«Іущыгъэр уэрам-уэрамкІэрэ къыщоджэ»

1. Нобэ куэдыр Іущагъым и макъым дапхуэдэу зэрыхущытыр? (Притчи 1:20, 21, Гъэс.).

ЦІЫХУ куэд щызекІуэ щІыпІэхэм хъыбарыфІыр зыгъэІу ди къуэш, ди шыпхъухэм къэрал куэдым ущрихьэлІэфынущ. Абыхэм гуфІэгъуэ я гум илъу журналхэр ягуэш. А лэжьыгъэ гъэщІэгъуэным уэ зэгуэр ухэтауэ пІэрэ? Ухэтамэ, абы уигу къигъэкІыжауэ къыщІэкІынщ Притчи тхылъым къыщыхьа щапхъэр: цІыху куэд щызекІуэ щІыпІэхэм и чэнджэщхэм щІэдэІуну Іущагъым псори къыхуреджэ. (Къеджэ Притчи 1:20, 21, Гъэс.) А Іущагъыр — Иеговэ и Іущагъыр — Библиемрэ ди тхыгъэхэмрэ итщ. ЦІыхухэр гъащІэм ухуэзышэ гъуэгум теувэн щхьэкІэ а Іущагъыращ зыхуэныкъуэр. ДауикІ, дэ тфІэфІщ цІыхур къыщыдэдаІуэм икІи еджэну зыгуэр къыщытІихым деж. Ауэ языныкъуэхэм Библием итым теухуауэ зыри ящІэну хуейкъым. НэгъуэщІхэр къытщодыхьэшх. Абыхэм я гугъэщ Библием итыр жьы хъуауэ. Дунейм узэрытетын хуейм теухуауэ Библием итым арэзы темыхъуи щыІэщ. Абыхэм жаІэ Алыхьым и Псалъэм ит хабзэхэм тетхэр цІыху ткІийуэ икІи адрейхэм сыт щыгъуи зыгуэр дагъуэу. Ауэ а псом щхьэкІэ къэмынэу Иеговэ лъагъуныгъэ хэлъу Іущагъ пэжымкІэ псоми адэкІи догуашэ. Дапхуэдэу ар зэрищІэр?

2. Іущагъ пэжыр дэнэ къыщыдгъуэтыфынур, ауэ куэдым сыт нэхъ къащтэр?

² Иеговэ къыбгъэдэкІ Іущагъ пэжыр нэгъуэщІхэм зэрызэхригъэх Іэмалхэм ящыщ зыр ар и Псалъэ Библиеращ. А тхылъым еджэну дэтхэнэ зы цІыхуми Іэмал иІэщ. Ауэ Библием тегъэщІа ди тхыгъэхэм теухуауэ сыт жыпІэ хъунур? Иеговэ и фІыгъэкІэ иджыпсту бзэ 1 000-м щІигъукІэ ахэр зэрадзэкІ. Іущагъым и макъым щІэдэІухэр, нэгъуэщІу жыпІэмэ, Алыхьым и Псалъэм еджэу абы итыр зыгъэзащІэхэр, нэхъ насыпыфІэ мэхъу. Ауэ инэхъыбэ цІыхухэр Иеговэ едэІуэну хуейкъым. Абыхэм унафэ гуэр къыщащтэкІэ я щхьэм е нэгъуэщІхэм щыгугъыну я хьэлщ. Библием итым дытету дызэрыпсэум щхьэкІэ абыхэм нэмыплъ къыдатынкІэ хъунущ. ЦІыхухэр апхуэдэу щІыщытым и щхьэусыгъуэр мы статьям щызэпкърытхынущ. Ауэ япэщІыкІэ деплъынщ Иеговэ и Іущагъыр дапхуэдэу зэдгъэгъуэт хъунуми.

