Чэнджэщ къыщыдатым деж...

1. Іущагъ зыхэлъ унафэхэр къэтщтэну икІи ди мурадхэр къыдэхъулІэну сыт къыддэІэпыкъунур? (Притчи 13:10; 15:22).

ДЭ ПСОМИ Іущагъ зыхэлъ унафэхэр къэтщтэну икІи ди мурадхэр къыдэхъулІэну дыхуейщ. Библием зэритымкІэ, ахэр къыдэхъулІэн щхьэкІэ дэ чэнджэщыфІым дыхуэныкъуэщ. (Къеджэ Притчи 13:10; 15:22.)

2. Иеговэ сыткІэ дыкъигъэгугъэрэ?

² ДауикІ, псом нэхърэ нэхъ чэнджэщыфІ къыдэзытыфынур — Іущагъышхуэ зыбгъэдэлъ ди Адэ Иеговэщ. Абы мыпхуэдэу дыкъегъэгугъэ: «Чэнджэщ уэстынщ икІи сыпкІэлъыплъынщ» (Пс. 32:8). Мы псалъэхэм къагъэлъагъуэ Иеговэ дэ тщыщ дэтхэнэ зыри къызэрыфІэІуэхур. Абы чэнджэщыфІхэр къыдит къудейуэ аракъым, атІэ ахэр къэдгъэсэбэпынуи къыддоІэпыкъу.

3. Мы статьям сыт щызэпкърытхынур?

³ Мы статьяр дэ къыддэІэпыкъунущ Библием ит принципхэм куууэ дегупсысыну икІи мы упщІэхэм жэуап еттыну: 1) ЧэнджэщыфІым седэІуэну сыт хуэдэ хьэл-щэнхэр къыздэІэпыкъуну? 2) ЧэнджэщыфІ хэт къызэзытыфынур? 3) Чэнджэщхэм седэІуэну хьэзыру сызэрыщытыр дапхуэдэу къызэрызгъэлъэгъуэнур? 4) Си пІэкІэ нэгъуэщІым унафэ къищтэну селъэІун щІыхуэмейр сыт?

ЧЭНДЖЭЩЫМ СЕДЭІУЭНУ СЫТ ХУЭДЭ ХЬЭЛ-ЩЭНХЭР КЪЫЗДЭІЭПЫКЪУНУ?

4. Чэнджэщым сэбэпынагъ къытхуихьын щхьэкІэ сыт хуэдэ хьэл-щэнхэм дыхуэныкъуэ?

⁴ Къапщтэмэ, чэнджэщыр дапхуэдэу фІыуэ щымытами, абы демыдаІуэу щытмэ, сэбэпынагъ къытхуихьынукъым. Аращи, Іэдэбу икІи ди зэфІэкІыр здынэсыр тщІэжу дыщытыным мыхьэнэшхуэ иІэщ. Иныкъуэхэм деж ди щІэныгъэр щытхуримыкъу е зыхэдмыщІыкІ Іуэхугъуэ дыпэщІохуэ. Абы щыгъуэ дэІэпыкъуэгъу дызэрыхуэныкъуэм арэзы дытехъуэн хуейщ. Дэ Іэдэбу икІи ди зэфІэкІыр здынэсыр тщІэжу дыщымытмэ, Иеговэ къыддэІэпыкъуфынукъым. Абы и Псалъэм дызэджэу хъуар зы тхьэкІумэмкІэ ихьэнурэ адреймкІэ къикІыжынущ (Мих. 6:8; 1 Пет. 5:5). Ауэ а хьэл-щэнхэр тхэлъмэ, Иеговэ жиІэм фІыуэ дедэІуэнущ икІи ар занщІэу дгъэзэщІэнущ.

5. Даут пагэ щІэхъуфынур сытыт?

