Къэхъун хуейуэ Екъуб жиІа псалъэхэм къыхэтх дерсхэр (япэ Іыхьэр)

1, 2. ЛІэн ипэ сыт Екъуб ищІар икІи сыт щхьэкІэ? (Сурэтым феплъ.)

ЕКЪУБ и ныбжьыр хэкІуэтауэ и унагъуэр и гъусэу Ханаан щІыналъэм икІри Мысыр къэралым Іэпхъуащ. Абы насыпрэ гуфІэгъуэрэ зыхищІэт, Исуф зэрыхуэзэжам икІи и бын унагъуэр псори зэгъусэ зэрыхъужам щхьэкІэ (ЩІэдз. 47:28). Абы иужькІэ илъэс 17 дэкІауэ, и лІэгъуэр къызэрысар щызэхищІам щыгъуэ, Екъуб и къуэхэр зэхуишэсри, мыхьэнэшхуэ зиІэ псалъэхэр яжриІащ (ЩІэдз. 49:28).

² Пасэ зэманым хабзэ щыІэт унагъуэм и нэхъыжьым лІэн ипэ и бынхэм уэсят яхуищІыжу (Ис. 38:1). Псалъэм папщІэ, абы унафэ ищІт езыр лІа иужь унагъуэм нэхъыжьыгъуэр хэт къылъысынуми.

3. ЩІэдзапІэ 49:1, 2 сыт къыщытщІэр?

³ Къеджэ ЩІэдзапІэ 49:1, 2. Екъуб и унагъуэр щІызэхуишэсам мыхьэнэшхуэ иІэт. Ар бегъымбарт икІи Алыхьым и къарукІэ и къуэхэмрэ абыхэм я унагъуэхэмрэ къэкІуэну махуэхэм къащыщІынур яжриІэну зигъэхьэзырт.

4. Сыт мы статьям щызэпкърытхынур? («Екъуб и унагъуэр» жыхуиІэ рамкэми феплъ.)

⁴ Мы статьям дэ щызэпкърытхынущ Екъуб лІэн ипэ Рубэн, Симеон, Лэуий, Иудэ сымэ яжриІа псалъэхэр. КъыкІэлъыкІуэ статьям дэ къыщытщІэнущ Екъуб адрей и къуэхэм яжриІа псалъэхэр. Къызэрытлъэгъунущи, Екъуб и псалъэхэр зыхуэгъэзар и къуэ закъуэхэратэкъым, атІэ абыхэм я щІэблэ псоми хуэгъэзат. Зэман дэкІри а зэкъуэшхэм израил лъэпкъышхуэр къатехъукІащ. Екъуб и псалъэхэр а лъэпкъым деж гъэзэщІа щыхъуащ. Дэри абы мыхьэнэшхуэ зиІэ дерсхэр хэтхыфынущ. Псалъэм папщІэ, уафэм щыІэ ди Адэ Иеговэ дгъэгуфІэн щхьэкІэ сыт тщІэн хуейми къэтлъэгъунущ.

РУБЭН

5. Рубэн сытыт зыщыгугъыу къыщІэкІынур?

⁵ Екъуб япэщІыкІэ и къуэ нэхъыжьым мыпхуэдэу зыхуигъэзащ: «Рубэн, си щыпэлъху!» (ЩІэдз. 49:3). Рубэн зэрыщыпэлъхум щхьэкІэ и гугъэу къыщІэкІынт ІыхьитІ щІэину къылъысыну. Абы нэмыщІ ар щыгугъ хъунт лъэпкъым и нэхъыжь хъууэ, и щІэблэми а увыпІэр сыт щыгъуи яІыгъыну.

6. Рубэн щыпэлъхум кърит зэфІэкІыр сыт щІыфІэкІуэдар? (ЩІэдзапІэ 49:3, 4).

