Хъуэпсэныгъэ Іейхэм упэлъэщыну уэ пхузэфІэкІынущ

1. ЦІыхухэр псори сыт хуэдэ гугъуехь зыпэщІэхуэр?

УЭ ЗЭГУЭР Иеговэ игу иримыхьын гуэр пщІэну ухуеяуэ пІэрэ? Ухуеяуэ щытмэ, абы щхьэкІэ умынэщхъей икІи уи Іэр йомыхьэх, сыт щхьэкІэ жыпІэмэ уэ уи закъуэкъым. Библием щыжыІащ: «ФызыпэщІэхуэ гъэунэхуапІэхэр къызэрыгуэкІщ, цІыху псори абыхэм пэщІохуэ» (1 Кор. 10:13, ДЩІ). Аращи, уэ хъуэпсэныгъэ Іей гуэрым уебэну щытмэ, зыщомыгъэгъупщэ, адрей цІыхухэри апхуэдэ хъуэпсэныгъэхэм зэребэныр. Иеговэ уи гъусэу уэ абы утекІуэфынущ.

2. Языныкъуэ къуэш, шыпхъухэмрэ Библием ирагъаджэхэмрэ сыт хуэдэ гъэунэхуапІэхэм пэщІэхуэрэ? (Сурэтхэми феплъ.)

² Библием иджыри щыжыІащ: «Езым и хъуэпсэныгъэ Іейхэрщ, зыІэпашэу икІи зэщІаубыдэу, а цІыхур дэзыхьэхыр» (Екъуб 1:14). Мы едзыгъуэм къыхощ хъуэпсэныгъэ Іейхэр дэтхэнэ зыми дызэриІэфынур. Псалъэм папщІэ, языныкъуэ къуэш, шыпхъухэр зинэ щІэным зыІэпешэ, уеблэмэ, языныкъуэ щІалэхэр щІалэ иригъусэну, языныкъуэ хъыджэбзхэр хъыджэбз иригъусэну хуейуэ щытыфынущ. Абы нэмыщІ порнографие еплъу щытахэр аргуэру а хьэл мыхъумыщІэм зыІэпишэнкІэ хъунущ. Апхуэдэ гугъуехь пэщІэхуэфынущ наркотик зэзыхьэлІэу е фадэкІэ езыгъэлейуэ щытахэри. Къуэш, шыпхъухэмрэ Библием ирагъаджэхэмрэ зыпэщІэхуэ нэгъуэщІ гъэунэхуапІэ куэд иджыри щыІэщ. Дэтхэнэ зыми ди гъащІэм къриубыдэу Паул иІа гурыщІэхэм хуэдэ диІауэ къыщІэкІынущ. Абы жиІат: «ФІы сщІэну сыхуейми, бзаджагъэр сяпэм къохутэ» (Рим 7:21).

3. Хъуэпсэныгъэ Іей гуэрым къытригъэзэжурэ цІыхур хигъэзыхьмэ, сыт абы зыхищІэнкІэ хъунур?

³ Хъуэпсэныгъэ Іей гуэрым къытригъэзэжурэ ухигъэзыхьмэ, абы упэщІэтыну къару лъэпкъ уимыІэу къыпщыхъуфынущ. Абы нэмыщІ апхуэдэ гурыщІэхэр узэриІэм щхьэкІэ Иеговэ арэзы пхуэмыщІыну уи гугъэфынущ. Ауэ ар зэрымыпэжыр быдэу уи фІэщ щІы. Мы статьям дэ упщІитІ щызэпкърытхынущ: 1) Хъуэпсэныгъэ Іейхэм дыпэщІэтыну къару лъэпкъ димыІэу икІи Иеговэ арэзы тхуэмыщІыну сыт дыщІигугъэфынур? 2) Хъуэпсэныгъэ Іейхэм дыпэлъэщыну сыт къыддэІэпыкъунур?

СЫТ ХУЭДЭ ГУРЫЩІЭХЭР ДИІЭНУ ШЕЙТІАНЫР ХУЕЙ?

4. 1) Хъуэпсэныгъэ мыхъумыщІэхэм дыпэщІэтыну къару лъэпкъ димыІэу къытщыхъуну ШейтІаныр щІыхуейр сыт? 2) Хъуэпсэныгъэ мыхъумыщІэхэм дызэрыпэщІэтыфынур дэнэ дэ щытщІэр?