⁵ Даут и щапхъэм сытым дыхуигъасэми дегупсысынщ. Абы иІа ехъулІэныгъэхэм къыхэкІкІэ, ар зыкъыфІэщІыжу, пагэ хъуфынут. Псалъэм папщІэ, Даут пащтыхь хъун ипэ музыкант цІэрыІуэу щытащ, уеблэмэ, ар пащтыхьым и пащхьэ макъамэ щеуэну кърагъэблагъэт (1 Сам. 16:18, 19). Абы нэмыщІ Иеговэ ар пащтыхь ищІыну къыщыхихам и къару лъапІэр иритащ (1 Сам. 16:11—13). Иджыри Даут зауэлІ хахуэу зэрыщытам икІи иныжь ДжэлутІ зэриукІам щхьэкІэ израил цІыхухэм абы щІыхь къыхуахьт (1 Сам. 17:37, 50; 18:7). Ар пагэу щытамэ, апхуэдиз ехъулІэныгъэ зэриІэм щхьэкІэ зыми и чэнджэщым хуэмыныкъуэу егупсысыфынут. Ауэ Даут цІыху Іэдэбу щытт.

6. Даут чэнджэщхэр лъапІэу илъытэу зэрыщытар дэнэ дэ щытщІэр? (Сурэтми феплъ.)

⁶ Даут пащтыхь хъуа иужь, Іущагъ зыхэлъ чэнджэщхэр къезытын ныбжьэгъухэр зригъэгъуэтащ (1 Лет. 27:32—34). Ар гъэщІэгъуэнкъым, сыт щхьэкІэ жыпІэмэ Даут и гъащІэм къегъэлъагъуэ абы чэнджэщыфІхэр лъапІэу илъытэу зэрыщытар. Ар цІыхухъухэм имызакъуэу, цІыхубзхэми я чэнджэщхэм едаІуэт. Псалъэм папщІэ, Даут Авигея и чэнджэщым едэІуащ. А цІыхубзым и щхьэгъусэ Навал пхъашэт, фІыщІэ и гум илътэкъым икІи щхьэхуещэу щытт. Даут Іэдэбагъ игъэлъагъуэу, Авигея и чэнджэщым зэредэІуам и фІыгъэкІэ щыуагъэшхуэ ищІакъым (1 Сам. 25:2, 3, 21—25, 32—34).

7. Даут и щапхъэм сытым дыхуигъасэрэ? (Экклезиаст 4:13). (Сурэтхэми феплъ.)

⁷ Даут и щапхъэм сытым дыхуигъасэрэ? Дэ зыгуэрым фІыуэ хэтщІыкІыу е увыпІэ гуэр диІэу щытыфынущ. Апхуэдэм дежи дэ дегупсысын хуейкъым псори тщІэуэ икІи зыми и чэнджэщ дыхуэмыныкъуэу. Абы нэмыщІ хэт чэнджэщ къыдимытами, а чэнджэщыр фІыуэ щытмэ, абы дедаІуэмэ нэхъыфІщ. (Къеджэ Экклезиаст 4:13.) Абы щыгъуэ ди щхьэми, нэгъуэщІхэми зэран хуэхъуну щыуагъэхэм зыщытхъумэфыну къыщІэкІынщ.

ЧЭНДЖЭЩЫФІ ХЭТ КЪЫЗЭЗЫТЫФЫНУР?

8. Сытыт Ионафан Даут чэнджэщыфІ щІритыфынур?

⁸ Иджыри зы дерсым дыхэплъэнщ. Даут Иеговэ фІыуэ зылъагъу цІыхухэм я чэнджэщым едаІуэт. Ауэ абы и дежкІэ иджыри мыхьэнэ иІэт ар зыпэщІэхуа гугъуехьхэр а цІыхухэм къагурыІуэу щытыным. Псалъэм папщІэ, Даут Щаулрэ абырэ я зэхущытыкІэр зэтригъэувэжыну иужь щихьам щыгъуэ, ар Ионафан ечэнджэщащ. Сытыт абы Даут чэнджэщыфІ щІритыфынур? Ионафанрэ Иеговэрэ я зэхуаку зэхущытыкІэфІ дэлът икІи абы Щаул фІыуэ ицІыхути аращ (1 Сам. 20:9—13). Сытым абы дыхуигъасэрэ?

9. Хэт чэнджэщыфІ къыдэзытыфынур? Щапхъэ къэфхь (Притчи 13:20).