⁶ Ауэ Рубэн щыпэлъхум кърит зэфІэкІыр фІэкІуэдащ (1 Лет. 5:1). Сыт абы и щхьэусыгъуэр? Рахэл лІэри зэман гуэр дэкІауэ, Рубэн и адэм и унэІут бзылъхугъэ Билхьэ и гъусэу зинэ ищІащ (ЩІэдз. 35:19, 22). Сыт Рубэн апхуэдэу щІищІар? Ар а цІыхубзым ехъуэпсагъэнт е зинэ ищІа иужь и адэм Билхьэ гущыкІ хуищІу, езы Рубэн и анэ Леа нэхъыфІу илъагъуну щыгугъыу къыщІэкІынт. Сыт хуэдэ щхьэусыгъуэ абы имыІами, Рубэн ищІар Иеговэ дежкІи Екъуб дежкІи гущыкІыгъуэт. (Къеджэ ЩІэдзапІэ 49:3, 4.)

7. Рубэнрэ абы и щІэблэмрэ теухуауэ Екъуб жиІа псалъэхэр дапхуэдэу гъэзэщІа зэрыхъуар? («Къэхъун хуейуэ Екъуб жиІа псалъэхэр» жыхуиІэ рамкэми феплъ.)

⁷ Екъуб Рубэн жриІащ: «УефІэкІынукъым абыхэм». Мы псалъэхэр гъэзэщІа хъуащ. Библием зыщІыпІи иткъым Рубэн и щІэблэм щыщ гуэр пащтыхь, дин пашэ е бегъымбар хъуауэ. Ауэ Екъуб и къуэм и щІыб хуигъэзакъым икІи щІэиным хинакъым. Рубэн и щІэблэр израилым хыхьэ лъэпкъ 12 ящыщ зы хъуащ (Иис. Н. 12:6). Пэжщ, Рубэн Билхьэ и гъусэу ищІар щыуагъэшхуэт, ауэ абы апхуэдэ гуэныхь къытригъэзэжу ищІауэ зыщІыпІи дыкъыщеджэкъым. Рубэн и гъащІэм ухэплъэмэ болъагъу абы хьэл-щэныфІхэр зэрыхэлъар (ЩІэдз. 37:20—22; 42:37).

8. Рубэн и гъащІэм сыт хуэдэ дерсхэр къыхэтхрэ?

⁸ Дерсхэр. Дэ псори зышыІэныгъэм делэжьын хуейщ, зинэ щІэным зыдедмыгъэхьэхын щхьэкІэ. Гуэныхь щІэным узыІэпишэмэ, къэувыІи егупсыс Иегови, уи унагъуэми, адрей цІыхухэми абы къахуихьыну гухэщІым. Абы нэмыщІ зыщумыгъэгъупщэ: «ЦІыхум хьэсэм трисэр къытрихыжынущ» (Гал. 6:7). Иджыри Рубэн и гъащІэм къегъэлъагъуэ Иеговэ гущІэгъушхуэ зэрыхэлъыр. Пэжщ, щыуагъэ тщІахэм къыпэкІуэм Алыхьым дэ дыщихъумэкъым, ауэ дыщІегъуэжрэ фІым адэкІэ дыхущІэкъумэ, абы къытхуегъэгъу икІи и нэфІ къытщохуэ.

СИМЕОНРЭ ЛЭУИЙРЭ

9. Екъуб Симеонрэ Лэуийрэ щІахуэмыарэзыр сытыт? (ЩІэдзапІэ 49:5—7).

⁹ Къеджэ ЩІэдзапІэ 49:5—7. ИужькІэ Екъуб Симеонрэ Лэуийрэ захуегъазэ икІи абы и псалъэхэм къыхощ ар абыхэм хуабжьу зэрыхуэмыарэзыр. Ахэр иджыри Ханааным щыщыІэм щыгъуэ, а щІыпІэм щыпсэу Щэхэм Екъуб и пхъу Динэ лей ирихат. ДауикІ, зэкъуэш псори абы хуабжьу къигъэгубжьат, ауэ Симеонрэ Лэуийрэ я губжьым гъуэгу иратащ. ЦІыхухъухэм сунэт ящІмэ зэгурыІуэныгъэ иращІылІэну жаІэри, Симеонрэ Лэуийрэ Щэхэм и къалэм дэсхэр къагъэгугъащ. Къалэм дэс цІыхухъухэр абы арэзы техъуащ, ауэ «ещанэ махуэм, ахэр гукъыдэмыжу здэщылъым, Екъуб и къуитІым, Динэ и дэлъхухэу Симеонрэ Лэуийрэ, къащтащ щхьэж и джатэр икІи пэрыуэ щымыІэу къалэм дыхьэри, яукІащ цІыхухъу псори» (ЩІэдз. 34:25—29). Апхуэдэу зэкъуэшитІым ахэр къагъэпцІащ.