ІУЩАГЪ ЗЭДГЪЭГЪУЭТЫНУ ИЕГОВЭ ТЕУХУА ЩІЭНЫГЪЭР КЪЫДДОІЭПЫКЪУ

3. ЦІыху Іущу дыщытын щхьэкІэ, сыт дэ тщІэн хуейр?

³ Іущагъыр — ар, унафэ пэж къэпщтэн щхьэкІэ, щІэныгъэ зэбгъэгъуэтар тэмэму къэбгъэсэбэпыныращ. Ауэ Іущагъ пэжым нэхъыбэ хохьэ. Библием итщ: «Тхьэуэ Зиусхьэным уфІэлІыкІыныр — Іущыгъэм и пэублэщ, Тхьэ ЛъапІэр къэпцІыхуныр — акъылым ищхьэщ» (Прит. 9:10, Гъэс.). Абы къыхэкІкІэ мыхьэнэшхуэ зиІэ унафэ къыщытщтэкІэ Иеговэ а Іуэхум зэреплъыр къэтщІэн хуейщ. Дапхуэдэу? Ар къэтщІэнущ, Библиемрэ абы тегъэщІа ди тхыгъэхэмрэ дджыуэ щытмэ. Апхуэдэ бгъэдыхьэкІэм Іущагъышхуэ хэлъщ (Прит. 2:5—7, Гъэс.).

4. Іущагъ пэжыр Иеговэ фІэкІа зыми къыщІыдимытыфынур сыт?

⁴ Іущагъ пэжыр къыдэзытыфынур Иеговэ закъуэщ (Рим 16:27). Ар Іущагъым и къежьапІэу щыту жыпІэ щІэхъунур сыт? Япэрауэ, Иеговэ КъэгъэщІакІуэу зэрыщытым къыхэкІкІэ къигъэщІахэм теухуауэ псори ещІэ (Пс. 104:24). ЕтІуанэрауэ, абы ищІэу хъуам Іущагъ хэлъщ (Рим 11:33). Ещанэрауэ, Иеговэ и чэнджэщ Іущхэм щІэдэІухэм абы сыт щыгъуи сэбэп къахуехь (Прит. 2:10—12, Гъэс.). Дэ цІыху Іущу дыщытыну дыхуеймэ, а Іуэхугъуищыр дигу идгъэлъын хуейщ. Абы нэмыщІ унафэ гуэр къыщытщтэм деж абыхэм дытетыным мыхьэнэшхуэ иІэщ.

5. Иеговэ Іущагъым и къежьапІэу щыту цІыхухэм къызэрамылъытэм сыт къыпэкІуэр?

⁵ ХъыбарыфІыр зыжетІэ цІыху куэдыр арэзы тохъуэ дыкъэзыухъуреихь дунейр телъыджэу зэрызэхэлъым. Ауэ итІани КъэгъэщІакІуэ щыІэу абыхэм я фІэщ хъукъым. НэгъуэщІхэм Алыхьыр я фІэщ хъууэ жаІэ, ауэ Библием ит хабзэхэр жьы хъуауэ икІи цІыхур езым и акъылкІэ псэун хуейуэ къалъытэ. Ауэ сыт абы къыпэкІуэр? ЦІыхухэм Алыхьым и Іущагъыр ІэщІыб ящІу я щхьэм зэрыщыгугъыжым дунейр нэхъыфІ ищІа? Ахэр нэхъ насыпыфІэ е къэкІуэным теухуауэ гугъэ быдэ яІэ хъуа? Дэ дыкъэзыухъуреихь псор щыхьэт тохъуэ мы псалъэхэр зэрыпэжым: «ЩыІэнкъым Іущыгъэ зи цІи, зэхэщІыкІи, гупсысэ гуэри Тхьэуэ Зиусхьэным пэщІэувэфын» (Прит. 21:30, Гъэс.). Абы къыдгурегъаІуэ Иеговэ Іущагъ къыдитын щхьэкІэ делъэІуным мыхьэнэшхуэ зэриІэр. Ди жагъуэ зэрыхъунщи, инэхъыбэ цІыхухэм апхуэдэу ящІэкъым. Сыт щхьэкІэ?