⁹ Дэ чэнджэщ къыщытлъыхъуэм деж, Іущагъ хэлъщ Иеговэ фІыуэ зэрилъагъум имызакъуэу, дызыгъэгузавэ упщІэми фІыуэ хэзыщІыкІ цІыхум депсэлъэнымa. (Къеджэ Притчи 13:20.) Псалъэм папщІэ, къуэш щІалэщІэм щхьэгъусэ къилъыхъуэу жытІэнщ. Хэт абы чэнджэщыфІ къезытыфынур? Ар щхьэгъусэ зимыІэ цІыхууи щытыфынущ, абы и псалъэхэр Библием тегъэщІауэ щытмэ. Ауэ къуэшыр Алыхьым и еплъыкІэ зиІэ, насыпыфІэу щыт икІи езыри фІыуэ къэзыцІыху зэщхьэгъусэхэм епсалъэмэ, сэбэп нэхъ къыхуэхъун чэнджэщ абы къыІэрыхьэну къыщІэкІынщ.

10. Сыт адэкІэ зэпкърытхынур?

¹⁰ Дэ дытепсэлъыхьащ сыт хуэдэ хьэл-щэнхэр тхэлъын икІи хэт дечэнджэщын хуейми. АдэкІэ зэпкърытхынщ чэнджэщхэм дедэІуэну хьэзыру дыщытын щІыхуейр икІи ди пІэкІэ нэгъуэщІым унафэ къищтэну делъэІун щІыхуэмейр.

ЧЭНДЖЭЩХЭМ СЕДЭІУЭНУ ХЬЭЗЫРУ СЫЗЭРЫЩЫТЫР ДАПХУЭДЭУ КЪЫЗЭРЫЗГЪЭЛЪЭГЪУЭНУР?

11, 12. 1) Сытым дыхуэсакъын хуей? 2) Ровоам мыхьэнэшхуэ зиІэ унафэ къищтэн щыхуеям сыт ищІар?

¹¹ Иныкъуэхэм деж цІыхум чэнджэщ къилъыхъуэу къыпщыхъуфынущ, ауэ къызэрыщІэкІымкІэ, абы унафэ тэмэм къищтауэ къыжезыІэн цІыху къилъыхъуэу аращ. Абы и еплъыкІэм темыхуэ чэнджэщ зыри зэхихынукъым. Апхуэдэ цІыхум и Іуэхур шынагъуэу жыпІэ хъунущ, сыт щхьэкІэ жыпІэмэ пащтыхь Ровоам къыщыщІам хуэдэ абыи къыщыщІыфынущ.

¹² Сэлмэн лІа иужь абы и къуэ Ровоам пащтыхьу теуващ. Сэлмэн пащтыхьу щытетам щыгъуэ цІыхухэр хуэщІауэ псэут, ауэ абы ахэр куэдыІуэу игъэлажьэу къалъытэт. Ровоам теува иужь цІыхухэр абы и деж къакІуэри къелъэІуащ я лэжьыгъэр нэхъ мащІэ ищІыну. Абы жиІащ егупсысу иужькІэ жэуап зэраритыжынур. Япэ щІыкІэ абы и адэм и чэнджэщэгъуу щыта нэхъыжьхэм я еплъыкІэр къищІащ. Къапщтэмэ, ар Іущагъ зыхэлъ лъэбакъуэт (1 Цар. 12:2—7). Ауэ нэхъыжьхэм я чэнджэщыр абы ІэщІыб ищІащ. Сыт абы апхуэдэу щІищІар? Ровоам игукІэ унафэ къищтэу, нэхъыжьхэр абы арэзы техъуэну щыгугъауэ къыщІэкІынущ. Ауэ апхуэдэу къэхъуатэкъыми, абы и ныбжьэгъухэм захуигъэзащ. Абыхэм я чэнджэщыр езым ищІа унафэм техуэти, ар игу ирихьащ (1 Цар. 12:8—14). Ровоам и ныбжьэгъухэм къыжраІар цІыхухэм жэуапу яритыжащ. Абы къыхэкІкІэ лъэпкъым тІууэ зигуэшащ икІи а зэманым къыщыщІэдзауэ Ровоам гугъуехьхэм хэкІакъым (1 Цар. 12:16—19).

13. НэгъуэщІхэм къыдат чэнджэщхэм дедэІуэну дыхьэзыррэ дымыхьэзыррэ дапхуэдэу къызэрыдгурыІуэнур?

