ЛЪАГЪУМЫХЪУНЫГЪЭР ЗЫТУМЫГЪЭКІУЭН ЩХЬЭКІЭ СЫТ ПЩІЭ ХЪУНУР?
3 | Уи гупсысэкІэр хъуэж
Библием жиІэр:
«Тхьэм фи гум илъхэр зэрырехъуэкІ, хьэл-щэныфІ фхэлъ хъун щхьэкІэ. Апхуэдэу фщІэмэ, Тхьэр зыхуейр къывгурыІуэнущ — фІыгъуэр зыхуэдэри, Тхьэм и гум ирихьри, фІыгъуэ нэгъэсар зыхуэдэри къывгурыІуэнущ» (РИМ 12:2).
Мы псалъэхэм къикІыр
Дызэгупсысыр Алыхьым къыфІэмыІуэхуу щыткъым (Иеремия 17:10). Лъагъумыхъуныгъэр къыщежьэр цІыхум и гупсысэхэмрэ и гурыщІэхэмрэ дежщ. Аращ уи псалъэхэмрэ уи ІуэхущІафэхэмрэ укІэлъыплъ къудейкІэ щІызэфІэмыкІыр. ЗэхъуэкІыныгъэхэр нэхъ куууэ щытын хуейщ — лъагъумыхъуныгъэр уи акъылми уигуми къиптхъыным мыхьэнэшхуэ иІэщ. А зы Іэмал закъуэращ щыІэр нэгъэсауэ зыпхъуэжу, лъагъумыхъуныгъэм уи деж кІэ щептыну.
Мы принципыр къызэрыбгъэсэбэп хъунур
Уи щхьэр гъэунэхужи, пэжыр къащІэ: дауэ цІыхухэм уазэрыхущытыр, псом хуэмыдэу нэгъуэщІ расэм е нэгъуэщІ лъэпкъым щыщхэм? ЗэупщІыж: «Абыхэм теухуауэ сыт хуэдэ еплъыкІэ сиІэр? Си еплъыкІэр зытегъэщІар ахэр фІыуэ зэрысцІыхура хьэмэрэ нэмыплъ зэрестыра?» Лъагъумыхъуныгъэмрэ залымыгъэмрэ ухуэзыгъэуш фильмхэм е нэгъуэщІ материалхэм уемыплъ.
Алыхьым и Псалъэм цІыхум и гум илъ лъагъумыхъуныгъэр иригъэкъэбзыкІыжыфынущ
Уи гупсысэхэмрэ уи гурыщІэхэмрэ икІэм нэс къыщыбгурымыІуэ къохъу. Ауэ Алыхьым и Псалъэр абыкІэ къыбдэІэпыкъуфынущ, сыт щхьэкІэ жыпІэмэ ар «цІыхум и гущІэлъапсэм нэсыху пхрокІ» (Еврейхэм 4:12). Аращи, Библиер адэкІи джы. Уи еплъыкІэр абы итым техуэрэ темыхуэрэ зэхэгъэкІ. Уи гупсысэкІэр Алыхьым ейм техуэу щытын щхьэкІэ, пхузэфІэкІ къомыгъанэ. Лъагъумыхъуныгъэм цІыхум и гум лъабжьэ быдэ щищІами, Алыхьым и Псалъэм ар иригъэкъэбзыкІыжыфынущ (2 Коринф 10:4, 5).