ЦІЫХУХЭМ ІУЩАГЪ ПЭЖЫР ІЭЩІЫБ ЩІАЩІЫР СЫТ?

6. Іущагъ пэжыр ІэщІыб зыщІыр хэт? (Притчи 1:22—25).

⁶ «Іущыгъэр уэрам-уэрамкІэрэ къыщыджэкІэ» куэдыр абы едэІуэну хуейкъым. Алыхьым и Псалъэм зэритымкІэ, Іущагъыр ІэщІыб зыщІ цІыху гупищ щыІэщ: «жыІэзыфІэщхэр», «щІэнэкІакІуэхэр», «акъылыншэхэр». (Къеджэ Притчи 1:22—25.) А цІыхухэм Алыхьым и Іущагъыр ІэщІыб щІащІым и щхьэусыгъуэм дытепсэлъыхьынщ. Абы нэмыщІ, а цІыхухэм ещхь дымыхъун щхьэкІэ, сыт тщІэн хуейми къэтщІэнщ.

7. ЦІыху жыІэзыфІэщу щытыну языныкъуэхэм къыщІыхахыр сыт?

⁷ «ЦІыху жыІэзыфІэщыр» къэгъэпцІэгъуафІэщ, абы тыншу псори и фІэщ мэхъу (Прит. 14:15, Гъэс.). ХъыбарыфІыр щыдгъэІукІэ апхуэдэ цІыхухэм щІэх-щІэхыурэ дахуозэ. Псалъэм папщІэ, дин пашэхэмрэ политикхэмрэ къабгъэдэкІ пцІыр мелуан бжыгъэ хъу цІыхухэм я фІэщ мэхъу. КъызэрагъэпцІар къащыгурыІуэм деж ахэр Іэнкун мэхъу. Ауэ Притчи 1:22 зи гугъу ищІ цІыху жыІэзыфІэщхэм апхуэдэу щытыну езыхэм къыхахащ икІи ар ягу ирохь (Иер. 5:31). Абыхэм яфІэфІщ зыхуейр ящІэу дунейм тетыну. Ахэр хуейкъым Библием итыр къащІэну икІи абы тету псэуну. Квебе́к щыщ цІыхубзым иІэ еплъыкІэм хуэдэ куэдым яІэщ. Абы мыпхуэдэу ди зы къуэшым къыжриІащ: «Дин пашэм сыкъигъапцІэмэ, ар езым и напэжщ. Сэ си лажьэр сыт?» ДауикІ, жыІэзыфІэщу щытыну къыхэзыха цІыхухэм щапхъэ ятетхыну дэ дыхуейкъым (Прит. 1:32; 27:12, Гъэс.).

8. «ГупсысэкІэкІэ зи ныбжь нэса цІыхухэм хуэдэу» дыхъуну сыт къыддэІэпыкъунур?