⁴ ШейтІаныр хуейщ дэ къытщыхъуну хъуэпсэныгъэ Іейхэм дыпэщІэтыну къару лъэпкъ димыІэу. Хьисэ ар ищІэти и лъэужь ирикІуэхэр хуигъэушащ Алыхьым мыпхуэдэу елъэІуну: «МыхъумыщІагъэм дыдимыхьэхыну къыддэІэпыкъу, ШейтІанми дыщыхъумэ» (Мт. 6:13, ДЩІ). Иблисым зэрыжиІэмкІэ, цІыхур гъэунэхуапІэм пэщІэхуэмэ, и щІыб Иеговэ хуигъэзэнущ (Иов 2:4, 5). Абы къыщохъу езым хуэдэу псори щыту. Пэжыр жыпІэмэ, езыращ Иеговэ хуэпэжу къыхуэнэну хуэмейуэ хъуэпсэныгъэ Іейхэм зыдезыгъэхьэхар. Абы къыщыхъуу къыщІэкІынщ, дэри абы ещхьу, гъэунэхуапІэм дызэрыпэщІэхуэу Иеговэ къэдгъэнэну. Уеблэмэ, ШейтІаным хузэфІэкІын и гугъат дагъуэншэу щыт Алыхьым и Къуэр хъуэпсэныгъэхэм дригъэхьэхыну (Мт. 4:8, 9). Ауэ егупсысыт: пэж дыдэу, ди хъуэпсэныгъэ Іейхэр дэ нэхърэ нэхъ къарууэ икІи абыхэм дыпэщІэмытыфыну жыпІэ хъуну? ДауикІ, Іуэхур апхуэдэу щыткъым. Паул жиІа мы псалъэхэм дэри арэзы дытохъуэ: «ЛъэкІыныгъэ къызэзытым и къарукІэ псори сщІэн слъэкІынущ» (Флп. 4:13, ДЩІ).

5. Хъуэпсэныгъэ Іейхэм дызэрыпэщІэтыфынум Иеговэ шэч къызэрытримыхьэр дэнэ дэ щытщІэр?

⁵ ШейтІаным елъытауэ Иеговэ шэч лъэпкъ къытрихьэкъым хъуэпсэныгъэ Іейхэм дызэрыпэщІэтыфынум. Дэнэ дэ ар щытщІэр? Иеговэ ипэкІэ жиІауэ щытат цІыху куэдыкІейр абы хуэпэжу къанэу, гузэвэгъуэшхуэм зэрыпхырыкІынур. Абы къикІым егупсысыт. ПцІы зымыупс Алыхьым жеІэ: цІыху закъуэтІакъуэкъым, атІэ цІыху куэдыкІей «джанэ кІыхь хужьхэр ящыгъыу» дунеищІэм ихьэнущ. НэгъуэщІу жыпІэмэ, ахэр Алыхьым и еплъыкІэкІэ къабзэу щытынущ (Апок. 7:9, 13, 14). Зэрытлъагъущи, хъуэпсэныгъэ Іейхэм дыпэщІэтыну къару димыІэу Иеговэ къилъытэкъым.

6, 7. ШейтІаным сыт иджыри ди фІэщ ищІыну зыхэтыр?

⁶ ШейтІаным ди фІэщ ищІыну хэтщ дэ хъуэпсэныгъэ Іейхэм дыпэщІэтыну къару лъэпкъ димыІэу икІи апхуэдэ гурыщІэхэр дызэриІэм щхьэкІэ Иеговэ арэзы тхуэмыщІыну. ИпэкІэ зэрыжытІащи, абы и щхьэм псори трещІыхь. Пэжыр жыпІэмэ, езыращ хэкІыпІэ лъэпкъ зимыІэр икІи аращ гъащІэ мыухыж иІэну хуэмыфащэу Иеговэ къилъытэр (ЩІэдз. 3:15; Апок. 20:10). ШейтІаныр дэ хуабжьу къытхуогубжь, сыт щхьэкІэ жыпІэмэ къэкІуэным теухуауэ дэ диІэ гугъэм хуэдэ абы иІэкъым. Абы къыхэкІкІэ ШейтІаным къарууэ иІэр ирехьэлІэ, дэри ди Іуэхум хэкІыпІэ имыІэу къытщигъэхъун щхьэкІэ. Ауэ апхуэдэу дыщІегупсысын щхьэусыгъуэ лъэпкъ дэ диІэкъым. Иеговэ дэ апхуэдэукъым къызэрытхущытыр, ар хуейщ гъащІэ мыухыж диІэу дыпсэуну. Алыхьыр «зы цІыхуи кІуэдыну хуэмейуэ, цІыху псори я гуэныхьхэм хущІегъуэжыну хуейщ» (2 Пет. 3:9).

