Хуитыныгъэ пэжым ухуэзышэ гъуэгу

1, 2. 1) Хуитыныгъэ яІэн щхьэкІэ сыт цІыхухэм ящІэр? 2) Абыхэм къагъэсэбэп Іэмалхэм сытым хуишэрэ?

НОБЭ цІыхухэр зэхуэдэу, хуитыныгъэ яІэу псэуну хуейщ. Къэрал куэдым щыпсэу цІыхухэм захуагъэ къалъыхъуэ, цІыху зэхэгъэжым икІи тхьэмыщкІагъэм текІуэну хущІокъу. НэгъуэщІхэр щІобэн зыхуейр жаІэу, зыхуейр ящІэу, зэрыхуейм хуэдэу псэуну. Дэнэ щІыпІэ щымыпсэуми, псоми хуитыныгъэ яІэну хуейщ.

² Хуитыныгъэ яІэн щхьэкІэ цІыхухэм зыкъаІэтри къэралым пэщІоувэ, унафэщІхэр трагъэкІынуи щыхэт щыІэщ. Ауэ зыхуейр къехъулІэрэ абыхэм? Хьэуэ. И нэхъыбэм абы гугъуехьымрэ лІэныгъэмрэ нэхъыбэ ищІу аращ. А псор щыхьэт тохъуэ пащтыхь Сэлмэн Алыхь ІэмыркІэ итха псалъэхэр зэрыпэжым: «ЦІыхум адрей цІыхум зэран хуэхъуу унафэ хуещІ» (Эккл. 8:9).

3. Сыт дэ тщІэн хуейр насыпыфІэ дыдэ дыхъун щхьэкІэ?

³ Библием жеІэ сыт дэ тщІэн хуейми насыпыфІэ дыдэ дыхъун щхьэкІэ. Хьисэ и лъэужь ирикІуэ Екъуб итхат: «ИщІэ псомкІэ гъуэгу махуэ теува цІыхур мыращ: Тхьэм и унафэм фІыуэ хэплъэ зэпыту икІи зэдэІуа Іуэхухэр щымыгъупщэжу зыгъэзащІэрщ. Тхьэм и унафэр щыщІагъэншэу икІи нэгъэсауэ щытщи, цІыхухэм щхьэхуитыныгъэ ирет» (Екъуб 1:25). А «унафэ щыщІагъэншэр» Иеговэщ къыдэзытар икІи зыми хуэмыдэу аращ зыщІэр цІыхухэр насыпыфІэ дыдэ хъун щхьэкІэ зыхуэныкъуэр сытми. Алыхьым Іэдэмрэ Хьэуарэ насыпыфІэу щытын щхьэкІэ зыхуэныкъуэ псори, хуитыныгъэ пэжри яритат.

ЦІЫХУХЭМ ХУИТЫНЫГЪЭ ПЭЖ ЩАІАР

4. Сыт хуэдэ хуитыныгъэ Іэдэмрэ Хьэуарэ яІар? (Статьям ипэм ит сурэтым феплъ.)

⁴ ЩІэдзапІэ тхылъым и япэ псалъащхьитІым къыдагъащІэ Іэдэмрэ Хьэуарэ нобэ цІыхухэм я гур зыщІэхъуэпс хуитыныгъэм хуэдэ зэраІар — ахэр зыри хуэныкъуэтэкъым, зы щхьэкІи шынэтэкъым, абы щыгъуэ залымыгъи щыІэтэкъым. Шхыным, лэжьыгъэм, узыншагъэм икІи лІэныгъэм теухуауэ ахэр гузавэтэкъым (ЩІэдз. 1:27—29; 2:8, 9, 15). Ауэ абыхэм я хуитыныгъэм гъунэ лъэпкъ имыІэу арат? АдэкІэ къэтщІэнщ.

5. Нобэ куэдым яІэ гупсысэкІэм емылъытауэ, хуитыныгъэ пэж яІэн щхьэкІэ, сыт цІыхухэр зыхуэныкъуэр?