⁸ Библием дыхуегъэуш цІыху жыІэзыфІэщу дыщымытыну. Абы щыжыІащ: «Фи гупсысэкІэкІэ зи ныбжь нэса цІыхухэм хуэдэ фыхъу» (1 Кор. 14:20). Библием ит принципхэр къэдгъэсэбэпу щытмэ, цІыху балигъ дыхъуу жыпІэ хъунущ. Дэ мызэ-мытІэу дгъэунэхуащ абыхэм гугъуехь куэдым дызэрыщахъумэр икІи унафэ пэжхэр къэтщтэну къызэрыддэІэпыкъур. Унафэ къатщтэхэм щІэх-щІэхыурэ дыхэплъэжмэ, нэхъыфІщ. Зэман гуэр хъуауэ Библиер дджымэ икІи зэІущІэхэм дыкІуэмэ, мыпхуэдэу дызэупщІыж хъунущ: «Си гъащІэр Иеговэ и ІэмыщІэ ислъхьэу псым зыщІэзгъэуэну сыт зэран къысхуэхъур?» Псым зыщІэдгъэуамэ-щэ? ХъыбарыфІыр зэрыдгъэІумрэ цІыхухэр зэредгъаджэмрэ едгъэфІакІуэу пІэрэ? Унафэ къатщтэхэм къыхэщу пІэрэ Библием ит принципхэр ди гъащІэм къызэрыщыдгъэсэбэпыр? НэгъуэщІ цІыхухэм дазэрыхущытын хуейм теухуауэ Хьисэ щапхъэ тетхыу пІэрэ? Мы упщІэхэм къыхэкІкІэ дызэлэжьын хуей гуэрым гу лъыттамэ, «зэхэщІыкІ зимыІэхэр Іущ зыщІ» Иеговэ и чэнджэщхэм куууэ девгъэгупсыс (Пс. 19:7).

9. «ЦІыху щІэнэкІакІуэхэм» Іущагъыр ІэщІыб зэращІыр сытым къыхэщрэ?

⁹ Алыхьым къыбгъэдэкІ Іущагъыр ІэщІыб зыщІ етІуанэ гупыр — ар «цІыху щІэнэкІакІуэхэращ». ХъыбарыфІыр щыдгъэІукІэ абыхэм дыщрихьэлІэ къохъу. Апхуэдэ цІыхухэм яфІэфІщ нэгъуэщІхэм я пщІэр ираудыхыну (Пс. 123:4). Библием итщ иужьрей махуэхэм щІэнэкІакІуэхэр куэду зэрыщыІэнур (2 Пет. 3:3, 4). ЛутІ малъхъэ хуэхъун хуея щІалэхэм хуэдэу, Алыхьым и Псалъэм итым нобэ куэдым мыхьэнэ ираткъым (ЩІэдз. 19:14). Библием ит хабзэхэм тету псэухэм куэдыр щодыхьэшх. Апхуэдэ цІыху щІэнэкІакІуэхэр я «мурад Іейхэм хуэпсэууэ аращ» (Иудэ 7, 17, 18). Библием «щІэнэкІакІуэ» жиІэу къигъэсэбэп псалъэр Алыхьым епцІыжахэмрэ Иеговэ къэзыцІыхуну хуэмейхэмрэ хуэпхь хъунущ.

10. Псалом 1:1 зэритымкІэ, цІыху щІэнэкІакІуэ дымыхъун щхьэкІэ, сыт тщІэн хуейр?

¹⁰ ЦІыху щІэнэкІакІуэ дымыхъун щхьэкІэ, сыт тщІэн хуейр? Псом хуэмыдэу зыкІи арэзы мыхъу цІыхухэм дэ пэІэщІэ зыхуэтщІын хуейщ. (Къеджэ Псалом 1:1.) Абы къокІ Алыхьым епцІыжахэм демыдэІуэныр, ятхми демыджэныр. Дэ къыдгуроІуэ, дымысакъыу щытмэ, дытхьэусыхэу, Иеговэрэ абы и организацэмрэ къыбгъэдэкІ унафэхэм шэч къытетхьэу дызэрыхъуфынур. Апхуэдэ гуэр къытщымыщІын щхьэкІэ, мы упщІэхэм дегупсыс хъунущ: «УнафэщІэ е зэхъуэкІыныгъэ гуэр къыщытІэрыхьэм деж, абы арэзы сытемыхъуэу сыщыт? ПщІэ зыпылъ къалэнхэр зыгъэзащІэ къуэшхэм дзы къахуэзгъуэтыну си хьэл?» Апхуэдэ хьэлхэр занщІэу зыхэднэмэ, Иеговэ дэркІэ арэзы хъунущ (Прит. 3:34, 35, Гъэс.).

