым и нэхъыжьхэм Иеговэ дызэрыхуэлажьэм пыщІа Іуэхухэращ зэхагъэкІыр. Библием итыр къагъэсэбэпурэ абыхэм зэхагъэкІ гуэныхь хьэлъэ зыщІар хущІегъуэжрэ хущІемыгъуэжрэ. Ар хущІемыгъуэжу щытмэ, зэхуэсым хагъэкІ икІи ар зэрыхагъэкІар зэхуэсым щыжаІэ (1 Кор. 5:11—13). ХущІегъуэжу щытмэ, зэхуэсым хагъэкІкъым. Ауэ зэхуэсым и нэхъыжьхэм абы къыгурагъаІуэ пщІэ зыпылъ къалэнхэр зэи зэримыгъэзэщІэнкІэ хъунур. Зэхуэсым щыщ сабийхэр къахъумэн щхьэкІэ зэхуэсым и нэхъыжьхэр адэ-анэхэм щхьэхуэу зыхуагъазэу жраІэ хъунущ апхуэдэ гуэныхь зыщІа цІыхур я сабийхэм щригъусэм деж, зэрысакъын хуейр. Апхуэдэм деж зэхуэсым и нэхъыжьхэм адэ-анэхэм Іэмал имыІэу жраІэн хуейкъым а цІыхум лей зрихар хэтми.

АДЭ-АНЭХЭМ Я САБИЙХЭР ІЕЙМ ЩАХЪУМЭН ЩХЬЭКІЭ СЫТ ЯЩІЭ ХЪУНУР?

19—22. Адэ-анэхэм я сабийхэр дауэ зэрахъумэнур? (Обложкэм тет сурэтым феплъ.)

¹⁹ Япэ дыдэу сабийр зыхъумэну зи къалэныр адэ-анэращf. Фи сабийхэр — тыгъэ лъапІэщ, «Иеговэ къыбгъэдэкІ щІэинщ» (Пс. 127:3). Ахэр Іейм щыфхъумэну фи къалэнщ. Фи сабийхэм лей ирамыхын щхьэкІэ сыт фэ фщІэ хъунур?

²⁰ Япэрауэ, а щІэпхъаджагъэм теухуауэ нэхъыбэ къафщІэ. Фэ фщІэн хуейщ сыт хуэдэ цІыхухэм апхуэдэ щІэпхъаджагъэ ящІэфынуми икІи абыхэм сабийхэр дапхуэдэу къагъапцІэми. Апхуэдэ дапщэщ къэхъуфынуми фегупсыс (Прит. 22:3; 24:3, Гъэсэпэтхыдэхэр). Зыщывмыгъэгъупщэ: и нэхъыбэм деж сабийм лей езыхыр сабийм ицІыху икІи дзыхь зыхуищІ гуэрщ.

²¹ ЕтІуанэрауэ, абы теухуауэ фи сабийхэм фепсалъэ (Втор. 6:6, 7). Абы щхьэкІэ фи сабийхэм жаІэм фІыуэ федаІуэфу фыщытын хуейщ (Екъуб 1:19). Зыщывмыгъэгъупщэ: сабий куэдыр мэшынэ лей къызэрырахар жаІэжыну. Языныкъуэхэр мэгузавэ жаІэр нэгъуэщІхэм я фІэщ мыхъункІэ. Адрейхэм зыри жаІэкъым лей къезыхам зэригъэшынам щхьэкІэ. ЗыгуэркІэ гурыщхъуэ фщІыуэ щытмэ, щабэу, фыхуэсакъыу сабийм феупщІ икІи жиІэм фІыуэ федаІуэ.

²² Ещанэрауэ, фи сабийхэр вгъасэ. Сексым теухуауэ фи сабийм и ныбжьым хуэкІуэу щІэныгъэ бгъэдэфлъхьэ. Сабийхэм къагурывгъаІуэ зыгуэрым къемызэгъ гуэру зищІу, абыхэм къеІусэну щыхэтым деж зэрызащІын хуейр. Фи сабийхэр фхъумэн папщІэ организацэм къывитхэр къэвгъэсэбэп. («Адэ-анэхэмрэ сабийхэмрэ къадэІэпыкъунур» жыхуиІэ рамкэм феплъ.)

23. Сабийм лей ехыным дапхуэдэу дэ дызэрыхущытыр? Сыт къыкІэлъыкІуэ статьям щызэпкърытхынур?

²³ Дэ, Иеговэ и Щыхьэтхэм, сабийм лей ехыныр щІэпхъаджагъэ гущыкІыгъуэу икІи гуэныхь хьэлъэу долъытэ. Сабийм лей езыха цІыхур ищІа гуэныхьым кърикІуэхэм дэ щытхъумэну дыхэткъым, апхуэдэу Хьисэ и унафэм дытетщ. Ауэ лей зрахахэм дауэ уазэрыдэІэпыкъу хъунур? КъыкІэлъыкІуэ статьям ар щызэпкърытхынщ.