⁷ Хъуэпсэныгъэ Іейхэм дыщебэнкІэ, абыхэм дыпэлъэщыну къару димыІэу икІи Иеговэ арэзы тхуэмыщІыну дегупсысмэ, ШейтІаным и мурадыр къехъулІауэ жыпІэ хъунущ. Ар дигу идгъэлъмэ, абы дыпэщІэтыфынущ (1 Пет. 5:8, 9).

ГУЭНЫХЬЛЫУЭ ДЫЗЭРЫЩЫТЫМ КЪЫХЭКІКІЭ, СЫТ ХУЭДЭ ГУРЫЩІЭХЭР ДИІЭФЫНУ?

8. Хъуэпсэныгъэ Іейхэм дыпэщІэтыну сыт иджыри зэран къытхуэхъуфынур? (Псалом 51:5). («Псалъэхэм къикІыр» жыхуиІэми феплъ.)

⁸ Хъуэпсэныгъэ Іейхэм дыщебэнкІэ къару лъэпкъ димыІэу икІи Иеговэ арэзы тхуэмыщІыну дыщигугъэм деж, ар сыт щыгъуи ШейтІаным и ягъэу щыткъым. Абы иджыри и щхьэусыгъуэу щытыфынущ Іэдэмрэ Хьэуарэ къытхуагъэна гуэныхьырa (Иов 14:4; къеджэ Псалом 51:5).

9, 10. 1) Іэдэмрэ Хьэуарэ гуэныхь щащІам сыт хуэдэ гурыщІэхэр яІа? (Сурэтми феплъ.) 2) Гуэныхьыр дапхуэдэу зэран къызэрытхуэхъур?

⁹ Іэдэмрэ Хьэуарэ гуэныхь щащІам яІа гурыщІэхэр дигу къэдгъэкІыжынщ. Гуэныхь ящІа иужь абыхэм Иеговэ зыщагъэпщкІуу икІи я Іэпкълъэпкъхэр щІахъумэу щІадзащ. «Понимание Писания» жыхуаІэм абы теухуауэ мыпхуэдэу итщ: «Гуэныхьым къыхэкІкІэ, ахэр укІытэу, гузавэу икІи загъэкъуаншэу щІадзащ». А тІур пэшищ фІэкІа мыхъу унэм щІэубыдам хуэдэт. Ахэр зы пэшым икІыу нэгъуэщІ пэшым кІуэфынут, ауэ унэм къыщІэкІыфынутэкъым, нэгъуэщІу жыпІэмэ, я Іэпкълъэпкъым хэлъ гуэныхьым зыри яхуещІэнутэкъым.

¹⁰ ДауикІ, дэ ди Іуэхур Іэдэмрэ Хьэуарэ я Іуэхум хуэдэкъым, сыт щхьэкІэ жыпІэмэ щхьэщэхуж къурмэныпхъэр абыхэм ялъэІэскъым. Абыхэм елъытауэ а къурмэныпхъэм дэ гуэныхьыр тщхьэщихыфынущ икІи напэ къабзэ къыдитыфынущ (1 Кор. 6:11). Ауэ гуэныхь зэрытхэлъым къыхэкІкІэ, гъэщІэгъуэнкъым дэри дыукІытэу, дыгузавэу икІи зыдгъэкъуаншэу дызэрыщытыр. Библием зэритымкІэ, гуэныхьыр цІыхухэм хуабжьу зэран яхуохъу, уеблэмэ, Іэдэм ищІа гуэныхьым хуэдэ зымыщІахэми (Рим 5:14). Аращи, дэ дегупсысын хуейкъым гуэныхь зэрытхэлъым къыхэкІкІэ, Иеговэ зэрыфІэфІым хуэдэу дыщымытыфыну икІи ди къэкІуэным теухуауэ гугъэ лъэпкъ димыІэу. Апхуэдэ гупсысэ Іейхэм дебэныным мыхьэнэшхуэ иІэщ. Сыт дэ абыкІэ къыддэІэпыкъунур?

11. Хъуэпсэныгъэ Іейхэм дыпэщІэтыну къару димыІэу къытщыхъумэ, Рим 6:12 зэритымкІэ, сыт дэ тщІэн хуейр?