⁵ Нобэ куэдыр мыпхуэдэу йогупсыс: цІыхум хуитыныгъэ нэгъэса иІэн щхьэкІэ зыхуейр ищІэну хуитын хуейщ, абы кърикІуэнум емылъытауэ. «Уорлд бук» энциклопедием зэрыжиІэмкІэ хуитыныгъэкІэ узэджэ хъунур «унафэ къэпщтэну икІи уи унафэм утетыжыну Іэмал ущиІэм дежщ». Абы адэкІэ зэрыжиІэмкІэ, цІыхухэм хуитыныгъэ яІэу жыпІэ щыхъунур, къэралым абыхэм унафэ зыхуэмыныкъуэхэр икІи Іущагърэ захуагъэрэ зыхэмылъхэр ягъэзэщІэну щахуимыгъэувым дежщ. Абы къыхэкІкІэ укъэзыгъэувыІэ унафэ гуэрхэри щыІэн хуейщ, абыхэм дыхуэныкъуэщ, псоми хуитыныгъэ яІэн щхьэкІэ. Апхуэдэу щыщыткІэ, мыпхуэдэ упщІэ къохъей: сыт хуэдэ унафэхэм дыхуэныкъуэми, сыт хуэдэхэр захуэми икІи Іущагъ хэлъми зэхигъэкІыну хэт хуитыныгъэ зиІэр?

6. 1) Гъунэ зимыІэ хуитыныгъэр Иеговэ фІэкІа зыми имыІэу сыт жыпІэ щІэхъунур? 2) ЦІыхухэм сыт хуэдэ хуитыныгъэ яІэр икІи сыт щхьэкІэ?

⁶ Дэ зэи зыщыдгъэгъупщэ хъунукъым: гъунэ зимыІэ хуитыныгъэр, хуитыныгъэ псор, зиІэр Алыхь Иеговэ закъуэщ. Сыт апхуэдэу жыпІэ щІэхъунур? Абы псори къигъэщІащ икІи Дуней псор и ІэмыщІэ илъщ (1 Тим. 1:17; Апок. 4:11). Даут и псалъэ дахэхэм къызэрыхэщымкІэ, Иеговэ зыми хуэмыдэ увыпІэ лъагэ иІыгъщ. (Къеджэ 1 Летопись 29:11, 12a.) Абы къыхэкІкІэ уафэми щІылъэми щыпсэууэ хъуам я хуитыныгъэм гъунэ иІэщ. Иеговэ закъуэщ хуитыр тщІэ хъунымрэ мыхъунымрэ теухуауэ захуэу, дызыхуэныкъуэу, Іущагъ хэлъу илъытэ унафэхэр тхуищІыну. Иеговэ япэу къигъэщІа цІыхухэм апхуэдэ унафэхэр яхуигъэувауэ щытащ.

7. Сыт хуэдэ Іуэхугъуэхэр тфІэфІу, гуфІэгъуэ къытхуахьу Иеговэ дыкъигъэщІа?

⁷ Іэдэмрэ Хьэуарэ яІа хуитыныгъэм гъунэ иІэт. Псалъэм папщІэ, абыхэм къагурыІуэт псэун щхьэкІэ бэуэн, жеин, шхэн зэрыхуейр. Апхуэдэу щытын хуейуэ, ар яхэлъу Алыхьым къигъэщІат. Абы къикІрэт абыхэм хуитыныгъэ ямыІэу? Хьэуэ, сыт щхьэкІэ жыпІэмэ апхуэдэ Іуэхугъуэхэр тфІэфІу, гуфІэгъуэ къытхуахьу Иеговэ дыкъигъэщІащ (Пс. 104:14, 15; Эккл. 3:12, 13). Дэ псоми тфІэфІщ жьы къабзэкІэ дыбэуэну, дигу ирихь шхыныгъуэхэр тшхыну икІи зыдгъэпсэхуауэ нэху дыкъекІыну. Зыми игу къэкІынукъым абыхэм щхьэхуимыт дащІу. ДауикІ, Іэдэми Хьэуаи а псор я хуитыныгъэм зэран хуэхъуу егупсыстэкъым.