10. Симеонрэ Лэуийрэ теухуауэ Екъуб жиІа псалъэхэр дапхуэдэу гъэзэщІа зэрыхъуар? («Къэхъун хуейуэ Екъуб жиІа псалъэхэр» жыхуиІэ рамкэми феплъ.)

¹⁰ Екъуб и къуитІым ягъэлъэгъуа гущІэгъуншагъэр ищІэжти, абы жиІащ ахэр зэкъуэуда зэрыхъунур икІи Израил щІыналъэ псом хэгуэшауэ зэрыщытынур. Екъуб и псалъэхэр гъэзэщІа хъуащ илъэс 200 щІигъу дэкІа нэужь, израил лъэпкъыр Алыхьым къызэригъэгугъа щІыналъэм щихьам щыгъуэ. Симеон лъэпкъым Иудэ лъэпкъым и щІыналъэм хыхьэ къалэхэм щыщ къылъысащ (Иис. Н. 19:1). Лэуий Израил псом хэгуэшауэ къалэ 48 къылъысащ (Иис. Н. 21:41).

11. Симеонрэ Лэуийрэ я щІэблэхэм сыт хуэдэ ІуэхуфІхэр ялэжьа?

¹¹ Симеонрэ Лэуийрэ къатехъукІахэм я адэжьхэм ялэжьа щыуагъэхэм хуэдэ ящІакъым. Лэуий и щІэблэм къабзагъэр ихъумэу Иеговэ пэжу хуэлажьэт. Мусэ Алыхьым и Хабзэр къыІэрыхьауэ Синай бгым къыщехыжам щыгъуэ, къилъэгъуащ израил цІыхухэм щыщу куэдым дыщэм къыхэщІыкІа танэр зэрагъэлъапІэр. Мусэ жиІащ: «Иеговэ и лъэныкъуэр зыІыгъхэр си дежкІэ фыкъакІуэ!» Абы щыгъуэ левитхэм псоми Мусэ и лъэныкъуэр яубыдри, тхьэ нэпцІым хуэлажьэхэр зэтраукІащ (Исх. 32:26—29). ИужькІэ Иеговэ левитхэм хуигъэфэщащ ахэр дин пашэу лэжьэну (Исх. 40:12—15; Чис. 3:11, 12). Симеон къытехъукІахэм лІыгъэ яхэлъу Иудэ лъэпкъым и гъусэу Алыхьым къызэригъэгугъа щІыналъэр къазэуащ. Ар Иеговэ и мурадым техуэт (Суд. 1:3, 17).

12. Симеонрэ Лэуийрэ я гъащІэм сыт хуэдэ дерсхэр къыхэтхрэ?

¹² Дерсхэр. Дэ дыгубжьауэ зэи унафэ къатщтэ хъунукъым. Ди щхьэм, ди унагъуэм е ди ныбжьэгъум захуагъэ хэмылъу зыгуэр къыщыхущытым деж, дауикІ, хуабжьу ар ди жагъуэ мэхъу (Пс. 4:4). Ауэ губжьыр зытедгъакІуэу, ди жагъуэ къэзыщІам и гум еуэн гуэр жетІэмэ е етщІэмэ, Иеговэ ар игу ирихьынукъым (Екъуб 1:20). НтІэ, зыгуэр захуагъэ хэмылъу къыщытхущытым деж, сыт тщІэн хуейр? Библием къыдит чэнджэщхэм сыт щыгъуи дытетыным мыхьэнэшхуэ иІэщ, ди жагъуэ къэзыщІар ди къуэш, ди шыпхъухэрами е нэгъуэщІ гуэрми. Алыхьым и чэнджэщхэр дгъэзащІэмэ, псалъэкІи ІуэхукІи зыми зэран дыхуэхъунукъым (Рим 12:17, 19; 1 Пет. 3:9). НыбжьыщІэхэ, фи дежкІи абы дерс хэлъщ: фи адэ-анэхэм щыуагъэ ящІэхэм хуэдэ фэри фщІэжын хуейкъым. Абыхэм щыуагъэ зэращІам къикІкъым Алыхьыр арэзы фхуэмыщІыну. Фэ ІуэхуфІхэр влэжьын щывмыгъэтмэ, Іэмал имыІэу Иеговэ вгъэгуфІэнущ, и нэфІи къыфщыхуэнущ.