11. «ЦІыху акъылыншэхэр» Иеговэ и хабзэхэм дапхуэдэу зэрыхущытыр?

¹¹ Алыхьым къыбгъэдэкІ Іущагъыр ІэщІыб зыщІ ещанэ гупыр — ар «цІыху акъылыншэхэращ». Библием абыхэм щхьэкІэ апхуэдэу щІыжиІэр ахэр Алыхьым и хабзэхэм тетыну ядэкъыми аращ. Абыхэм я щхьэ къихьэр ящІэу псэумэ нэхъ къащтэ (Прит. 12:15). Апхуэдэ цІыхухэм Іущагъыр къызыбгъэдэкІ Иеговэ ІэщІыб ящІ (Пс. 53:1). Дэ абыхэм хъыбарыфІымкІэ дащыдэгуашэм деж, Библием итым тету дызэрыпсэум щхьэкІэ, ахэр къыщыдэшхыдэ куэдрэ къохъу. Ауэ абы ипІэкІэ сыт абыхэм къыдатыфынур? Библием ІупщІу жеІэ: «Пэжыжьэщ цІыху акъылыншэр ІущыгъэкІэ зэджэм, унафэу къаухэсхэм щыІэкъым хилъхьэн» (Прит. 24:7, Гъэс.). Апхуэдэ цІыхум Іущагъ зыхэлъ чэнджэщ итыфынукъым. Аращ Иеговэ мыпхуэдэу зыкъыщІытхуигъазэр: «Зыщыдзей акъылыншэм» (Прит. 14:7, Гъэс.).

12. «ЦІыху акъылыншэхэм» я гъуэгу дытемыувэну сыт къыддэІэпыкъунур?

¹² Алыхьым едэІуэну зымыдэхэм дэ дарещхькъым. Абы къыбгъэдэкІ чэнджэщхэмрэ хабзэхэмрэ нэхъыфІыжу тлъагъуу хъуурэ макІуэ. Алыхьым ущедаІуэмрэ ущемыдаІуэмрэ узыхуишэр зэдгъапщэмэ, а лъагъуныгъэр нэхъ куу хъунущ.Алыхьым и хабзэхэм едэІуэну хуэмейхэр сыт хуэдиз бэлыхь хэхуэми егупсысыт! Иджы Иеговэ и жыІэм узэрыщІэтым къыхэкІкІэ уи гъащІэр дапхуэдизкІэ нэхъыфІу щытми еплъыт! (Пс. 32:8, 10).

13. Иеговэ къыбгъэдэкІ Іущагъым залымыгъэкІэ дригъэдаІуэрэ?

¹³ Иеговэ хьэлэлагъ хэлъу и ІущагъымкІэ нэгъуэщІхэм ядогуашэ, ауэ ар залымыгъэкІэ зыми къригъащтэкъым. Абы къыдгурегъаІуэ Іущагъым и макъым емыдаІуэхэм къащыщІынур сытми (Прит. 1:29—32, Гъэс.). Иеговэ и лъабжьэ щІэтыну хуэмейхэр «гъуэгу къыхахам и дыджкІэ пшынэжынущ». Зэманыр кІуэху ахэр гугъуехь куэдым пэщІэхуэнущ. Абыхэм къапэщылъыр узщ, гукъеуэщ, икІэм-икІэжым ажалщ. Ауэ Иеговэ жиІэм едаІуэхэр мыпхуэдэу къегъэгугъэ: «КъызэдаІуэр псэунщ шынагъэм пэІэщІэу, бэлыхьлэжьаекІи къыхэщт иІэнкъым» (Прит. 1:33, Гъэс.).

ІУЩАГЪ ПЭЖЫМ СЭБЭП КЪЫТХУЕХЬ

14, 15. Притчи 4:23 итым сытым дыхуигъасэрэ?