¹¹ Дэ гуэныхь зэрытхэлъым къыхэкІкІэ, иныкъуэхэм деж къытщыхъуфынущ хъуэпсэныгъэ Іейхэм дыпэщІэтыну тхузэфІэмыкІыну. Ауэ дэ апхуэдэу дегупсысын хуейкъым, сыт щхьэкІэ жыпІэмэ Библием дыхуегъэуш: «гуэныхьыр фи тепщэу щытыну хуит фымыщІ». (Къеджэ Рим 6:12, ДЩІ.) Аращи, хъуэпсэныгъэ Іейхэм дызыхуагъэушыр дэ тщІэн хуейуэ щыткъым (Гал. 5:16). Абыхэм дызэрыпэщІэтыфыным Иеговэ шэч лъэпкъ къытрихьэкъым, апхуэдэу щымытамэ, ар абыкІэ къыдэлъэІунутэкъым (Втор. 30:11—14; Рим 6:6; 1 Фес. 4:3). ГурыІуэгъуэщ дэ а гъэунэхуапІэхэм дызэрыпэлъэщыфыныр.

12. Иеговэ арэзы тхуэмыщІыну къытщыхъумэ, а гупсысэм дапхуэдэу дызэрыхущытын хуейр икІи сыт щхьэкІэ?

¹² Хъуэпсэныгъэ Іей дызэриІэм щхьэкІэ Иеговэ арэзы тхуэмыщІыну ди гугъэмэ-щэ? Апхуэдэу дыщІегупсысыр гуэныхь зэрытхэлъырауэ къыщІэкІынущ икІи а гупсысэр зытедгъэкІуэн хуейкъым. Библием жеІэ Иеговэ дэ ттеухуауэ псори зэрищІэр икІи къызэрыгурыІуэр гуэныхьыр дапхуэдэ щІыкІэу дэтхэнэ зыми зэран къытхуэхъуми (Пс. 103:13, 14; 1 Ин. 3:19, 20). Дэ ди хъуэпсэныгъэ Іейхэм дыпэщІэтмэ икІи ахэр дымыгъэзащІэмэ, Иеговэ къабзэу дыкъелъытэ. Сыт абы шэч къытетхьэн щІыхуэмейр?

13, 14. Хъуэпсэныгъэ Іей уигу къэкІауэ щытмэ, абы къикІрэ Иеговэ уэркІэ мыарэзыуэ? КъыдгурывгъаІуэ.

¹³ Библием къегъэлъагъуэ хъуэпсэныгъэ Іей уиІэнымрэ Іуэху Іей пщІэнымрэ зэрызэщхьэщыкІыр. Хъуэпсэныгъэ Іейр дигу къидмыгъэхьэну дэ сыт щыгъуи тхузэфІэкІыу щыткъым, ауэ Іуэху Іейр дымыщІэну дэ сыт щыгъуи тхузэфІэкІынущ. Псалъэм папщІэ, Коринф щыІа зэхуэсым щыщ языныкъуэхэр Хьисэ и лъэужь иувэн ипэ гомосексуалисту щытащ. Паул итхат: «Фэ фщыщ гуэрхэри абыхэм хуэдэ цІыхуу фыщытащ». НтІэ абы къикІыу пІэрэ абыхэм псым зыщІагъэуа иужь а хъуэпсэныгъэ Іейхэр зэи ягу къэмыкІауэ? Ар фІэщхъугъуейщ, сыт щхьэкІэ жыпІэмэ апхуэдэ хьэл-щэн Іейхэм лъабжьэ куу яІэщ икІи ахэр зыхэбнэну егъэлеяуэ гугъущ. Ауэ цІыхум зышыІэныгъэ игъэлъагъуэу и хъуэпсэныгъэ Іейхэм зыдримыгъэхьэхмэ, Иеговэ абы хуэарэзыуэ щытт. Алыхьым апхуэдэ цІыхур къабзэу къилъытэт (1 Кор. 6:9—11). Ноби апхуэдэ дыдэущ зэрыщытыр.

¹⁴ Сыт хуэдэ хъуэпсэныгъэ Іейхэм упэщІэмытми, уэ абыхэм утекІуэфынущ. Ахэр икІэм нэсу пхузыхэмыну щытми, уэ шыІэныгъэ бгъэлъагъуэу, уи «гуэныхьыщІэ щэныжьыр зыщІэхъуэпсу щыта Іуэху мыхъумыщІэхэм» упэлъэщыфынущ (Еф. 2:3). АдэкІэ дытепсэлъыхьынущ хъуэпсэныгъэ Іейхэм упэлъэщын щхьэкІэ къыбдэІэпыкъуну чэнджэщхэм.