ИУДЭ

13. Иудэ щІэгузэвэн сыт хуэдэ щхьэусыгъуэхэр иІэт?

¹³ Иджы Екъуб Иудэ зыхуегъазэ. Абы и къуэ нэхъыжьхэм яжриІар Иудэ щызэхихым, дауикІ, къэгузэват, сыт щхьэкІэ жыпІэмэ езыми щыуагъэшхуэхэр ищІат. Псалъэм папщІэ, Щэхэм къалэр щызэхадыгъуэжым ари хэтауэ къыщІэкІынут (ЩІэдз. 34:27). Иудэ и къуэшхэм яжриІащ Исуф ящэну икІи я адэм пцІы хуэзыупсахэм ари яхэтащ (ЩІэдз. 37:27, 31—33). ИужькІэ Иудэ и нысэ Тамарэ и гъусэу зинэ ищІащ, ар къэхьпэ и гугъэу (ЩІэдз. 38:15—18).

14. Иудэ сыт хуэдэ ІуэхуфІхэр илэжьа? (ЩІэдзапІэ 49:8, 9).

¹⁴ Иудэ гузэвами, Екъуб абы щытхъуащ икІи езыми и щІэблэми Иеговэ и нэфІ зэрыщыхуэнур жриІащ. (Къеджэ ЩІэдзапІэ 49:8, 9.) Абы щхьэусыгъуэ хуэхъуар Иудэ и адэ зи ныбжь хэкІуэтам и гурыщІэхэм зэрегупсысар икІи и къуэш нэхъыщІэ Биниамин гущІэгъу зэрыхуищІаращ (ЩІэдз. 44:18, 30—34).

15. Иудэ теухуауэ Екъуб жиІа псалъэхэр дапхуэдэу гъэзэщІа зэрыхъуар?

¹⁵ Екъуб Иудэ жриІащ ар и къуэшхэм я тепщэу зэрыщытынур. Ауэ абы и псалъэхэр къыщыхъуар илъэс 200 хуэдиз дэкІа иужьщ. Израил лъэпкъыр Мысырым къикІыжауэ, губгъуэ нэщІым иту Алыхьым къызэригъэгугъа щІыналъэм щыкІуам щыгъуэ, ипэ иту кІуар Иудэ къытехъукІахэращ (Чис. 10:14). Илъэс бжыгъэ дэкІауэ, Алыхьым къызэригъэгугъа щІыналъэр къыщазэум щыгъуэ, хананейхэм езэуэну япэу кІуар Иудэ лъэпкъыращ (Суд. 1:1, 2). Пащтыхь Даути къызыхэкІар Иудэ лъэпкъырат икІи абы къыщІэхъуахэм илъэс куэдкІэ пащтыхьыгъуэр яІыгъащ. Ауэ Екъуб Иудэ къызэригъэгугъа фІыгъуэхэр абдеж щиухакъым.

16. ЩІэдзапІэ 49:10 ит псалъэхэр дапхуэдэу гъэзэщІа зэрыхъуар? («Къэхъун хуейуэ Екъуб жиІа псалъэхэр» жыхуиІэ рамкэми феплъ.)