¹³ Ровоам и щапхъэм сытым дыхуигъасэрэ? Зыгуэрым дечэнджэщмэ, абы жиІэр къэдгъэсэбэпыну дыхьэзыру дыщытын хуейщ. Абы къокІ дычэнджэщэн ипэ унафэ тщІын зэрыхуэмейр. НэгъуэщІхэм къыдат чэнджэщхэм дедэІуэну дыхьэзыррэ дымыхьэзыррэ дапхуэдэу къызэрыдгурыІуэнур? Ар къэтщІэн щхьэкІэ мы упщІэр зэттыж хъунущ: «Чэнджэщ къызатар си еплъыкІэм темыхуэмэ, ар занщІэу ІэщІыб сымыщІу пІэрэ?»

14. Чэнджэщ къыщыдатым деж сыт дэ зыщыдгъэгъупщэн хуэмейр? Щапхъэ къэфхь. (Сурэтми феплъ.)

¹⁴ Мыпхуэдэ щапхъэм деплъынщ. Къуэшым ахъшэфІ къыщилэжьыфын лэжьапІэ къыхукъуэкІауэ жытІэнщ. Ар абы увын ипэ зэхуэсым и нэхъыжьым йочэнджэщ. Къуэшым къыхегъэщ зэман куэдкІэ командировкэхэм кІуэн зэрыхуеинур. Зэхуэсым и нэхъыжьым къуэшым игу къегъэкІыж Иеговэ хуэлэжьэну и унагъуэм дэІэпыкъуну и къалэн нэхъыщхьэу зэрыщытыр (Еф. 6:4; 1 Тим. 5:8). Къуэшым зэхуэсым и нэхъыжьым жиІам мыхьэнэ иримыту, нэгъуэщІ къуэш, шыпхъухэм йочэнджэщ, езым игу ирихьын къыжезыІэн хуэзэху. Пэж дыдэу, къуэшым чэнджэщ къратыну хуейуэ ара, хьэмэрэ унафэ тэмэм къищтауэ къыжраІэну хуейуэ ара? Дэ зыщыдгъэгъупщэн хуейкъым ди гур бзаджэу зэрыщытыр (Иер. 17:9). Иныкъуэхэм деж чэнджэщ къыдатхэр дигу иримыхьу, ауэ абы, псом хуэмыдэу, дыхуэныкъуэу щытыфынущ.

СИ ПІЭКІЭ НЭГЪУЭЩІЫМ УНАФЭ КЪИЩТЭНУ СЕЛЪЭІУН ЩІЫХУЭМЕЙР СЫТ?

15. Сыт дэ тщІэн хуэмейр икІи сыт щхьэкІэ?

¹⁵ Иеговэ щогугъ дэ тщыщ дэтхэнэ зыми езым унафэ къищтэжыну. Къатщтэ унафэмкІэ жэуап зыхьыжынур дэ езыращ (Гал. 6:4, 5). УпщІэ гуэр къыщыхъейм деж Іущагъ хэлъщ абы теухуауэ Библием итыр зэхэдгъэкІыным икІи Алыхьым и еплъыкІэ зиІэ къуэш, шыпхъухэм дечэнджэщыным. Ауэ ди пІэкІэ нэгъуэщІым унафэ къызэредмыгъэщтэным дыхуэсакъын хуейщ. Дапхуэдэу ар къызэрыхъуфынур? Хэти къехьэкІ-нехьэкІ имыІэу къуэшым е шыпхъум мыпхуэдэу йоупщІ: «Си пІэ уитауэ щытамэ, сытыт уэ пщІэнур?» Хэти мыпхуэдэ Іэмал къегъэсэбэп: Іуэхум куууэ егупсысыну хуэмейуэ, нэгъуэщІхэм ящІэр ещІэж.

16. Коринф дэс къуэш, шыпхъухэм тхьэ нэпцІхэм къурмэныпхъэу къыхуахьа лым теухуауэ сыт хуэдэ унафэт ящІын хуейр? (1 Коринф 8:7; 10:25, 26).