ГЪЭУНЭХУАПІЭМ УПЭЛЪЭЩЫНУ СЫТ КЪЫБДЭІЭПЫКЪУНУР?

15. Уи щхьэр къызэромыгъэпцІэжыр хъуэпсэныгъэ Іейхэм упэщІэтыну дапхуэдэу къызэрыбдэІэпыкъур?

¹⁵ Хъуэпсэныгъэ Іейхэм упэлъэщыну къыбдэІэпыкъуну япэ лъэбакъуэр — ар уи щхьэр къомыгъэпцІэжын икІи уи ныкъусанхэр пщІэжыныращ (Екъуб 1:22). Псалъэм папщІэ, фадэкІэ езыгъэлейр мыпхуэдэу егупсысыфынущ: «Языныкъуэхэр сэ нэхърэ нэхъыбэ йофэ». Хэти и къуэншагъэр нэгъуэщІым трилъхьэу мыпхуэдэу жиІэфынущ: «Си щхьэгъусэр нэхъ щабэу къысхущытамэ, сэ порнографие сеплъынутэкъым». Ауэ апхуэдэ гупсысэкІэр хъуэпсэныгъэ Іейм упэлъэщыну къыбдэІэпыкъунукъым, атІэ нэхъри абы ухуигъэушынуращ. Аращи, уи щхьэр къомыгъэпцІэж икІи пщІэмкІэ жэуап птыжыну хьэзыру щыт (Гал. 6:7).

16. ГъэунэхуапІэхэм упэщІэтыну сыт иджыри къыбдэІэпыкъунур?

¹⁶ Уи ныкъусанхэр къызэрыбгурыІуэжам нэмыщІ иджыри унафэ быдэ пщІын хуейщ абыхэм зыдомыгъэхьэхыну (1 Кор. 9:26, 27; 1 Фес. 4:4; 1 Пет. 1:15, 16). Сытым нэхъ узыІэпишэми икІи абы уебэныну нэхъ къыщогугъуэкІыр дапщэщми зэхэгъэкІ. Псалъэм папщІэ, жэщым гувауэ е ущезэшам деж хъуэпсэныгъэ Іейхэм уебэныну нэхъ къогугъуэкІынкІэ хъунущ. ГъэунэхуапІэ ущихуэфыну Іуэхугъуэр уи нэгу къыщІэгъэхьи, абы узэрыпэщІэтыну щІыкІэм егупсыс. Абы упэщІэмыхуэ щІыкІэ, зыхуэбгъэхьэзырмэ нэхъыфІщ (Прит. 22:3).

17. Исуф и щапхъэм сытым дыхуигъасэрэ? (ЩІэдзапІэ 39:7—9). (Сурэтхэми феплъ.)

¹⁷ Дигу къэдгъэкІыжынщ Исуф ищІар, Потифар и щхьэгъусэм къыдихьэхыну щыхэтам щыгъуэ. Абы занщІэу, къехьэкІ-нехьэкІ имыІэу а цІыхубзым жриІащ зинэ зэримыщІэнур. (Къеджэ ЩІэдзапІэ 39:7—9.) Сыт абы къыдгуригъаІуэр? А Іуэхугъуэр къэхъун ипэ нэгъуэщІым и щхьэгъусэм зэрыхущытын хуейм теухуауэ Исуф еплъыкІэ пыухыкІа иІэт. Апхуэдэ дыдэу уэри ипэкІэ пыухыкІауэ унафэ пщІы хъунущ гъэунэхуапІэ упэщІэхуа иужь, сыт хуэдэ лъэбакъуэхэр пчынуми. Абы щыгъуэ гъэунэхуапІэм Іэнкун уищІынукъым икІи къэпщта унафэм нэхъ тыншу утетыфынущ.

«ЗЫВГЪЭУНЭХУЖ»

18. Хъуэпсэныгъэ Іейхэм дыпэлъэщыну сыт дэ иджыри къыддэІэпыкъунур? (2 Коринф 13:5).