¹⁴ Иеговэ къыбгъэдэкІ Іущагъым сытым дежи сэбэп къытхуехь. КъызэрытщІащи, а Іущагъыр хэти тыншу къыхуэгъуэтынущ. Псалъэм папщІэ, Притчи тхылъым ди гъащІэр нэхъыфІ зыщІыфыну чэнджэщ щхьэпэ куэд итщ. Абыхэм щыщу плІы зэпкърытхынщ.

¹⁵ Уи гур хъумэ. Библием мыпхуэдэу щыжыІащ: «Псом япэ уигу щыхъу-щыщІэхэм хуэсакъ, аращ уи гъащІэ гъуэгур зыунэтІыр» (Прит. 4:23, Гъэс.). ЦІыхум и гур тэмэму лэжьэн щхьэкІэ, сыт ищІэн хуейр? Ерыскъы узыншэ ишхын, и Іэпкълъэпкъым зригъэужьын икІи хьэл мыхъумыщІэхэм пэІэщІэ зыхуищІын хуейщ. Апхуэдэ дыдэу ди гум щыхъу-щыщІэхэм дыхуэсакъын хуейщ. Абы щхьэкІэ дэ махуэ къэс Алыхьым и Псалъэм доджэ, ди зэІущІэхэм зыхудогъэхьэзыр, абыхэм докІуалІэ икІи жыджэру дыхэтщ, хъыбарыфІри псэемыблэжу догъэІу. Абы нэмыщІ, хьэл мыхъумыщІэ зыхэдмылъхьэн щхьэкІэ, ди акъылыр зыуцІэпІыфыну псом пэІэщІэ зыхудощІ, псалъэм папщІэ, нэгу зегъэужьыкІэ къемызэгъхэмрэ ныбжьэгъу Іейхэмрэ.

16. Притчи 23:4, 5 ит чэнджэщыр ноби сэбэп къытхуэхъуу жыпІэ щІэхъунур сыт?

¹⁶ УиІэмкІэ арэзыуэ щыт. Библием мыпхуэдэ чэнджэщ къыдет: «Мылъку зэхуэхьэсыным къарууншэ дыдэ зомыгъэщІ. [...] Уплъамэ, ар щыІэжкъым, сыт щхьэкІэ жыпІэмэ абы дамэ къытекІэнурэ, бгъэ хуарзэу уэгум ихьэжынущ» (Прит. 23:4, 5). Мылъкур псынщІэу пфІэкІуэдыфынущ, ауэ, абы емылъытауэ, къулейхэми къулейсызхэми ахъшэ зэхуэхьэсыным я гъащІэр трагъэкІуадэ. ЦІыхум и щхьэр мылъкум щетам деж, абы ар Іуэху мыхъумыщІэхэм хуешэ. Абы къыхэкІкІэ а цІыхум пщІэ къыхуамыщІыжу мэхъу, нэгъуэщІхэмрэ езымрэ я зэхуаку дэлъ зэхущытыкІэр зэІохьэ, уеблэмэ, и узыншагъэми зэран хуохъу (Прит. 28:20; 1 Тим. 6:9, 10). Ауэ дэ Іущагъ дгъэлъагъуэмэ, ахъшэм дытегужьеикІауэ дыпсэунукъым. Абы и фІыгъэкІэ дэ цІыху нэпсейуэ дыщытынукъым икІи диІэмкІэ арэзыуэ дыщытынущ (Эккл. 7:12).

17. Притчи 12:18 зытепсэлъыхь «цІыху Іущым» хуэдэу дыщытын щхьэкІэ, сыт тщІэ хъунур?