8. Иеговэ Іэдэмрэ Хьэуарэ сыт хуэдэ унафэ яритауэ щытар икІи сыт щхьэкІэ?

⁸ Иеговэ Іэдэмрэ Хьэуарэ мыпхуэдэ унафэ яхуищІат: «Фылъхуэ-фыпІэ, фыбагъуэ, щІылъэм тез фыхъуи, ар къэвгъэІурыщІэ» (ЩІэдз. 1:28). А унафэм ахэр щхьэхуимыт ищІу къикІрэт? Хьэуэ. А унафэм цІыхухэм Іэмал къахузэІуихт щІылъэм теухуауэ Иеговэ мурад иІэр ягъэзэщІэну. Иеговэ хуейт щІылъэ псор жэнэт дахащэ хъууэ, цІыху дагъуэншэхэр абы гъащІэ мыухыж яІэу щыпсэуну (Ис. 45:18). Нобэ дэтхэнэ цІыхуми хуитыныгъэ иІэщ унагъуэ иухуэнрэ имыухуэнрэ унафэ ищІыну, е унагъуэ иухуэу щытми, бын зримыгъэгъуэтыну хуитщ. ИкІи ар Иеговэ и мурадым пэщІэувэкъым. Ауэ куэдым унагъуэ яухуэ икІи бын зрагъэгъуэт, ар гугъуехь куэдым зэрыпыщІам емылъытауэ (1 Кор. 7:36—38). Сыт щхьэкІэ? Дэтхэнэ зыри щогугъ унагъуэм насып щигъуэтыну (Пс. 127:3). Іэдэмрэ Хьэуарэ Иеговэ жиІэм едэІуауэ щытамэ, игъащІэ псокІэ я унагъуэм насыпыр изу псэунут.

ЦІЫХУХЭМ ХУИТЫНЫГЪЭ ПЭЖЫР ЗЭРАФІЭКІУЭДАР

9. ЩІэдзапІэ 2:17 ит унафэр щІаритам щхьэусыгъуэ имыІэу икІи абы захуагъэрэ Іущагърэ хэмылъу сыт жыпІэ щІэмыхъунур?

⁹ Иеговэ Іэдэмрэ Хьэуарэ иджыри зы унафэ яритат икІи ІупщІу къагуригъэІуат абы ебакъуэу щытмэ, сыт хуэдэ тезыр ятрилъхьэнуми. Абы яжриІат: «ФІымрэ емрэ зэхэзыгъэкІ жыгым къыпыкІэр умышх; сыт щхьэкІэ жыпІэмэ ар щыпшх махуэм уи ажалыр абы къыхэкІынущ» (ЩІэдз. 2:17). ЖыпІэ хъунут а унафэр щхьэусыгъуэншэу икІи абы захуагъэрэ Іущагърэ хэмылъу? А унафэр зэрагъэзащІэм ахэр щхьэхуимыт ищІу къикІрэт? ДауикІ, къикІтэкъым. Библиер куууэ зыдж щІэныгъэлІ куэдым зэрыжаІэмкІэ, Алыхьым а унафэр Іэдэмрэ Хьэуарэ щІаритам щхьэусыгъуэ иІэт икІи абы Іущагъ хэлът. Абыхэм ящыщ зым етх: «Алыхьым и унафэм [ЩІэдзапІэ 2:16, 17-м итым] мыращ къикІыр: Алыхь закъуэращ зыщІэр цІыхухэм я дежкІэ сытыр „фІыми“, сытыр „Іейми“. ЦІыхухэм „фІы“ ящІэу, абы къахуихь фІыгъуэхэр нэгъэсауэ зыхащІэн щхьэкІэ, Алыхьым дзыхь хуащІу, жиІэм едэІуэн хуейщ. Ахэр Алыхьым жиІэм емыдаІуэмэ, езыхэм „фІымрэ Іеймрэ“ зэхагъэкІын хуей хъунущ». Ауэ зы цІыхуми апхуэдэ зэфІэкІ иІэкъым.