¹⁸ Хъуэпсэныгъэ Іейхэм дыпэлъэщыну сыт дэ иджыри къыддэІэпыкъунур? Дэ сыт щыгъуи зыдгъэунэхужын хуейщ. (Къеджэ 2 Коринф 13:5.) Мыхьэнэшхуэ иІэщ зэман-зэманкІэрэ ди гупсысэхэмрэ ди ІуэхущІафэхэмрэ дыхэплъэжыным, зыгуэр тхъуэжын хуеймэ, къэтлъэгъун щхьэкІэ. Псалъэм папщІэ, хъуэпсэныгъэ гуэрым зыдомыгъэхьэхами, зэупщІыж: «Ар ІэщІыб сщІын щхьэкІэ зэман дапщэ ихьар?» ТІэкІу зиплъэфыхьауэ къыпщыхъумэ, уи гур хомыгъэщІ. Абы и пІэкІэ уи тІасхъапІэхэр бгъэбыдэн щхьэкІэ къарууэ уиІэр ехьэлІэ. Мыпхуэдэ упщІэхэм егупсыс: «Гупсысэ Іейхэр дапхуэдэу псынщІэу ІэщІыб сщІырэ? А зэманыр нэхъ мащІэ схуэмыщІыну пІэрэ? ГъэунэхуапІэхэм сыпэщІэтыну зэран къысхуэхъу нэгу зегъэужьыкІэхэр къыхэзмыхыу пІэрэ? Сурэт къемызэгъ гуэр къэслъагъумэ, занщІэу си нэр абы тезгъэкІрэ? Иеговэ и хабзэхэм сытетын щхьэкІэ, зышыІэныгъэ зэрызгъэлъэгъуэн хуейм емылъытауэ, ахэр псом нэхърэ зэрынэхъыфІым арэзы сытехъуэу пІэрэ?» (Пс. 101:3).

19. Мыхьэнэшхуэ зимыІэу къытщыхъу Іущагъ зыхэмылъ унафэхэр хъуэпсэныгъэ Іейхэм дебэныну дапхуэдэу зэран къызэрытхуэхъуфынур?

¹⁹ Абы нэмыщІ зыщыбгъэунэхужым деж уи щхьэр къомыгъэпцІэж. Библием щыжыІащ: «Гур псом нэхърэ нэхъ бзаджэщ икІи Іейуэ зэІыхьащ» (Иер. 17:9). Хьисэ жиІат «гупсысэ бзаджэхэр» гум къызэрикІыр (Мт. 15:19). Псалъэм папщІэ, порнографие еплъын щызыгъэтам зэман гуэр дэкІа иужь шынагъэ зыри щымыІэжу и гугъэу, «ЦІыху пцІанэ дыдэ теткъым» жиІэу, хъуэпсэныгъэ къезытын сурэт гуэрхэм еплъыфынущ. Е ар мыпхуэдэу егупсысыфынущ: «Хъуэпсэныгъэ къемызэгъ гуэрхэр щызмыщІэкІэ ахэр си нэгу къыщІэзгъэхьэмэ, сыт абы Іейуэ хэлъыр?» Пэжыр жыпІэмэ, апхуэдэ цІыхум «гуэныхьыщІэ щэныжьым и хъуэпсэныгъэ мыхъумыщІэхэр» зэригъэзэщІэным егупсысу щІидзауэ жыпІэ хъунущ (Рим 13:14). Апхуэдэ къапхъэн зэрыщыІэр зыщомыгъэгъупщэ! Іущагъ зыхэмылъ Іуэху мащІэхэми зыщыхъумэ, сыт щхьэкІэ жыпІэмэ абыхэм хуэм-хуэмурэ гуэныхь хьэлъэхэм ухуашэфынущ.b Хъуэпсэныгъэ Іейхэр тэмэму къыпщызыгъэхъу гупсысэхэр занщІэу ІэщІыб щІы.

20. Ди къэкІуэнум теухуауэ Иеговэ сыт хуэдэ гугъэ къыдитыр икІи нобэ дапхуэдэу ар къызэрыддэІэпыкъур?

²⁰ КъызэрытщІащи, Иеговэ къызэрыддэІэпыкъум и фІыгъэкІэ дэ гъэунэхуапІэхэм дыпэлъэщыфынущ. Абы нэмыщІ щхьэщэхуж къурмэныпхъэм и фІыгъэкІэ гъащІэ мыухыж диІэу дунеищІэм дыщыпсэуну гугъэ дахэ диІэщ. Абы щыгъуэ гупсысэ къабзэрэ гу къабзэрэ диІэу Иеговэ дыхуэлэжьэфынущ. Сыту фІыуэ щытыну а зэманыр! Ауэ ар къэсыху дэ хъуэпсэныгъэ Іейхэм дебэнын щыдгъэтынкъым. Дэ дощІэ Иеговэ ди гъусэу Іэмал имыІэу абы дызэрытекІуэфынур!