¹⁷ Зыгуэр жыпІэн ипэ фІыуэ гупсысэ. ДыщыпсалъэкІэ дымысакъыу щытмэ, нэгъуэщІхэми дэри абы и зэран къыдэкІыфынущ. Библием мыпхуэдэу щыжыІащ: «Зи бзэ хуэмысакъым и псалъэм, джатэм хуэдэу, укъеуІэ, ауэ цІыху Іущ и псалъэр хущхъуэм хуэдэщ» (Прит. 12:18). НэгъуэщІхэмрэ дэрэ ди зэхуаку дэлъ зэхущытыкІэфІыр тхъумэн щхьэкІэ, абыхэм я щыуагъэхэм дытепсэлъыхьынукъым икІи я цІэр ІейкІэ дгъэІунукъым (Прит. 20:19). Ди псалъэхэм укъамыуІэу, хущхъуэм хуэдэу щытын щхьэкІэ, Алыхьым и Псалъэм ит щІэныгъэмкІэ ди гур из тщІын хуейщ (Лк. 6:45). Библием итым куууэ дыщегупсысым деж, ди псалъэхэм, «псыежэх уэрым» хуэдэу, нэгъуэщІхэм гупсэхугъуэ иратыфынущ (Прит. 18:4, Гъэс.).

18. ХъыбарыфІыр щыдгъэІукІэ Притчи 24:6 ит принципыр дапхуэдэу къыддэІэпыкъурэ?

¹⁸ Ди организацэм къыбгъэдэкІ унафэхэм тет. Библием дыхуегъэуш: «ЩебгъэкІуэкІкІи зауэр, псалъэ Іущу къыуахьэлІэхэм щІэдэІу; къыдихынщ ехъулІэныгъэр чэнджэщэгъур зи бэм» (Прит. 24:6, Гъэс.). ХъыбарыфІ гъэІунымрэ Хьисэ и гъэсэнхэр гъэхьэзырынымрэ едгъэфІэкІуэну мы едзыгъуэм ит принципыр дапхуэдэу къызэрыддэІэпыкъур? ХъыбарыфІыр щыдгъэІукІэ икІи цІыхухэр Библием щедгъаджэкІэ дэ дызэрыхуейм хуэдэу дымыщІу, ди организацэм къыдит чэнджэщхэм дызэрытетыным дыхущІокъу. Псалъэм папщІэ, ди зэІущІэхэм Іущагъ зыхэлъ чэнджэщхэр къыщытІэрохьэ. А чэнджэщхэр хэт къыдэзытыр? Ар лэжьакІуэ Іэзэхэращ: Библием тегъэщІа псалъэхэр жызыІэхэмрэ демонстрациехэр зыгъэлъагъуэхэмрэщ. Абы нэмыщІ, цІыхум Библиер нэхъ тыншу къыгурыІуэн щхьэкІэ, Иеговэ и организацэм ІэмэпсымэфІхэр къыдет, псалъэм папщІэ, публикациехэмрэ видеохэмрэ. А Іэмэпсымэхэр Іэзэу къэбгъэсэбэпыну ухущІэкъуу пІэрэ?

19. Иеговэ къыбгъэдэкІ Іущагъым дапхуэдэу узэрыхущытыр? (Притчи 3:13—18).

¹⁹ Къеджэ Притчи 3:13—18 (Гъэс.). Иеговэ Іущагъ зыхэлъ чэнджэщхэр къызэрыдитым щхьэкІэ фІыщІэшхуэ худощІ! А чэнджэщхэр мыхъуамэ, сыт хуэдэ гъащІэт етхьэкІынур? Мы статьям Притчи тхылъым щыщ мыхьэнэшхуэ зиІэ принцип зыбжанэ щызэпкърытхащ. ДауикІ, Библием ит нэгъуэщІ тхылъхэми Иеговэ къыбгъэдэкІ Іущагъ зыхэлъ чэнджэщхэр къыщыбгъуэтыфынущ. Аращи, Иеговэ и унафэхэр зэи ІэщІыб дывмыгъэщІ. Мы дунейм щыщхэр Алыхьым и Іущагъым зэрыхущытым ди дежкІэ мыхьэнэ иІэкъым. Дэ быдэу ди фІэщ мэхъу: а Іущагъыр «зыІэщІэзмыгъэкІыр ехъулІащ».