10. ИщІэныр къыхихыну хуитыныгъэ зиІэмрэ фІымрэ Іеймрэ зэхигъэкІыну хуитыныгъэ зиІэмрэ сыт зэхэбгъэзэрыхь щІэмыхъунур?

¹⁰ Ауэ языныкъуэ цІыхухэм жаІэфынущ: «Алыхьым Іэдэм ирита унафэм, абы зыхуейр ищІэну хуимыту ищІтэкъэ?» Апхуэдэ цІыхухэм зэхагъэзэрыхь ищІэныр къыхихыну хуитыныгъэ зиІэмрэ фІымрэ Іеймрэ зэхигъэкІыну хуитыныгъэ зиІэмрэ. Іэдэмрэ Хьэуарэ хуитыныгъэ яІэт: ахэр хуитт Алыхьым едэІуэнрэ емыдэІуэнрэ унафэ ящІыну. Ауэ фІымрэ Іеймрэ зэхигъэкІыну хуитыныгъэ зиІэр Иеговэ закъуэщ икІи Іэдэн жыг хадэм ита «фІымрэ емрэ зэхэзыгъэкІ» жыгым ар къигъэлъагъуэт (ЩІэдз. 2:9). Мурад тщІыхэм сытым дыхуишэнуми дэ сыт щыгъуи къытхуэщІэнукъым икІи шэч лъэпкъ къытедмыхьэу тхужыІэнукъым тщІа унафэм сыт щыгъуи фІы кърикІуэну. Аращ цІыхухэм мурадыфІ яІэми, я унафэхэм гугъуехьхэр, гузэвэгъуэхэр икІи гуауэхэр щІэх-щІэхыурэ къащІыхуихьыр (Прит. 14:12, Гъэсэпэтхыдэхэр). И нэхъыбэм абы и щхьэусыгъуэр — цІыхум и зэфІэкІым гъунэ зэриІэращ. А жыгым къыпыкІэ пхъэщхьэмыщхьэхэр яшх мыхъуну Иеговэ Іэдэмрэ Хьэуарэ ярита унафэмкІэ къагуригъэІуэну хуейт хуитыныгъэ пэж яІэн щхьэкІэ, абы едэІуэн зэрыхуейр. Сыт апхуэдэу жыпІэ щІэхъунур икІи дауэ ахэр абы зэрыхущытар?

11, 12. Іэдэмрэ Хьэуарэ ящІа унафэм сыт гузэвэгъуэ къыщІрикІуар? Щапхъэ къэфхь.

¹¹ Ди жагъуэ зэрыхъунщи, Іэдэмрэ Хьэуарэ Алыхьым едэІуакъым. Хьэуа ШейтІаным и псалъэхэр и фІэщ хъуащ, мыпхуэдэу къыщигъэгугъам: «Фи нэхэр къэплъэнурэ, Тхьэуэ фІымрэ емрэ зэхэзыщІыкІым хуэдэ фыхъунущ» (ЩІэдз. 3:5). ЖыпІэ хъуну абы иужь Іэдэмрэ Хьэуарэ хуитыныгъэ нэхъыбэ яІэ хъуауэ? Хьэуэ. ШейтІанэм ахэр къызэригъэгугъам хуэдэу хъуакъым. АтІэ, куэд дэмыкІыу абыхэм езыхэм ялъэгъуащ Иеговэ и унафэм ебакъуэу, зэрахуейм хуэдэу зэращІам, Іей фІэкІа къызэримыхьар (ЩІэдз. 3:16—19). Сыт апхуэдэу щІэхъуар? Иеговэ цІыхухэм хуитыныгъэ яритатэкъым фІымрэ Іеймрэ езыхэм зэхагъэкІыну. (Къеджэ Притчи 20:24, Гъэс.; Иеремия 10:23b.)