¹⁶ Ди эрэм япэ лІэщІыгъуэм Коринф къыщыхъуа Іуэхугъуэм дыхэплъэнщ. Абы дэс къуэш, шыпхъухэм дэтхэнэ зыми мыхьэнэшхуэ зиІэ унафэ ищІын хуейт: тхьэ нэпцІхэм къурмэныпхъэу къыхуахьа лыр ишхынрэ имышхынрэ. Паул абыхэм мыпхуэдэу яхуитхащ: «Тхьэ нэпцІхэр дунейм зэрытемытри, зы Тхьэ закъуэм нэмыщІ, нэгъуэщІ тхьэ зэрыщымыІэри дощІэ» (1 Кор. 8:4). Зэхуэсым щыщхэм апхуэдэ лыр къащэхуурэ яшхыну хэти и напэм къригъэзэгът, хэти къригъэзэгътэкъым. (Къеджэ 1 Коринф 8:7; 10:25, 26.) Дэтхэнэ зыми ищІэным теухуауэ езым унафэ къищтэт. Паул хуейтэкъым зым адрейм ипІэкІэ унафэ къищтэну е мыгупсысэу, нэгъуэщІхэм ящІэр ищІэжыну. Сыт щхьэкІэ жыпІэмэ «дэ псори Тхьэм и пащхьэм диувэнущ, щхьэж езым щхьэкІэ жэуап иритыну» (Рим 14:10—12).

17. Демыгупсысу, нэгъуэщІхэм ящІэр тщІэжмэ, сыт къэхъуфынур? Щапхъэ къэфхь. (Сурэтхэми феплъ.)

¹⁷ Апхуэдэ зыгуэр ноби къэхъуфынущ. Псалъэм папщІэ, дэ тщыщ дэтхэнэ зыми лъым и фракциехэр къигъэсэбэпынрэ къимыгъэсэбэпынрэ езым унафэ ищІын хуейщb. А темэр къыбгурыІуэну гугъуу щытми, ар Іэмал имыІэу зэхэбгъэкІын хуейщ, сыт щхьэкІэ жыпІэмэ узыншагъэм теухуауэ къатщтэ унафэхэмкІэ жэуап зыхьыжынур дэ езыращ (Рим 14:4). Дэ дымыгупсысэу нэгъуэщІхэм ящІэр тщІэжмэ, зэи Іущ дыхъуфынукъым. Ауэ Библием ит принципхэр къэдгъэсэбэпу, дэ езым унафэ къыщытщтэм деж ди акъылыр догъэлажьэ икІи нэхъ Іущ дохъу (Евр. 5:14). Мыпхуэдэуи къэхъуфынущ: къуэшым е шыпхъум зыгъэгузавэ упщІэм теухуауэ куууэ хэплъауэ, ауэ Библием ит принципхэр и Іуэхум зэрыхуэкІуэр къыгурымыІуэу. Апхуэдэу къэхъумэ, абы Алыхьым и еплъыкІэ зиІэ къуэшым е шыпхъум зыхуигъазэмэ нэхъыфІщ.

ЧЭНДЖЭЩЭН ЩЫВМЫГЪЭТ

18. Дапхуэдэу Иеговэ и нэІэ къызэрыттригъэтыр?

¹⁸ Иеговэ дэтхэнэ зыми Іэмал къыдет дэ езым унафэ къэтщтэжыну. Апхуэдэу абы къегъэлъагъуэ дзыхь къызэрытхуищІыр. Иеговэ и Псалъэ Библиер тыгъэу къыдитащ. Иджыри абы ныбжьэгъу Іущхэр къыдет. Ахэр къыддоІэпыкъу Библием ит принципхэр къыдгурыІуэну. Зэрытлъагъущи, ди Адэ Иеговэ лъагъуныгъэ хэлъу и нэІэ къыттригъэтщ (Прит. 3:21—23). Абы фІыщІэ зэрыхуэтщІыр дапхуэдэу зэредгъэлъэгъуфынур?

19. Иеговэ дэ сыткІэ дгъэгуфІэфыну?

¹⁹ Мыпхуэдэ щапхъэм дегупсысынщ: адэ-анэхэр мэгуфІэ я бынхэр нэгъуэщІхэм дэІэпыкъун яфІэфІу, Алыхьым и лэжьакІуэ Іущу къызэрыхъур щалъагъум деж. Апхуэдэ дыдэу Иеговэ мэгуфІэ абы гъунэгъу зэрызыхуэтщІым щхьэкІэ. Абы и гуапэщ нэгъуэщІхэм дыщечэнджэщым икІи ар фІыуэ зэрытлъагъур къызыхэщ унафэхэр къыщытщтэм деж.