¹⁶ Екъуб жиІат Иудэ къытехъукІа Пащтыхьыр цІыхухэм я тепщэу игъащІэкІэ зэрыщытынур. (Къеджэ ЩІэдзапІэ 49:10.) А Пащтыхьыр Хьисэ Мэссихьщ. Абы теухуауэ мелыІычым жиІащ: «И адэшхуэ Даут и тахътэр Зиусхьэну Тхьэм абы къритынущ» (Лк 1:32, 33). Абы нэмыщІ Хьисэ «Иудэ унагъуэ лъэпкъым щыщ аслъэнкІэ» йоджэ (Апок. 5:5).

17. Дапхуэдэу Иеговэ и лэжьакІуэхэм зэрыхущытыр икІи дауэ дэ абы щапхъэ тетх зэрыхъунур?

¹⁷ Дерсхэр. Иеговэ Иудэ и нэфІ щыхуащ, абы щыуагъэшхуэхэр зэрищІам емылъытауэ. Иудэ и къуэшхэм къагурыІуэ хъунтэкъым апхуэдэ щІыхь абы къыщІылъысар. Дауэ мыхъуами, Иудэ и хьэл-щэныфІхэр Иеговэ илъагъути, и нэфІ абы щыхуащ. Дапхуэдэу дэ Иеговэ щапхъэ зэрытетх хъунур? Псалъэм папщІэ, зыгуэрым пщІэ зыпылъ къалэн хуагъэфэщамэ, япэщІыкІэ мыпхуэдэу дегупсысынкІэ хъунущ: «Мыбы и щыуагъэхэр ямылъагъуу ара, а къалэныр дауэ абы хуагъэфэща?» Ауэ дэ зыщыдгъэгъупщэн хуейкъым а цІыхум хэлъ хьэл-щэныфІхэр Иеговэ лъапІэу зэрилъытэр. Иеговэ и лэжьакІуэхэм яхилъагъуэр фІыращ, дэри абы щапхъэ тетхын хуейщ.

18. ШыІэныгъэ тхэлъыным сыт мыхьэнэшхуэ щІиІэр?

¹⁸ Дэ иджыри Иудэ деж шыІэныгъэм зыщедгъэсэфынущ. Иеговэ дыкъызэригъэгугъар сыт щыгъуи егъэзэщІэж. Ауэ ар абы зэригъэзащІэ щІыкІэмрэ щигъэзащІэ зэманымрэ дэ дызэригугъам темыхуэнкІэ хъунущ. Иудэ къытехъукІахэр занщІэу Алыхьым и лъэпкъым и пашэ хъуакъым. Ауэ а къалэныр игъэзэщІэну Алыхьым къыхихахэм ахэр сыт щыгъуи едэІуащ, псалъэм папщІэ, Лэуий лъэпкъым къыхэкІа Мусэ, Ефрем лъэпкъым къыхэкІа Нун и къуэ Ехьошуа, Биниамин лъэпкъым къыхэкІа Щаул. Дэри нобэ Иеговэ и лъэпкъыр зыхуей хуигъэзэн щхьэкІэ къыхиха цІыхухъухэм я жыІэм дыщІэвгъэт (Евр. 6:12).

19. Къэхъун хуейуэ Екъуб жиІа псалъэхэм Иеговэ теухуауэ сыт къыдагъэщІар?

¹⁹ Екъуб и къуиплІым теухуауэ къэхъун хуейуэ жиІа псалъэхэм сыт хуэдэ дерсхэр къыхэтха? КъызэрыдгурыІуащи, «Алыхьым цІыху еплъыкІэкъым иІэр» (1 Сам. 16:7). Иеговэ шыІэныгъэшхуэ хэлъщ икІи игъэгъуну хьэзырщ. Алыхьым гуэныхьым мыхьэнэ иримыту щыткъым, ауэ абы и лэжьакІуэхэр цІыху дагъуэншэу зэрыщымытри ещІэж. ЦІыхум япэм гуэныхь хьэлъэ ищІами, ар и гум къыбгъэдэкІыу хущІегъуэжрэ ІуэхуфІхэр илэжьмэ, Иеговэ и нэфІ абы щыхуэнущ. КъыкІэлъыкІуэ статьям дэ щызэпкърытхынущ Екъуб адрей и къуэхэм яжриІа псалъэхэр.