¹² Зы щапхъэ зэпкърытхынщ. Кхъухьлъатэр здэкІуэм тэмэму нэсын щхьэкІэ, кхъухьлъатэзехуэм маршрут траухуам тету кІуэн хуейщ. Абы кхъухьлъатэм ит навигационнэ Іэмэпсымэхэр къигъэсэбэпын хуейщ икІи здэлъатэм нэсыхукІэ авиадиспетчерхэми пыщІауэ щытын хуейщ. Ауэ кхъухьлъатэзехуэм Іэмэпсымэхэм къагъэлъагъуэм мыхьэнэ иримыту, диспетчерхэм жаІэм емыдаІуэу нэгъуэщІыпІэкІэ лъатэмэ, гузэвэгъуэшхуэ къэхъункІэ хъунущ. Іэдэмрэ Хьэуарэ апхуэдэ кхъухьлъатэзехуэм ебгъэщхь хъунущ. Ахэр Алыхьым и унафэм ебакъуэри, езыхэр зэрахуейм хуэдэу ящІащ. Сыт абы кърикІуар? Гузэвэгъуэшхуэщ! Ахэри абыхэм я щІэблэри гуэныхьымрэ лІэныгъэмрэ я пщылІ хъуащ (Рим 5:12). Іэдэмрэ Хьэуарэ фІымрэ Іеймрэ езыхэм зэхагъэкІыну хуитыныгъэ яІэну хуеями, абыхэм хуитыныгъэ яІэр нэхъыбэ хъуакъым. АтІэ, абы и пІэкІэ абыхэм Иеговэ къарита хуитыныгъэ пэжыр яфІэкІуэдащ.

ХУИТЫНЫГЪЭ ПЭЖЫР ЗЭРЫЗЭБГЪЭГЪУЭТ ХЪУНУР

13, 14. Хуитыныгъэ пэж диІэн щхьэкІэ сыт тщІэн хуейр?

¹³ Языныкъуэхэм я гугъэщ цІыхухэм хуитыныгъэ нэхъыбэ яІэмэ, нэхъыфІу псэуну. Ауэ пэжу пІэрэ ар? ДауикІ, цІыхухэм хуитыныгъэ зэраІэм фІы куэд къехь, ауэ фегупсысыт: мы дунейр дапхуэдэут зэрыщытынур цІыхухэм зыхуейр ящІэу псэууэ щытамэ? «Уорлд бук» энциклопедием зэрыжиІэмкІэ, дэтхэнэ зы къэралми иІэ унафэхэм зы лъэныкъуэкІэ цІыхухэр къихъумэн хуейщ, нэгъуэщІ лъэныкъуэкІэ я хуитыныгъэм гъунэ иритын хуей мэхъу. Ауэ а тІур сыт щыгъуи зэхуэбгъэкІуэну тыншкъым. Аращ апхуэдиз унафэ къыщІыдагъэкІыр, апхуэдиз юристрэ судьярэ а унафэхэр къызэрыдгъэсэбэпыныр къыдгурыІуэн щхьэкІэ щІэлажьэр.

¹⁴ Хьисэ Мэссихь хуитыныгъэ пэжым ухуэзышэ гъуэгур дигъэлъэгъуащ. Абы жиІащ: «Си псалъэхэр фигу илъмэ, пэжу си гъуэгу ирикІуэхэм фащыщщ. Абы щыгъуэ пэжыгъэр къэфщІэнущ, пэжыгъэми щхьэхуит фищІыжынущ» (Ин. 8:31, 32, ХъыбарыфІыр, 1993). Зэрытлъагъущи, хуитыныгъэ пэжыр диІэн щхьэкІэ лъэбакъуитІ тчын хуейщ. Япэрауэ, Хьисэ зыхуригъаджэу щыта пэжыр къэтщтэн хуейщ. ЕтІуанэрауэ, абы и лъэужь диувэн хуейщ. Аращ хуитыныгъэ пэжым ухуэзышэ гъуэгур. А лъэбакъуитІым сыт хуэдэ сэбэпынагъ дэ къытхуахьынур? АдэкІэ Хьисэ пищащ: «Гуэныхь зыщІэ дэтхэнэри гуэныхь щІэным и пщылІщ. ...Къуэ лъапІэм щхьэхуит фищІыжмэ, пэжу щхьэхуит фыхъунущ» (Ин. 8:34, 36, ХъыбарыфІыр, 1993).

15. Хуитыныгъэ пэж диІэн щхьэкІэ сыт Хьисэ нэмыщІ зыри къыщІыддэмыІэпыкъуфынур?

¹⁵ Хьисэ и лъэужь ирикІуэхэм яритыну къызэригъэгугъа хуитыныгъэр, нобэ мы дунейм щыпсэу цІыхухэр зыхуей хуитыныгъэм нэхърэ, дауикІ, куэдкІэ нэхъыфІщ. «Къуэ лъапІэм щхьэхуит фищІыжмэ, пэжу щхьэхуит фыхъунущ» Хьисэ щыжиІам щыгъуэ, абы зи гугъу ищІар пщылІу дызыІыгъ гуэныхьым дыкъызэрыІэщІихыжыныращ. Аращ цІыхухэм хьэзаб тезыгъэлъыр. Гуэныхьым Іей щІэным дызэрыхуигъэушым имызакъуэу, фІы тщІэну, ди къарур абы тедгъэкІуэдэну зэран къытхуохъу. Аращ дэ гуэныхьым дрипщылІу жыпІэ щІэхъунур. Абы ди лъэр щІех, гуауэрэ гугъуехьрэ дегъэшэч, икІэм-икІэжым лІэныгъэ къытхуехь (Рим 6:23). Апостол Паули гуэныхьым хьэзаб уигъэшэчыр зыхищІэт. (Къеджэ Рим 7:21—25.) Гуэныхьым кІэ къыхуэкІуа иужь Іэдэмрэ Хьэуарэ хуитыныгъэ пэж яІам хуэдэ дэри диІэ хъужынущ.

16. Дапщэщ дэ хуитыныгъэ пэж дыщиІэнур?

¹⁶ «Си псалъэхэр фигу илъмэ» жиІэу, Хьисэ жиІа псалъэхэм къагъэлъагъуэ Хьисэ хуитыныгъэ къыдитыжыну дыхуеймэ, дэ ди лъэныкъуэкІэ зыгуэр тщІэн зэрыхуейр. Хьисэ и лъэужь дыщиувам дэ дызыхуейр къэдгъанэри, мурад тщІащ абы зыхуригъаджэу щытам дытету дыпсэуну (Мт. 16:24). Хьисэ дыкъызэригъэгугъам хуэдэу хуитыныгъэ диІэнущ, абы цІыхубэ псом щхьэкІэ ита щхьэщэхуж къурмэныпхъэм къытхуихь фІыгъуэ псор къытІэрыхьа иужь.

17. 1) НасыпыфІэ дыхъуну икІи гъащІэм и мыхьэнэр зыхэтщІэну сыт къыддэІэпыкъунур? 2) Сыт къыкІэлъыкІуэ статьям щызэпкърытхынур?

¹⁷ Дэ, Хьисэ и лъэужь ирикІуэхэр, абы зыхуригъаджэу щытахэм дыщытетым деж, насыпыфІэ дохъу икІи гъащІэм и мыхьэнэр зыхыдощІэ. Абы нэмыщІ гуэныхьымрэ лІэныгъэмрэ дыкъыІэщІэкІыжыну Іэмал диІэ мэхъу. (Къеджэ Рим 8:1, 2, 20, 21.) КъыкІэлъыкІуэ статьям дэ щызэпкърытхынущ, Іущагъ тхэлъу ди хуитыныгъэр дауэ къэдгъэсэбэп хъунуми, хуитыныгъэ пэжыр къызыбгъэдэкІ Алыхь Иеговэ игъащІэ псокІэ дгъэгуфІэн щхьэкІэ.